Taim bebi i bon, tupela marit inap amamas tru na pilim olsem ol i gat bikpela wok. Sapos yupela i nupela papamama, ating yupela bai kirap nogut olsem yupela bai lusim bikpela haptaim na strong bilong yupela long lukautim bebi. Yupela i no inap slip gut, yupela bai kisim kain kain tingting na filings, na dispela inap putim presa long marit bilong yupela. Yu na poroman marit i mas senisim pasin na bai yupela inap lukautim bebi na strongim marit. Hau bai ol skultok bilong Baibel i helpim yupela?

BAIBEL I TOK: “Man i gat pasin laikim em i no save les kwik, na em i save mekim gutpela pasin.” Na tu, “em i no save tingim em yet, na em i no save belhat kwik.” (1 Korin 13:4, 5) Sapos yu nupela mama, yu bai lusim bikpela haptaim long lukautim bebi. Tasol man bilong yu inap pilim olsem yu no tingim em, olsem na yu mas tingim em tu. Yu mas bihainim pasin isi na helpim em long pilim olsem yu nidim em na em tu inap lukautim bebi.

“Yupela maritman, . . . yupela i mas kliagut long tingting i stap long bel bilong ol [meri].” (1 Pita 3:7) Yu mas save olsem meri bai lusim bikpela strong bilong em long lukautim bebi. Em i gat ol nupela wok, na dispela inap putim presa long em, na mekim em i pilim taiet na bel hevi. Sampela taim em inap kros, tasol yu mas stap isi na no ken kros kwik. “Man i no save belhat kwik, em i mekim gutpela pasin. Dispela pasin i winim pasin bilong pait strong olsem gutpela soldia.” (Sindaun 16:32) Bihainim gutpela tingting na helpim meri long mekim ol wok em i no inap long mekim.—Sindaun 14:29.

SAMTING YU KEN MEKIM:

• Papa: Helpim meri long lukautim bebi, maski em nait. Sotim haptaim yu lusim long mekim ol narapela wok, na yu inap lusim bikpela haptaim moa long stap wantaim meri na bebi

• Mama: Taim man bilong yu i laik helpim yu long lukautim bebi, yu mas larim em. Sapos em i no mekim gut wok, orait no ken sutim tok long em; mobeta yu soim em hau em inap mekim wok

BAIBEL I TOK: “Tupela i kamap wanpela bodi.” (Stat 2:24) Maski yu gat nupela memba long famili, yu mas tingim olsem yu na poroman marit i stap yet olsem “wanpela bodi tasol.” Strongim marit bilong yupela.

Yupela ol maritmeri, yupela i mas amamas long poroman marit i helpim na sambai long yupela. Taim yupela i tok tenkyu, dispela inap “helpim ol man olsem gutpela marasin.” (Sindaun 12:18) Yupela ol maritman, tokim meri olsem yu laikim em tumas. Givim biknem long gutpela wok em i mekim bilong lukautim famili.—Sindaun 31:10, 28.

“Olgeta wan wan i mas wok long tingim ol samting bilong helpim narapela, na ol i no ken tingting long ol samting bilong helpim ol yet, nogat.” (1 Korin 10:24) Oltaim yupela i mas mekim ol samting bilong helpim poroman marit. Yupela i mas lusim sampela haptaim long toktok wantaim, tok amamas, na putim yau long narapela narapela. No ken tingim laik bilong yu yet long sait bilong maritpasin. Tingim laik bilong poroman marit. Baibel i tok: “Yupela ol marit i no ken tok nogat long poroman marit na pasim bodi bilong yupela yet.” (1 Korin 7:3-5) Olsem na yu na poroman marit i mas kamapim stret tingting bilong yupela. Taim yupela i soim pasin isi na pilim gut tingting bilong poroman marit, dispela bai strongim marit bilong yupela.

SAMTING YU KEN MEKIM:

• No ken lusim tingting long makim sampela haptaim bilong yutupela yet i ken stap wantaim

• Mekim ol liklik samting na poroman marit bai pilim olsem yu laikim em; olsem, yusim mobail fon long raitim naispela tok na salim i go long em o givim liklik presen

BAIBEL I TOK: “Kirap long taim yu stap bebi yet, yu bin save long ol Rait Holi. Em ol inap givim yu savetingting na bai God i ken kisim bek yu.” (2 Timoti 3:15) Plenim ol samting yutupela bai mekim bilong skulim bebi. Taim bebi i stap insait yet long bel bilong mama, em inap lain long ol samting, na tu, em inap luksave long nek bilong yutupela, na amamas taim yutupela i amamas. Ritim ol stori long em taim em i stap liklik bebi yet. Maski em i no save long samting yutupela i ritim, em bai amamas long rit taim em i kamap bikpela.

I no gat rong long stori long bebi long ol pasin na wok bilong God. I gutpela long bebi i harim yutupela i beten long Jehova. (Lo 11:19) Taim yutupela i pilai wantaim bebi, stori long em long ol samting God i bin wokim. (Song 78:3, 4) Taim em i kamap bikpela, em bai luksave olsem yutupela i laikim tru Jehova na em tu bai kisim pasin bilong laikim Jehova.

SAMTING YU KEN MEKIM:

• Beten askim God long givim savetingting na bai yutupela inap trenim gut bebi

• Kolim ol bikpela tok inap planti taim na bebi bai stat long kisim save taim em i liklik yet