Sapos papamama i gat pasin laikim na ol i rispektim ol narapela, dispela bai helpim pikinini long taim em i wok long i go bikpela. (Kolosi 3:14, 19) Ol gutpela papamama bai laikim ol pikinini na mekim ol gutpela tok long ol, olsem God Jehova i mekim long Pikinini bilong em.—Ritim Matyu 3:17.

Papa bilong yumi long heven i save harim beten bilong ol wokman bilong em, na em i save pilim tingting bilong ol. Ol papamama i ken bihainim pasin bilong God na putim yau long ol pikinini bilong ol. (Jems 1:19) Ol i mas putim yau taim pikinini i kamapim tingting bilong em, maski sampela taim tok bilong em i kranki.—Ritim Namba 11:11, 15.

Ol papamama i gat wok long putim ol lo. (Efesus 6:1) God i stap gutpela piksa em ol papamama i ken bihainim. Em i soim pasin laikim long ol pikinini bilong em taim em i tokaut klia long ol lo em i putim na strafe ol bai kisim sapos ol i sakim tok. (Stat 3:3) Tasol em i no fosim ol man long bihainim tok, nogat. Em i skulim ol long olsem wanem pasin bilong bihainim ol lo inap helpim ol.—Ritim Aisaia 48:18, 19.

Putim mak long skulim ol pikinini long laikim God, na maski ol yet i stap, ol bai bihainim savepasin. God i stap gutpela piksa long ol man i ken bihainim pasin bilong em, olsem tasol yu inap helpim pikinini long laikim God sapos yu yet i stap gutpela piksa.—Ritim Lo 6:5-7; Efesus 4:32; 5:1.