Vaheveru 2:1-18
2 Hi yona mhaka leyi hi faneleke hi swi teka swi ri swa nkoka swilo leswi hi swi tweke,+ leswaku hi nga tshuki hi hambuka.+
2 Loko rito leri vuriweke hi tintsumi+ ri tshembeka naswona loyi a tlulaka nawu a tlhela a nga yingisi a xupuriwa hi vululami,+
3 xana hi ta ponisa ku yini loko hi nyenya ku ponisiwa lokukulu?+ Hikuva ku sungule ku vuriwa hi Hosi ya hina+ naswona lava yi tweke va swi vurile leswaku i ntiyiso.
4 Xikwembu na xona xi nyikele vumbhoni hi masingita ni hi swihlamariso ni hi mitirho yo hambanahambana ya matimba+ ni hi moya lowo kwetsima lowu aviweke hi ku rhandza ka xona.+
5 Hikuva misava leyi taka+ leyi hi vulavulaka ha yona a xi yi vekanga ehansi ka tintsumi.
6 Kambe mbhoni yin’wana yi vurile kun’wana yi ku: “Xana munhu wo va yini lerova u nga ehleketa hi yena, kumbe n’wana wa munhu lerova u n’wi khathalela?+
7 U n’wi endle a va ehansinyana ka tintsumi; u n’wi nyike ku vangama ni xichavo, u n’wi nyike matimba yo fuma swilo leswi endliweke hi mavoko ya wena.
8 Swilo hinkwaswo u swi veke ehansi ka milenge yakwe.”+ Hi ku veka swilo hinkwaswo ehansi ka yena,+ Xikwembu a xi siyanga nchumu xi nga ri ehansi ka yena.+ Kambe sweswi a hi si swi vona swilo hinkwaswo swi ri ehansi ka yena.+
9 Yesu a ri ehansinyana ka tintsumi swa nkarhinyana,+ kambe sweswi hi n’wi vona a tlhandlekiwe harhi ya ku vangama ni ku xiximiwa hikwalaho ka leswi a feke,+ leswaku hi musa lowukulu wa Xikwembu a ta nantswa rifu hikwalaho ka vanhu hinkwavo.+
10 Hikuva a swi fanela eka loyi swilo hinkwaswo swi nga kona hi mhaka yakwe ni loyi ha yena swilo hinkwaswo swi nga kona, hi xikongomelo xo tisa vana vo tala eku vangameni+ ku endla leswaku Murhangeri Lonkulu wa ku ponisiwa ka vona+ a hetiseka hi ku xaniseka.+
11 Hikuva loyi a kwetsimisaka ni lava kwetsimisiwaka+ va huma eka tatana un’we,+ hikwalaho ka sweswo a nga khomiwi hi tingana ku va vula vamakwavo,+
12 hilaha a vulaka hakona a ku: “Ndzi ta vula vito ra wena eka vamakwerhu; ndzi ta ku dzunisa hi risimu exikarhi ka nhlengeletano.”+
13 A tlhela a ku: “Ndzi ta tshemba yena.”+ Nakambe u ri: “Yingisani! Mina ni vana lava Yehovha* a ndzi nyikeke vona.”+
14 Hikwalaho, leswi “vana lavatsongo” va nga vanhu lava nga ni ngati ni nyama, na yena u ve munhu loyi a nga ni ngati ni nyama,+ leswaku hi rifu rakwe a ta herisa loyi a nga ni matimba yo vanga rifu,+ ku nga Diyavulosi,+
15 ni leswaku a ta tshunxa hinkwavo lava a va ri evuhlongeni vutomi bya vona hinkwabyo hikwalaho ko chava rifu.+
16 Hikuva entiyisweni a nga pfuni tintsumi kambe u pfuna vana* va Abrahama.+
17 Hikwalaho, u boheke ku fana ni “vamakwavo” hi tindlela hinkwato,+ leswaku a ta va muprista lonkulu wa tintswalo ni wo tshembeka eka swilo leswi khumbaka Xikwembu, leswaku a ta nyikela gandzelo+ leri endlaka leswaku vanhu va rivaleriwa swidyoho.+
18 Leswi na yena a nga xaniseka loko a ringiwa,+ wa swi kota ku pfuna lava ringiwaka.+
