4 God i Wokim Yumi Bilong Karim Pen na Hevi?
Wai na Em i Bikpela Samting
Bekim bilong dispela askim bai stiaim tingting yumi gat long laip.
Tingim
Yu ting i stret long tok God husat i wokim ol naispela samting long graun inap larim yumi karim pen na hevi?
Ol man i no gat lotu i tingim pen na hevi i olsem risen long ol i kisim tupela tingting long God. Ol i ting olsem pen na hevi i soim olsem (1) God i no gat strong long stopim, (2) God i no laik stopim, o (3) God i no stap.
Yu ting ol dispela risen tasol i as na ol man i karim pen na hevi?
KISIM SAMPELA SAVE MOA
Lukim vidio Olsem Wanem Yumi Inap Save Olsem Tok Bilong Baibel i Tru? long jw.org/tpi.
Baibel i Tok
God i no wokim yumi bilong karim pen na hevi.
Em i laik bai yumi stap amamas.
“I no gat wanpela gutpela samting ol manmeri inap mekim, mobeta ol i amamas na mekim ol gutpela samting long taim ol i stap laip yet, na tu, olgeta man i mas kaikai na dring na kisim amamas long olgeta wok ol i taitim bun long mekim. Dispela em presen i kam long God.”—EKLISIASTIS 3:12, 13.
God i givim olgeta samting em tupela fes man na meri i nidim bilong i stap laip.
Em i no laik bai ol—o ol tumbuna pikinini bilong ol—i karim pen na hevi.
“God i tokim ol: ‘Kamapim ol pikinini na kamap planti na go sindaun long olgeta hap bilong graun na bosim olgeta samting i stap long en.’”—STAT 1:28.
Tupela fes man na meri i no laik bai God i bosim ol.
Long dispela rot, ol i kamapim pen na hevi long ol yet na ol tumbuna pikinini bilong ol.
“Long rot bilong wanpela man tasol sin i kamap long graun. Na sin i bringim dai i kam. Na long dispela rot dai i painim olgeta manmeri, long wanem, olgeta i bin mekim sin.”—ROM 5:12. *
God i no wokim yumi long bosim yumi yet.
Em i no wokim yumi long bosim yumi yet, wankain olsem yumi no inap stap aninit long wara.
“Man i no gat rait long stiaim wokabaut bilong em yet.”—JEREMAIA 10:23.
God i no laik bai yumi karim pen na hevi.
Em i laik bai yumi mekim ol samting bilong abrusim ol hevi.
“Sapos yupela i putim gut yau long ol lo bilong mi, orait bel isi bilong yupela bai kamap olsem wara i save ron.”—AISAIA 48:18.
^ par. 17 Long Baibel, dispela tok “sin” i no makim tasol pasin nogut, nogat, em i makim tu samting olgeta man i bin kisim.