Mitirho 4:1-37
4 Loko Petro na Yohane va ha vulavula ni vanhu, vaprista, mufambisi wa tempele ni Vasaduki+ va va tela.
2 A va nyangatsekile hikuva vaapostola a va dyondzisa vanhu ni ku vulavula erivaleni hi ta ku pfuxiwa ka Yesu eku feni.+
3 Hiloko va va khoma va va pfalela ekhotsweni+ ku fikela siku leri landzelaka hikuva se a ri perile.
4 Hambiswiritano, vo tala va lava a va va yingisile loko va dyondzisa va ve vapfumeri kutani nhlayo ya vavanuna yi fika kwalomu ka 5 000.+
5 Siku leri landzelaka vafumi va vona, vakulukumba ni vatsari va hlengeletana eYerusalema
6 va ri na Anasi muprista lonkulu,+ Kayafasi,+ Yohane, Alekzanda ni hinkwavo lava a va ri maxaka ya muprista lonkulu.
7 Hiloko va yimisa Petro na Yohane exikarhi ka vona ivi va va vutisisa va ku: “Xana leswi mi swi endle hi matimba ya mani kumbe hi vito ra mani?”
8 Kutani Petro a tala moya lowo kwetsima+ a ku eka vona:
“Vafumi ni vakulukumba,
9 loko namuntlha hi tengisiwa hikwalaho ka leswi hi nga va ni musa eka munhu loyi a lamaleke+ naswona mi lava ni ku tiva leswaku i mani loyi a n’wi hanyiseke,
10 swi tiveni n’wina hinkwenu ni vanhu hinkwavo va Israyele leswaku munhu loyi a yimeke laha emahlweni ka n’wina u hanyisiwe hi vito ra Yesu Kreste wa Munazareta,+ loyi mi n’wi dlayeke emhandzini+ kambe Xikwembu xi n’wi pfuxeke eka lava feke.+
11 Leri i ‘ribye leri n’wina vaaki mi ri tekeke ri ri leri nga pfuniki nchumu leri veke ribye ra nkoka swinene.’*+
12 Nakambe a ku na loyi a nga ta hi ponisa handle ka yena hikuva ku hava vito rin’wana+ ehansi ka tilo leri nyikiweke vanhu leri hi faneleke ku ponisiwa ha rona.”+
13 Loko va vona xivindzi lexi Petro na Yohane a va ri na xona ni ku xiya leswaku a va nga dyondzekanga* kambe a va ri vanhu lava tolovelekeke,+ va hlamala. Hiloko va sungula ku tsundzuka leswaku a va tshama va ri na Yesu.+
14 Loko va vona ni munhu loyi a hanyisiweke a yime na vona,+ a va ha kotanga ku va hlamula.+
15 Hiloko va va lerisa leswaku va huma eholweni ya Sanedri, loko va humile va sungula ku kanerisana,
16 va ku: “Hi fanele hi endla yini hi vavanuna lava?+ Hikuva va endle singita leri nga erivaleni, leri tiviwaka hi vaaki hinkwavo va Yerusalema,+ naswona a hi nge ri landzuli.
17 Leswaku mhaka leyi yi nga hangalaki yi tiviwa hi vanhu vo tala, a hi va chaviseni hi va byela leswaku va nga ha vulavuli ni vanhu hi vito leri.”+
18 Hiloko va va vitana kutani va va lerisa leswaku va nga ha tshuki va vulavule ni vanhu kumbe ku va dyondzisa hi vito ra Yesu.
19 Kambe Petro na Yohane va ku eka vona: “Loko mi vona swi fanerile emahlweni ka Xikwembu ku yingisa n’wina ku ri na xona, avanyisani hi n’wexe.
20 Kambe loko ku ri hina, a hi nge tshiki ku vulavula hi swilo leswi hi swi voneke ni leswi hi swi tweke.”+
21 Endzhaku ka loko va tlhele va va chavisa, va va tshunxile hikuva a va kumanga xivangelo xo va xupula ni hikwalaho ka leswi a va chava vanhu+ hikuva hinkwavo a va dzunisa Xikwembu hikwalaho ka leswi swi humeleleke.
22 Munhu loyi a horisiweke hi singita a a ri ni malembe yo tlula 40.
23 Loko va tshunxiwile va ya eka vadyondzisiwa lavan’wana va fika va va byela leswi vaprista lavakulu ni vakulukumba va va byeleke swona.
24 Loko va twa sweswo va khongela Xikwembu va ku:
“Hosi Leyi Tlakukeke, hi Wena la endleke tilo ni misava ni lwandle ni swilo hinkwaswo leswi nga eka swona+
25 ni loyi hi moya lowo kwetsima a vulavuleke hi ku tirhisa kokwa wa hina Davhida+ nandza wa wena a ku: ‘Hikwalaho ka yini matiko ma hlundzukile ni vanhu va anakanyisisa hi swilo leswi nga pfuniki nchumu?
26 Tihosi ta misava ti lunghekile ni vafumi va hlengeletanile va yima swin’we ku lwa na Yehovha* ni muhlawuriwa*+ wakwe.’
27 Hikuva Heroda na Pontiyo Pilato+ ni vanhu va matiko ni vanhu va Israyele a va hlengeletanile emutini lowu va lwa na Yesu nandza wa wena wo kwetsima, loyi u n’wi hlawuleke,+
28 leswaku va endla leswi u swi boheke ka ha ri emahlweni hi voko ra wena ni leswi nga xikongomelo xa wena.+
29 Yehovha,* xiyisisa minxungeto ya vona, u endla leswaku malandza ya wena ma ya emahlweni ma vulavula rito ra wena hi vurhena lebyikulu,
30 u ri karhi u tlakusa voko ra wena leswaku u horisa, u endla masingita ni swihlamariso+ hi vito ra nandza wa wena wo kwetsima Yesu.”+
31 Loko va heta ku khongela hi mbilu ya vona hinkwayo, ndhawu leyi a va hlengeletane eka yona yi sungula ku tsekatseka kutani hinkwavo va tala moya lowo kwetsima+ va vula rito ra Xikwembu hi vurhena.+
32 Ku tlula kwalaho, ntlawa wa vapfumeri a wu ri ni vun’we, a ku nga ri na loyi a a vula leswaku leswi a nga na swona i swa yena, a va avelana hinkwaswo leswi a va ri na swona.+
33 Vaapostola va ya emahlweni va nyikela vumbhoni bya ku pfuxiwa ka Hosi Yesu eku feni+ hi ndlela ya matimba naswona Xikwembu xi va katekisa swinene.
34 Kahlekahle, a ku na loyi a a pfumala exikarhi ka vona,+ hikuva hinkwavo lava a va ri ni masimu kumbe tiyindlu a va swi xavisa va tisa mali ya kona,
35 va fika va yi nyika vaapostola.+ Kutani yi averiwa un’wana ni un’wana, hi ku ya hi leswi a swi pfumalaka.+
36 Yosefa, loyi vaapostola a va n’wi vitana Barnaba+ (leri loko ri hundzuluxeriwa ri vulaka, “N’wana wa Nchavelelo”), Mulevhi la humaka eKipra,
37 a a ri ni nsimu kutani a yi xavisa a yisa mali ya kona eka vaapostola.+
Tinhlamuselo ta le hansi
^ Hi Xigriki, “hi rona ri veke ra nkoka ekhonweni.”
^ Leswi vulaka leswaku a va nga yanga exikolweni xa varhabi.
^ Vona Xiengetelo A5.
^ Kumbe “Kreste.”
^ Vona Xiengetelo A5.
