Yobo 1:1-22
1 A ku ri ni wanuna un’wana etikweni ra Uzi loyi vito rakwe a ku ri Yobo.*+ Wanuna loyi a a lulamile naswona a a tshembekile;+ a a chava Xikwembu naswona a papalata leswo biha.+
2 A a ri ni vana va majaha va nkombo ni vanhwanyana vanharhu.
3 Swifuwo swakwe a ku ri tinyimpfu ta 7 000, tikamela ta 3 000, tihomu* ta 1 000 ni timbhongolo* ta 500 swin’we ni malandza yo tala lerova a va munhu wo xiximeka swinene eka vanhu hinkwavo va le Vuxeni.
4 Vana vakwe va majaha a va endla nkhuvo etindlwini ta vona ha un’we hi siku ro karhi, va endla hi ku siyerisana. A va rhamba vamakwavo va vona va xisati vanharhu leswaku va ta dya ni ku nwa swin’we.
5 Loko masiku ya nkhuvo ma herile, Yobo a a va vitana leswaku a ta va basisa. A a pfuka ka ha ri mixo swinene a endlela un’wana ni un’wana wa vona gandzelo ro hisiwa.+ Hikuva Yobo a a ku: “Kumbexana vana va mina va majaha va dyohile va rhukana Xikwembu etimbilwini ta vona.” Yobo a a endla tano mikarhi hinkwayo.+
6 Kutani ku fika siku leri vana va Xikwembu xa ntiyiso*+ va nga nghena va yima emahlweni ka Yehovha,+ Sathana+ na yena a fika a nghena exikarhi ka vona.+
7 Yehovha a vutisa Sathana a ku: “U huma kwihi?” Sathana a hlamula Yehovha a ku: “A ndzi rhendzeleka emisaveni, ndzi fambafamba eka yona.”+
8 Hiloko Yehovha a vutisa Sathana a ku: “Xana u n’wi vonile nandza wa mina Yobo? A nga kona loyi a fanaka na yena emisaveni. U lulamile naswona wa tshembeka,+ u chava Xikwembu naswona u papalata leswo biha.”
9 Hiloko Sathana a hlamula Yehovha a ku: “Xana Yobo wo chava Xikwembu swa ntsenantsena?+
10 Xana a wu n’wi sirhelelanga matlhelo hinkwawo,+ u tlhela u sirhelela ni ndyangu wakwe ni hinkwaswo leswi a nga na swona? U katekise hinkwaswo leswi a swi endlaka+ naswona swifuwo swakwe swi tele hinkwako emisaveni.
11 Kambe, wa nga tlakusa voko ra wena u herisa hinkwaswo leswi a nga na swona, u ta swi vona u ta ku rhukana.”
12 Kutani Yehovha a ku eka Sathana: “Vona! Hinkwaswo leswi a nga na swona swi le mavokweni ya wena. Ntsena yena u nga n’wi khumbi!” Kutani Sathana a suka emahlweni ka Yehovha.+
13 Hi siku leri vana vakwe a va ri eku dyeni ni ku nwa vhinyo endlwini ya buti wa vona wa mativula,+
14 ku te nandza eka Yobo a ku: “Tihomu a ti ri karhi ti rima naswona timbhongolo a ti ri eku dyeni ka byanyi etlhelo ka tona,
15 loko Vasebiya va fika va hlasela va ti teka, va tlhela va dlaya malandza hi banga. Ku pone mina ntsena leswaku ndzi ta ku byela.”
16 Loko nandza yoloye a ha vulavula ku fika nandza un’wana a ku: “Ku te ndzilo wa Xikwembu* wu huma hi le tilweni wu fika wu hisa tinyimpfu ni malandza wu ma herisa! Ku pone mina ntsena leswaku ndzi ta ku byela.”
17 Loko nandza yoloye a ha vulavula, ku fika nandza un’wana, a ku: “Vakalidiya+ va te va ri mavuthu manharhu va fika va teka tikamela, va dlaya ni malandza hi banga. Ku pone mina ntsena leswaku ndzi ta ku byela.”
18 Loko nandza yoloye a ha vulavula, ku fika nandza un’wana, a ku: “Vana va wena hinkwavo a va ri eku dyeni ni ku nwa vhinyo endlwini ya buti wa vona wa mativula.
19 Hiloko ku ta xidzedze lexi humaka hi le mananga, xi fika xi ba tikhona ta mune ta yindlu, yi wa yi dlaya vana va wena hinkwavo. Ku pone mina ntsena leswaku ndzi ta ku byela.”
20 Loko Yobo a twa sweswo a suka a yima a handzula swiambalo swakwe a tlhela a tsemeta ni misisi; kutani a wela ehansi a khinsama
21 a ku:
“Ndzi hume ekhwirini ra manana ndzi nga ambalanga nchumu,Naswona ndzi ta tlhelela ndzi nga ambalanga nchumu.+
Yehovha u nyikile+ naswona Yehovha u tekile.
Vito ra Yehovha a ri ye emahlweni ri dzunisiwa.”
22 Eka hinkwaswo leswi, Yobo a nga dyohanga kumbe ku hehla Xikwembu hi swo biha.
Tinhlamuselo ta le hansi
^ Swi nga endleka ri vula “La Vengiwaka.”
^ Hi Xiheveru, “swipani swa 500 swa tihomu.”
^ Hi Xiheveru, “timbhongolo ta matswele.”
^ Xivulavulelo xa Xiheveru lexi vulaka vana va Xikwembu lava nga tintsumi.
^ Kumbexana “Rihati.”
