Taim tupela marit i gat pasin bilong wok bung, maritman na maritmeri i olsem namba 1 pailot na namba 2 pailot em ol i gat wankain plen long flaim balus. Long taim bilong hevi ol bai holim tingting olsem, samting mipela inap mekim na i no samting mi inap mekim.

STIATOK BILONG BAIBEL: “Tupela i no stap olsem tupela moa, ol i kamap wanpela bodi tasol.”—Matyu 19:6.

“Marit i gat tupela lain i insait long en. Maritman na maritmeri i mas wok gut wantaim bambai marit inap stap gut.—Christopher.

Taim kros i kamap, maritman na maritmeri husat i no wok bung wantaim bai sutim tok long narapela narapela na ol i no tingting long stretim hevi. Ol liklik hevi bai kamap olsem bikpela hevi.

“Pasin bilong wok bung wantaim i mas i stap insait long marit. Sapos mi na man bilong mi i no wok bung wantaim, mipela bai stap olsem ol rumeit na i no tupela marit—tupela lain i stap wantaim tasol ol i gat narapela narapela tingting long taim bilong mekim ol bikpela disisen.—Alexandra.

ASKIM YU YET

• Mi tingim mani mi kisim olsem olgeta i bilong mi yet?

• Bilong malolo gut, mi mas i stap longwe long poroman bilong mi?

• Mi save stap longwe long ol wanblut bilong poroman bilong mi, maski em i save pas gut wantaim ol?

TOKTOK WANTAIM POROMAN MARIT

• Wanem sampela samting long marit em mipela i save wok bung wantaim na mekim?

• Mipela inap wok strong long kamap gutpela moa long wanem ol samting?

• Mipela inap bihainim wanem ol rot bambai pasin bilong wok bung wantaim i kamap gutpela moa?

SAMPELA ROT

• Tingim wanpela tenis gem we yutupela i stap long narapela narapela sait bilong tenis kot. Yu inap mekim wanem bambai yutupela wantaim i stap long seim tim?

• No ken holim tingting olsem, ‘Hau bai mi win? holim tingting olsem ‘Hau bai mitupela i win?’

“No ken tingting long skelim husat i popaia na husat i no popaia. Em i bikpela samting long pasin wanbel na bel isi i mas i stap insait long famili.”—Ethan.

STIATOK BILONG BAIBEL: “Yupela i no ken tingim ol samting bilong yupela yet tasol, nogat. Yupela i mas tingim tu ol samting bilong ol arapela.”—Filipai 2:3, 4.