Petro Wa Vumbirhi 2:1-25
2 Hikwalaho cukumetani vubihi hinkwabyo+ ni vuxisi ni vukanganyisi ni mavondzo ni ku tlhavana hi marito hinkwako.
2 Ku fana ni tincece leta ha ku velekiwaka,+ tikarhateleni ku navela ntswamba wa rito lowu nga pfanganisiwangiki na nchumu, leswaku ha wona mi kula mi ta ponisiwa,+
3 ntsena loko mi swi vonile* leswaku Hosi yi ni musa.
4 Loko mi ta eka yona, ribye leri hanyaka leri ariweke hi vanhu,+ kambe leri hlawuriweke hi Xikwembu ri ri ra risima eka xona,+
5 n’wina mi nga maribye lama hanyaka ma karhi ma akiwa, mi va yindlu ya moya+ leswaku mi va vaprista vo kwetsima, leswaku mi nyikela magandzelo ya moya+ lama amukelekaka eka Xikwembu ha Yesu Kreste.+
6 Hikuva Tsalwa ri ri: “Vonani! Ndzi veka ribye leri hlawuriweke eSiyoni, ribye ra masungulo ra le khonweni leri nga ra risima naswona loyi a pfumelaka eka rona a nge khomisiwi tingana.”+
7 Hikwalaho, i wa risima eka n’wina hikuva mi vapfumeri; kambe eka lava va nga pfumeriki, “ribye leri vaaki va nga ri nyenya,+ hi rona ri veke ribye ra nkoka swinene”*+
8 ni “ribye ra xikhunguvanyiso ni ribye ro khudlunya.”+ Va khunguvanyeka hikuva a va ri yingisi rito. Vanhu vo tano va ta humeleriwa hi sweswo.
9 Kambe n’wina mi “rixaka leri hlawuriweke, vaprista va le vuhosini, tiko ro kwetsima,+ tiko leri ri nga hlawuriwa ku va ra Xikwembu,+ leswaku mi ta chumayela etindhawini hinkwato hi mitirho yo hlamarisa”+ ya Loyi a mi vitaneke mi huma emunyameni mi nghena eku vonakaleni kakwe loku hlamarisaka.+
10 Hikuva khale a mi nga ri tiko, kambe sweswi mi tiko ra Xikwembu;+ khale a mi nga khomiwi hi musa, kambe sweswi mi kombiwe musa.+
11 Varhandziwa, ndza mi kombela leswi mi nga valuveri ni vatshami va nkarhinyana+ leswaku mi papalata ku navela ka nyama,+ loku ku lwaka na n’wina.+
12 Hanyani hi ndlela leyinene exikarhi ka vanhu va matiko,+ leswaku loko va mi lumbeta va ku mi vadyohi, va ta vona mitirho ya n’wina leyinene+ kutani va dzunisa Xikwembu hi siku ra xona ra ku kambela.
13 Hikwalaho ka Hosi, tivekeni ehansi ka vulawuri hinkwabyo bya vanhu,+ hambi ku ri eka hosi+ tanihi leswi yi tlakukeke
14 kumbe eka tindhuna leti rhumiweke hi yona leswaku ti xupula lava endlaka leswo biha kambe ti dzunisa lava endlaka leswinene.+
15 Hikuva Xikwembu xi lava leswaku hi mitirho ya n’wina leyinene, mi pfala milomu ya lava mi hehlaka hi leswi va nga tiviki nchumu.+
16 Vanani vanhu lava tshunxekeke,+ mi tirhisa ntshunxeko wa n’wina tanihi malandza ya Xikwembu,+ mi nga wu endli xisirhelelo xa leswo biha.+
17 Xiximani vanhu va mixaka hinkwayo,+ rhandzani vamakwerhu hinkwavo,+ chavani Xikwembu,+ mi xixima hosi.+
18 Malandza a ma tiveke ehansi ka vini va wona hi xichavo lexi faneleke,+ ku nga ri ntsena eka lava nga vanene ni lava anakanyelaka, kambe ni le ka lava swi tikaka ku va tsakisa.
19 Hikuva swa amukeleka loko munhu a tiyisela maxangu ni loko a xanisiwa a nga ri na nandzu hikwalaho ka ripfalo rakwe eka Xikwembu.+
20 Xana swi pfuna yini loko mi biwa hi leswi mi nga dyoha kutani mi tiyisela?+ Kambe loko mi xaniseriwa ku endla leswinene kutani mi tiyisela, sweswo swa amukeleka eka Xikwembu.+
21 Kahlekahle mi vitaneriwe sweswo, hikuva hambi Kreste u xanisekile hikwalaho ka n’wina,+ a mi vekela xikombiso leswaku mi ta landzelerisisa mikondzo yakwe.+
22 A nga xi endlanga xidyoho+ hambi ku ri vukanganyisi a byi kumekanga enon’wini wakwe.+
23 Loko a rhukaniwa+ a nga tlheriselanga.+ Loko a xanisiwa,+ a nga xungetanga kambe u tshembe Loyi a avanyisaka+ hi ndlela yo lulama.
24 Yena hi byakwe u rhwale swidyoho swa hina+ emirini wakwe emhandzini,*+ leswaku hi ta fa hi tlhelo ra ku dyoha kutani hi hanyela ku lulama. Naswona “mi horisiwile hi timbanga takwe.”+
25 Hikuva a mi fana ni tinyimpfu leti lahlekeke+ kambe sweswi mi tlhelele eka murisi+ ni mulanguteri wa vutomi bya n’wina.
Tinhlamuselo ta le hansi
^ Hi Xigriki, “nantswile.”
^ Hi Xigriki, “hi rona ri veke ra nkoka ekhonweni.”
^ Kumbe “ensinyeni.”
