Swivuriso 25:1-28
25 Leswi na swona i swivuriso swa Solomoni+ leswi vanhu va Hezekiya+ hosi ya le Yuda va swi tsaleke:*
2 Ku vangama ka Xikwembu i ku hlayisa mhaka yi ri xihundla,+Ku vangama ka tihosi i ku lavisisa mhaka.
3 Leswi matilo ma tlakukeke ni misava yi enteke,Ni mbilu ya tihosi swa tika ku yi lavisisa.
4 Susa thyaka eka silivhere,Kutani yi ta huma yi tengile.+
5 Susa lowo homboloka laha ku nga ni hosi,Kutani xiluvelo xa yona xi ta simekiwa xi tiya hi ku lulama.+
6 U nga tiendli la xiximekaka emahlweni ka hosi,+U nga yimi exikarhi ka lava dumeke,+
7 Hikuva swa antswa loko yona yi ku byela yi ku, “Tana haleno,”Ematshan’weni yo ku tsongahata emahlweni ka munhu wa xiyimo xa le henhla.+
8 U nga hatliseli ku ya mangala nandzu ehubyeni,Hikuva u ta endla yini loko munhukuloni a kombisa leswaku hi wena la nga ni nandzu?+
9 Lulamisa mhaka ya wena ni munhukuloni,+Kambe u nga boxi swihundla leswi u byeriweke swona,+
10 Leswaku loyi a yingiseke a nga ku khomisi tinganaKutani u hangalasa mhaka yo biha* leyi u nga ta tsandzeka ku yi tlherisela endzhaku.
11 Rito leri vuriweke hi nkarhi lowunene+Ri fana ni maapula ya nsuku lama nga eka swibya swa silivhere.
12 Mutshinyi wo tlhariha eka ndleve leyi yingisaka+U fana ni xingwavila xa ndleve xa nsuku ni nchumu wo tisasekisa ha wona lowu endliweke hi nsuku lowunene.
13 Murhumiwa wo tshembeka u fana ni ku titimela ka gamboko hi siku ra ntshovelo eka lava n’wi rhumeke,Hikuva u phyuphyisa n’wini wakwe.+
14 Munhu la tibumaka hi nyiko leyi a nga yi humesangiki*+U fana ni mapapa ni moya leswi nga tisiki mpfula.
15 Ndhuna yi kuceteriwa hi ku lehisa mbilu,Naswona ririmi ro rhula ri nga tshova rhambu.+
16 Loko u kuma vulombe, dyana lebyi ringaneke,Hikuva loko wo dya byo tala ngopfu, u nga ha byi hlanta.+
17 U nga tati mikondzo endlwini ya munhukuloni,Leswaku a nga karhali hi wena kutani a ku venga.
18 Munhu la nyikelaka vumbhoni bya mavunwa hi munhukulobye+U fana ni nhonga, banga ni nseve wo kariha.
19 Ku tshemba munhu loyi a nga tshembekiki* hi nkarhi wa khomboSwi fana ni ku tshemba tino leri tshovekeke kumbe nenge lowu rhurhumelaka.
20 Loyi a yimbelelelaka mbilu leyi nga ni gome tinsimu+U fana ni munhu loyi a hluvulaka xiambalo hi siku ro titimelaNaswona u fana ni vhiniga* leyi cheriweke eka munyu.*
21 Loko nala* wa wena a twa ndlala, n’wi nyike xinkwa a dya;Loko a twa torha, n’wi nyike mati a nwa,+
22 Hikuva u ta va u hlengeleta makala yo hisa enhlokweni yakwe,*+Kutani Yehovha u ta ku hakela.
23 Moya wa le n’walungwini wu nisa mpfula leyikulu,Ririmi leri hlevaka ri hlundzukisa van’wana.+
24 Swa antswa ku tshama ekhonweni ya lwanguKu tlula ku tshama ni nsati wa timholovo endlwini yin’we.+
25 Xiviko lexinene lexi humaka etikweni ra le kule+Xi fana ni mati yo titimela eka munhu la karhaleke.
26 Munhu wo tshembeka la pfumelaka ku yengiwa hi* munhu wo hombolokaU fana ni xihlovo lexi dungekeke ni lexi thyakisiweke.
27 A hi swinene ku dya vulombe byo tala ngopfu,+Naswona a hi swinene ku va munhu a tilavela ku dzunisiwa.+
28 Munhu la nga swi kotiki ku lawula ku hlundzuka kakwe,*+U fana ni muti lowu khumbi ra wona ri mbundzumuxiweke.
Tinhlamuselo ta le hansi
^ Kumbe “kopeke ni ku swi hlengeleta.”
^ Kumbe “mavarivari lama onhaka vito.”
^ Hi Xiheveru, “nyiko ya mavunwa.”
^ Kumbexana “loyi a kanganyisaka.”
^ Kumbe “ntsuvi.”
^ Kumbe “soda; alkali.”
^ Hi Xiheveru, “loyi a ku vengaka.”
^ Ku nga ku endla leswaku munhu a cinca langutelo rakwe ro biha.
^ Hi Xiheveru, “loyi a tshetshelekaka emahlweni ka.”
^ Kumbe “loyi a nga swi kotiki ku lawula moya wakwe.”
