Sapos i gat risen long bilip olsem pen na hevi bai pinis, kain hop inap helpim yumi long holim stretpela tingting long laip na tingting bilong yumi long God.

Planti man i laik pinisim pen na hevi, tasol ol i no gat strong long mekim olsem. Skelim dispela:

Maski save bilong marasin i go bikpela . . .

• Sik bilong hat i stap yet olsem nambawan samting i save kilim man.

• Sik kensa i save kilim planti milion man long olgeta yia.

• Long nius Frontiers in Immunology, man i raitim em Saveman David Bloom i tok: “Long olgeta hap bilong graun, ol man i pret long ol sik i stap longpela taim, ol nupela sik, na ol sik bilong bipo i save kalap long narapela i wok long kamap gen.”

Maski sampela kantri i gat planti mani . . .

• Long olgeta yia, planti milion pikinini i dai, na planti taim dispela i save painim ol pikinini i stap long ol ples we ol man i stap rabis.

• Planti bilion manmeri i no gat gutpela toilet.

• Planti handret milion manmeri i no gat rot bilong kisim gutpela wara.

Maski planti man i save long pasin ol i mas mekim long narapela . . .

• Ripot bilong Yunaitet Nesen i stori olsem, wok bisnis bilong salim ol man i stap yet long planti hap, na ol kantri we i no kotim ol man i mekim dispela pasin, “ai bilong ol i pas na ol i no lukim dispela hevi, o ol i no gat ol samting bilong stretim dispela hevi.”

  KISIM SAMPELA SAVE MOA

  Lukim vidio Kingdom Bilong God Em i Wanem Samting? long jw.org/tpi.

God i save tingim yumi.

Em i save tingim ol pen na hevi bilong yumi.

“[God] i no save givim baksait long man i karim hevi; em i no save haitim pes bilong em long man i karim hevi. Taim dispela man i singaut long kisim helpim em i save harim singaut bilong em.”—BUK SONG 22:24.

“God i save wari long yupela, olsem na yupela i mas putim olgeta hevi bilong yupela long han bilong em.”—1 PITA 5:7.

Pen na hevi bai i no inap stap oltaim.

Baibel i tok promis olsem samting God i tingting pinis long mekim long yumi bai kamap tru.

“God . . . bai mekim drai aiwara i stap long ai bilong ol, na bai i no gat dai moa, na ol bai i no bel hevi moa na krai moa, na ol bai i no inap pilim pen gen.”—REVELESEN 21:3, 4.

God bai pinisim ol samting i kamapim pen na hevi long ol man.

Em bai mekim olsem long rot bilong Kingdom bilong em, na Baibel i kolim olsem wanpela gavman tru.

“God bilong heven bai kamapim wanpela kingdom we i no inap bagarap. Na dispela kingdom i no inap go long han bilong ol narapela manmeri. . . . Em wanpela tasol bai stap oltaim oltaim.”—DANIEL 2:44.