Luka 3:1-38
3 Hi lembe ra vu-15 ra ku fuma ka Tiberiyo Khezari, loko Pontiyo Pilato a ri ndhunankulu ya le Yudiya, Heroda*+ a ri ndhuna ya muganga wa Galeliya, Filipi makwavo a ri ndhuna ya muganga wa tiko ra Ituriya na Trakonita naswona Lisaniya a ri ndhuna ya muganga wa Abilene,
2 emasikwini ya muprista lonkulu Anasi na Kayafasi,+ Xikwembu xi vulavule na Yohane+ n’wana wa Zakariya emananga.+
3 Kutani a ya etikweni hinkwaro ekusuhi na Yordani, a chumayela vanhu leswaku va hundzuka va khuvuriwa leswaku va ta rivaleriwa swidyoho,+
4 hilaha swi tsariweke hakona ebukwini ya muprofeta Esaya loko a ku: “Rito ra loyi a huwelelaka emananga ri ri: ‘Lunghisani ndlela ya Yehovha!* Basisani tindlela takwe.+
5 Minkova hinkwayo yi fanele yi seleteriwa, tintshava hinkwato ni swintshabyana swi levheriwa; tindlela leti gombonyokeke ti fanele ti ololoka, tindlela leti nga ni swigodi ti lunghisiwa;
6 kutani vanhu hinkwavo va ta vona ndlela leyi Xikwembu xi ponisaka ha yona.’”+
7 Hiloko a byela mintshungu leyi a yi ya eka yena leswaku yi ta khuvuriwa a ku: “N’wina vana va timhiri,* i mani la nga mi lemukisa leswaku mi balekela vukarhi bya siku ra Xikwembu?+
8 Hikwalaho, mitirho ya n’wina a yi kombise leswaku mi hundzukile. Mi nga tibyeli mi ku, ‘Tata wa hina i Abrahama.’ Ndza mi byela, Xikwembu xi nga vumbela Abrahama vana hi maribye lawa.
9 Hakunene xihloka se xi lunghekele ku tsema timitsu ta mirhi. Kutani murhi wun’wana ni wun’wana lowu nga humesiki mihandzu leyinene wu ta tsemiwa wu hoxiwa endzilweni.”+
10 Kutani mitshungu yi n’wi vutisa yi ku: “Hi fanele hi endla yini?”
11 A yi hlamula a ku: “Loyi a nga ni tinguvu timbirhi a a nyike loyi a nga riki na nchumu, ni loyi a nga ni swakudya a a nyike loyi a nga riki na swona.”+
12 Ni valuvisi* va tile va ta khuvuriwa,+ kutani va ku eka yena: “Mudyondzisi, hi fanele hi endla yini?”
13 A ku eka vona: “Mi nga hakerisi vanhu xibalo xo tlula mpimo lowu vekiweke.”+
14 Masocha na wona ma n’wi vutisa ma ku: “Hi fanele hi endla yini?” Kutani a ku eka wona: “Mi nga karhati munhu kumbe ku hehla hambi ku ri mani hi mavunwa,+ kambe mi eneriseka hi leswi mi nyikiwaka swona.”*
15 Leswi vanhu a va langutele Kreste, loko va vona Yohane va tivutisa va ku, “Xana a nga va a ri Kreste?”+
16 Yohane a va hlamula a ku: “Mina ndzi mi khuvula hi mati, kambe wa ta loyi a ndzi tlulaka hi matimba naswona a ndzi faneleki ku tshunxa tintambhu ta maphaxani yakwe.+ U ta mi khuvula hi moya lowo kwetsima ni hi ndzilo.+
17 U khome rihlelo rakwe ro peperha leswaku a basisa xivuya* xakwe hinkwaxo ni ku hlengeleta koroni exitlatini xakwe, kambe muhungu* u ta wu hisa hi ndzilo lowu nga timekiki.”
