Tito 3:1-15
3 Yana emahlweni u va tsundzuxa leswaku va titsongahata ni ku yingisa mifumo ni valawuri,+ va lunghekela ntirho wun’wana ni wun’wana lowunene,
2 va nga onhi vanhu van’wana mavito, va nga rhandzi timholovo kambe va anakanyela,+ va va ni ku rhula ni vanhu hinkwavo.+
3 Hikuva na hina hi tshame hi va swiphukuphuku, hi nga yingisi, hi hume endleleni, hi ri mahlonga ya ku navela ko hambanahambana ni mintsako, hi endla swilo swo biha ni ku va ni mona, hi nyenyetsa, hi vengana.
4 Hambiswiritano, loko musa wa Muponisi wa hina ku nga Xikwembu+ ni ndlela leyi xi rhandzaka vanhu ha yona swi kombisiwile,
5 (ku nga ri hikwalaho ka mitirho yo lulama leyi hi yi endleke+ kambe hikwalaho ka tintswalo ta xona),+ xi hi ponisile loko xi hi basisa,+ leswi endleke leswaku hi hanya ni ku endla leswaku hi va lavantshwa hi moya lowo kwetsima.+
6 Xi hi chululele moya lowu hi xitalo ha Yesu Kreste Muponisi wa hina,+
7 leswaku loko se hi vuriwe lava lulameke hikwalaho ka musa wa xona lowukulu,+ hi ta va vadyandzhaka+ hi ri ni ntshembo wa vutomi lebyi nga heriki.+
8 Marito lawa ma tshembeka naswona ndzi lava leswaku u ya emahlweni u vulavula hi swilo leswi, leswaku lava pfumelaka eka Xikwembu va tshama va anakanya hi mitirho leyinene. Swilo leswi i swinene naswona swa pfuna.
9 Kambe papalata ku kanetana ka vuphukuphuku ni ku lavisisa matimu ya swivongo, ku holova ni ku phikizana hi ta Nawu hikuva a swi pfuni nchumu naswona a swi vuyerisi.+
10 Loko ku ri ni munhu loyi a dyondzisaka tidyondzo ta mavunwa,+ n’wi papalate+ endzhaku ka loko u n’wi tsundzuxe kambirhi,+
11 hi ku tiva leswaku munhu wo tano u hambukile endleleni, wa dyoha naswona swidyoho swakwe swi n’wi avanyisile.
12 Loko ndzi rhumela Artema kumbe Tixiko+ eka wena, ringeta hi matimba ku ta eka mina eNikopoli, hikuva ndzi tiyimisele ku ya tshama kona vuxika hinkwabyo.
13 Endla matshalatshala hinkwawo leswaku u pfuna Apolosi na Zena mutivi wa Nawu leswaku va nga pfumali nchumu eka riendzo ra vona.+
14 Kambe vanhu va ka hina na vona a va dyondze ku endla mitirho leyinene, va ta kota ku pfuneta loko ku laveka mpfuno hi xihatla,+ leswaku va nga tsandzeki ku endla swilo leswinene.+
15 Hinkwavo lava ndzi nga na vona va ku rungula. Ndzi rungulele Vakrestekulorhi lava hi rhandzaka.
Onge musa lowukulu wu nga va na n’wina hinkwenu.
