Taim Jehova i kamapim famili, em i makim papamama long lukautim ol pikinini. (Kolosi 3:20) Yutupela i stap olsem papamama, olsem na em wok bilong yutupela long trenim pikinini long laikim Jehova na long kamap man o meri bilong mekim gut wok. (2 Timoti 1:5; 3:15) Na tu, yutupela i mas save long tingting i stap long bel bilong pikinini. Em i bikpela samting long yutupela i mas stap gutpela piksa. Yutupela inap skulim gut pikinini long Tok Bilong Jehova sapos yutupela i putim tok i go daun long bel bilong yutupela yet.—Song 40:8.

BAIBEL I TOK: “Olgeta man i mas putim yau kwik long harim tok, na ol i no ken hariap long mekim toktok.” (Jems 1:19) Yutupela i laik bai ol pikinini i no pret long toktok wantaim yutupela. Ol pikinini i mas save olsem yutupela i redi long putim yau taim ol i laik toktok. Kamapim bel isi insait long famili na bai ol pikinini i no pret long kamapim tingting bilong ol. (Jems 3:18) Sapos ol i ting olsem yutupela bai mekim hatpela pasin o skelim ol, ating ol bai pret long toktok wantaim yutupela. Mekim pasin isi long ol pikinini, na oltaim tokim ol olsem yutupela i laikim ol.—Matyu 3:17; 1 Korin 8:1.

SAMTING YU KEN MEKIM:

• Taim ol pikinini i laik toktok, yutupela i mas redi long putim yau

• Toktok wantaim ol pikinini long olgeta taim, na i no long taim bilong hevi tasol

BAIBEL I TOK: “Sapos man i putim yau gut long tok bilong ol man i skulim em, orait em bai i gat gutpela sindaun.” (Sindaun 16:20) Sapos yutupela i laik kliagut long tingting tru i stap long bel bilong ol pikinini, orait no ken tingting tasol long toktok bilong ol. Planti yangpela i save bilasim tok bilong ol o mekim ol tok ol i no min long mekim. “Putim gut yau pastaim, na bihain yu ken bekim tok. Sapos yu no mekim olsem, orait yu mekim longlong pasin.” (Sindaun 18:13) No ken hariap long kros.—Sindaun 19:11.

SAMTING YU KEN MEKIM:

• Maski pikinini i mekim wanem tok, no ken katim tok o kirap kwik long kros

• Traim long tingim hau yutupela i bin pilim taim yutupela i gat wankain krismas olsem ol, na wanem samting em i bikpela samting long yutupela

BAIBEL I TOK: “Pikinini, yu mas harim tok bilong papamama bilong yu na yu no ken sakim tok bilong tupela.” (Sindaun 1:8) Jehova i givim namba long papa na mama wantaim long lukautim pikinini. Yutupela i mas skulim ol pikinini long rispektim na bihainim tok bilong yutupela. (Efesus 6:1-3) Ol pikinini inap luksave sapos papamama i no “wanbel tru long holim wankain tingting na wankain laik.” (1 Korin 1:10) Sapos yutupela i no wanbel, orait no ken kros long ai bilong ol pikinini bikos dispela inap mekim na ol i no inap rispektim yutupela.

SAMTING YU KEN MEKIM:

• Toktok wantaim na wanbel long olsem wanem yutupela bai stretim pikinini

• Sapos yu na poroman marit i gat narapela narapela tingting, orait traim long pilim tingting bilong poroman marit

BAIBEL I TOK: “Skulim pikinini bilong yu long bihainim gutpela pasin.” (Sindaun 22:6) Sapos yutupela i laik skulim gut pikinini, orait yutupela i mas toktok wantaim long olsem wanem yutupela bai skulim em, na dispela i makim tu olsem yutupela i mas stretim pikinini. (Song 127:4; Sindaun 29:17) Pasin bilong stretim pikinini i no makim olsem yutupela i givim panismen tasol, nogat, yutupela i mas helpim ol pikinini long kliagut long risen bilong ol lo yutupela i putim. (Sindaun 28:7) Na tu, skulim pikinini long laikim Tok Bilong Jehova na luksave long ol stiatok bilong en. (Song 1:2) Dispela bai helpim em long skulim gut maus bilong bel.—Hibru 5:14.

SAMTING YU KEN MEKIM:

• Skulim ol pikinini long tingim God olsem Man i stap tru na ol inap trastim em

• Helpim ol long luksave na abrusim ol samting we inap bagarapim pasin bilong ol, kain olsem ol samting i stap long Intenet na sosel netwok. Skulim ol long olsem wanem ol inap abrusim ol man nogut bilong mekim pasin sem