18 A tlhela a va khutaza hi tindlela to tala ni ku ya emahlweni a chumayela vanhu mahungu lamanene.
19 Kambe hikwalaho ka leswi Heroda ndhuna ya muganga a tshinyiweke hi Yohane mayelana na Herodiya nsati wa makwavo ni hikwalaho ka swiendlo swo homboloka leswi a swi endleke,
20 Heroda u lo tlhela a endla mhaka yin’wana yo biha: A pfalela Yohane ekhotsweni.+
21 Kutani loko vanhu hinkwavo va khuvuriwa, Yesu na yena a khuvuriwa.+ Loko a ri karhi a khongela, hiloko matilo ma pfuleka,+
22 moya lowo kwetsima wu xikela ehenhla ka yena ku fana ni tuva, hiloko ku twala rito ri huma etilweni ri ku: “U N’wana wa mina loyi ndzi n’wi rhandzaka; ndzi ku amukerile.”+
23 Loko Yesu+ a sungula ntirho wakwe a a ri ni malembe ya kwalomu ka 30,+ naswona hilaha a a tiviwa hakona, a a ri n’wanawa Yosefa,+n’wana wa Heli,
24 n’wana wa Matati,n’wana wa Levhi,n’wana wa Melki,n’wana wa Yanayi,n’wana wa Yosefa,
25 n’wana wa Matatiyasi,n’wana wa Amosi,n’wana wa Nahume,n’wana wa Esli,n’wana wa Nagayi,
26 n’wana wa Mate,n’wana wa Matatiyasi,n’wana wa Semeyini,n’wana wa Yoseke,n’wana wa Yoda,
27 n’wana wa Yowanani,n’wana wa Resa,n’wana wa Zerubabele,+n’wana wa Salatiyele,+n’wana wa Neri,
28 n’wana wa Melki,n’wana wa Adi,n’wana wa Kosama,n’wana wa Elmadema,n’wana wa Ere,
29 n’wana wa Yesu,n’wana wa Eliyezere,n’wana wa Yorimi,n’wana wa Matati,n’wana wa Levhi,
30 n’wana wa Samiyoni,n’wana wa Yudasi,n’wana wa Yosefa,n’wana wa Yonama,n’wana wa Eliyakimi,
31 n’wana wa Meleya,n’wana wa Mena,n’wana wa Matata,n’wana wa Nathani,+n’wana wa Davhida,+
32 n’wana wa Yese,+n’wana wa Obede,+n’wana wa Bowazi,+n’wana wa Salmoni,+n’wana wa Nasoni,+
33 n’wana wa Aminadaba,n’wana wa Arni,n’wana wa Hezroni,n’wana wa Faresi,+n’wana wa Yuda,+
34 n’wana wa Yakobo,+n’wana wa Isaka,+n’wana wa Abrahama,+n’wana wa Tera,+n’wana wa Nakori,+
35 n’wana wa Seruki,+n’wana wa Ragawu,+n’wana wa Faleke,+n’wana wa Ebere,+n’wana wa Xela,+
36 n’wana wa Kayinama,n’wana wa Arifakisada,+n’wana wa Xeme,+n’wana wa Nowa,+n’wana wa Lameke,+
37 n’wana wa Metusela,+n’wana wa Enoko,n’wana wa Yarete,+n’wana wa Mahalalele,+n’wana wa Kayinama,+
38 n’wana wa Enosi,+n’wana wa Seta,+n’wana wa Adamu,+n’wana wa Xikwembu.
Tinhlamuselo ta le hansi
^ Ku nga Heroda Antipasi. Vona Tinhlamuselo.
^ Vona Xiengetelo A5.
^ Ku nga muxaka wo karhi wa tinyoka.
^ Ku nga lava tirhaka ku hakerisa xibalo.
^ Kumbe “hi muholo wa n’wina.”
^ Ku nga ndhawu leyi ku peperhiwaka mavele.
^ Kumbe “vudyangwana.”
