I Yini Lexi Nga Endlaka Leswaku Hi Va Ni Ntsako eNdyangwini?
Xana u ehleketa leswaku i . . .
-
rirhandzu?
-
mali?
-
kumbe swin’wana?
LESWI BIBELE YI SWI VULAKA
“Va tsaka lava twaka rito ra Xikwembu va tlhela va ri hlayisa!”—Luka 11:28, Vuhundzuluxeri Bya Misava Leyintshwa.
NDLELA LEYI SWESWO SWI NGA KU VUYERISAKA HA YONA
Ku kuma rirhandzu ra xiviri.—Vaefesa 5:28, 29.
Ku tiphina hi xichavo xa xiviri.—Vaefesa 5:33.
Ku va ni nsirhelelo wa xiviri.—Marka 10:6-9.
XANA HI NGA SWI TSHEMBA HAKUNENE LESWI BIBELE YI SWI VULAKA?
Ina, hikwalaho ka swivangelo swimbirhi:
-
Xikwembu hi xona Musunguri wa ndyangu. Bibele yi vula leswaku “vito ra ndyangu wun’wana ni wun’wana . . . ri [huma] eka” Yehovha Xikwembu. (Vaefesa 3:14, 15) Hi marito man’wana, lunghiselelo ra ndyangu ri kona hileswi Yehovha a endleke leswaku ri va kona. Ha yini sweswo swi ri swa nkoka?
Anakanya hi leswi: U le ku tiphineni hi swakudya swo xawula naswona u lava ku tiva leswi tirhisiweke ku swi sweka, xana i mani loyi u nga n’wi vutisaka? A swi kanakanisi leswaku u ta vutisa loyi a swi swekeke.
Hilaha ku fanaka, leswaku hi kuma lexi endlaka leswaku hi va ni ntsako endyangwini, hi fanele hi lava nkongomiso eka Yehovha, Musunguri wa lunghiselelo ra ndyangu.—Genesa 2:18-24.
-
Xikwembu xa khathala hi wena. Mindyangu yi endla kahle loko yi lava nkongomiso wa Yehovha, lowu a wu nyikelaka hi ku tirhisa Rito rakwe. Ha yini? “Hikuva xa mi khathalela.” (1 Petro 5:6, 7) Yehovha wa ku rhandza—naswona minkarhi hinkwayo ndzayo yakwe ya tirha!—Swivuriso 3:5, 6; Esaya 48:17, 18.
XIVUTISO XO ANAKANYISISA HA XONA
Xana u nga va wanuna, wansati kumbe mutswari lonene hi ndlela yihi?
Bibele yi hlamula xivutiso xexo eka VAEFESA 5:1, 2 na VAKOLOSA 3:18-21.