Vakorinto Wa Vumbirhi 8:1-24
8 Vamakwerhu, sweswi hi lava leswaku mi tiva hi ta musa lowukulu wa Xikwembu, lowu nyikiweke mavandlha ya le Makedoniya.+
2 Hi nkarhi wa ndzingo lowukulu loko va xaniseka, va nyikele va tsakile swinene hambileswi va nga evusiwaneni lebyikulu. Leswi swi kombise leswaku va hanana swinene.
3 Va nyikele hi swilo leswi a va ri na swona ni ku tlula.+ Mina ndzi mbhoni ya swona,+
4 hikuva hi vona a va tshamela ku hi kombela leswaku hi va pfumelela ku hoxa xandla entirhweni wo phalala vakwetsimi.+
5 Va endle swo tala ku tlula leswi a hi swi languterile, va sungule hi ku tirhela Hosi ni ku tirhela hina hi ku ya hi ku rhandza ka Xikwembu.
6 Kutani hi khutaze Tito+ leswaku leswi ku nga yena a sunguleke ntirho lowu exikarhi ka n’wina, u fanele a hetisa ku hlengeleta tinyiko ta n’wina ta musa.
7 Nilokoswiritano, leswi mi fuweke eka swilo hinkwaswo swo tanihi ripfumelo, vuswikoti byo vulavula, vutivi, ku tinyiketela naswona mi rhandzaka vanhu swinene hilaha hi mi rhandzaka hakona, onge mi nga tikarhatela ni ku va ni malwandla.+
8 Ndzi vula leswi, ku nga ri ku mi lerisa kambe ku endlela leswaku mi xiya ku tinyiketela ka vanhu van’wana ni ku vona loko rirhandzu ra n’wina ri ri ra ntiyiso.
9 Hikuva ma wu tiva musa lowukulu wa Hosi ya hina Yesu Kreste, leswaku hambileswi a a fuwile, u ve xisiwana hikwalaho ka n’wina+ leswaku mi va lava fuweke hikwalaho ka vusiwana byakwe.
10 Vonelo ra mina emhakeni leyi hi leri:+ Leswi swi pfuna n’wina, hi ku vona leswaku lembe leri hundzeke a mi sungulanga ku hlengeleta ntsena kambe mi tlhele mi kombisa leswaku ma swi lava ku swi endla.
11 Hikwalaho hetisani leswi mi swi sunguleke. Kutani leswi mi nyikelaka ha swona hi ku ya hi leswi mi nga swi kotaka swi ta kombisa leswaku mi lava ku nyika.
12 Hikuva loko mi lava ku nyika, swa amukeleka, hi ku ya hi leswi munhu a nga na swona,+ ku nga ri leswi a nga riki na swona.
13 Hikuva a ndzi lavi leswaku van’wana swi va olovela kambe n’wina swi mi tikela;
14 kambe leswaku ku va ni ku ringana, leswi nga mi talela sweswi swi siva leswi va swi pfumalaka leswaku ni leswi swi va taleleke swi ta siva leswi mi swi pfumalaka, leswaku ku va ni ku ringana.
15 Hilaha ku tsariweke hakona: “Munhu loyi a a ri ni swilo swo tala a nga kumanga swo tala ngopfu ni loyi a a ri ni leswitsongo a nga kumanga leswitsongo ngopfu.”+
16 Kutani a ku khensiwe Xikwembu hileswi Tito a karhatekaka ha n’wina ku fana na hina,+
17 hikuva u amukele xikhutazo kambe hikwalaho ko hisekela ku pfuna u ta eka n’wina hi ku swi rhandza.
18 Kambe hi n’wi rhumela swin’we ni makwerhu loyi a tiviwaka emavandlheni hinkwawo hi ku chumayela mahungu lamanene.
19 Ku nga ri sweswo ntsena, kambe u tlhele a hlawuriwa hi mavandlha leswaku a famba na hina kutani a hi pfuna loko hi fambisa nyiko leyi ya musa leswaku ku dzunisiwa Hosi ni ku kombisa leswaku hi lava ku pfuna van’wana hi mbilu hinkwayo.
20 Kutani hi endla leswaku ku nga vi na munhu loyi a kumaka xihoxo eka hina hi munyikelo lowu, lowu hi wu fambisaka.+
21 Hikuva hi ‘tiyimisele ku endla swilo hinkwaswo hi ku tshembeka, ku nga ri emahlweni ka Yehovha* ntsena kambe ni le mahlweni ka vanhu.’+
22 Ku tlula kwalaho, hi va rhumela ni makwerhu loyi a kamberiweke ko hlayanyana naswona ku kumiweke leswaku wa tiyimisela eka swilo swo tala, kambe sweswi u tiyimisela ngopfu hikwalaho ka leswi a mi tshembaka.
23 Kambe, loko ku ri ni xivutiso xo karhi hi Tito, i munghana wa mina naswona ndzi tirha na yena leswaku mi vuyeriwa; kumbe loko ku ri ni swivutiso hi vamakwerhu van’wana, i vaapostola va mavandlha ni ku vangama ka Kreste.
24 Hikwalaho, kombisani vamakwerhu lava leswaku ma va rhandza swinene,+ mi tlhela mi kombisa ni mavandlha leswaku hikwalaho ka yini hi tibumile ha n’wina.
Tinhlamuselo ta le hansi
^ Vona Xiengetelo A5.
