Cikwati tacikonzyi kuzwidilila ikuti banabukwetene kabayeeyelana twaambo tutayi koomoonga naa kuti kabatasyomani. Aboobo, ino inga mwakweeleba buti kuba abuzuba?

Mucibalo eeci tulalanga-langa makani aatobela

•  Sena ncibi lyoonse kuba abuzuba?

•  Ncinzi cipa kuba abuzuba?

•  Mbuti mbomukonzya kuleka kuba abuzuba?

•  Ikuti naa ngomukwetene limwi kajisi buzuba

•  Nzyomukonzya kubandika

 Sena ncibi lyoonse kuba abuzuba?

 Tuba abuzuba ciindi muntu umwi naatalika kuciindizya kubikkila maano kumuntu ngotukwetene limwi naa kuti muntu ngotukwetene limwi watalika kuciindizya kubikkila maano kumuntu umwi. Tulakonzya kulimvwa kuti cikwati cesu cili muntenda. Ikuti kamulimvwa boobo, nkokuti cili kabotu kuba abuzuba. Kayi, cikwati ncecilongwe ciinda akati kabantu bobilo, aboobo banabukwetene beelede kubeleka canguzu kucikwabilila.

 Njiisyo yamu Bbaibbele: “Tabacili bobilo, pele baba mubili omwe. Aabo Leza mbaaswaanganya kutabi muntu uubaandaanya.”—Matayo 19:6.

 “Ikuti cikwati canu caba muntenda, buzuba bulakonzya kumucenjezya kutegwa mubweze ntaamu mbubwenya mbuli cintu cikonzya kumucenjezya kuti kuli mulilo.”—Ba Benjamin.

 Pele buzuba, bulaboola ikuti muntu watalika kuyeeyela bamwi katajisi atwaambo ncayelede kucita boobo. Ikuti katumuyanda ncobeni ngotukwetene limwi, tuyakubweeleba buzuba. (1 Bakorinto 13:4, 7) Ba Dr. Robert L. Leahy bakalemba kuti: “Ikuti kamujisi buzuba, munoocita zintu ziyoonyonganya cikwati canu ncoonya ncomuyanda kukwabilila.” a

 Ncinzi cipa kuba abuzuba?

 Kaambo kamwi kakonzya kupa kuti mube aabuzuba nkakuti mwakakwetwe kumuntu watakali kusyomeka kulindinywe. Naa ambweni cikwati cabazyali banu tiicakazwidilila akaambo kakutasyomeka mpoonya muyoowa kuti andinywe cilakonzya kumucitikila.

 “Bataata tiibakali kusyomeka kuli baama ciindi nondakali mwana, aboobo cilandiyumina kusyoma bantu bamwi. Eeci cakandinyonganya kapati cakuti zimwi ziindi cilandiyumina kubasyoma balumi bangu.”—Ba Melissa.

 Kaambo kamwi: Ikuti kamulibilika, munoobona mbuli kuti ibamwi bayanda buyo kumunyonyweeda cikwati. Mane mulakonzya kutalika kusyoma kuti, ikuti naa kwaba coolwe, muntu ngomukwetene limwi ulakonzya kumusiya akukwata uumbi.

 Kufwumbwa cintu cimupa kulimvwa boobo, ikuti kamujisi buzuba mulakonzya kuyeeya kuti ngomukwetene limwi tasyomeki kulindinywe alimwi mulakonzya kumutamikizya kuti mbwabede oobo. Kulimvwa boobu kulakonzya kuleta mapenzi mucikwati canu alimwi buya akunyonganya buumi bwanu.

 Njiisyo yamu Bbaibbele: “Munyono upa kuti mafwuwa abole.”—Tusimpi 14:30.

 Mbuti mbomukonzya kuleka kuba abuzuba?

 Amuyumye lusyomo lwanu. Muciindi cakubona kutasyomeka kwaumwi, amuyeeye zintu nzyaakacita ngomukwetene limwi zipa kuti kamumusyoma.

 “Ndilayeeya kujatikizya bube bubotu bwabalumi bangu. Ikuti babikkila maano kumuntu uumwi, tacaambi kuti bajisi makanze mabi. Ndeelede kuyeeya kuti, ikuti cikwati cabazyali bangu tiicakali kabotu, tacaambi kuti acalo cikwati cangu tacinooli kabotu. Ba Melissa.

 Mutasyomi nzyomuyeeyela. Ba Dr. Leahy, ibaambwa kale bakalemba kuti: “Kanji-kanji zintu nzyotuyeeya tuzibona kuti nzyamasimpe. Alimwi akaambo buyo kakuti mbotulimvwa oobo, tulimvwa kuti tulijisi bumboni bwakuti nzyamasimpe. Pele kusyoma buyo cintu cimwi naa kulimvwa buyo, tabuli bumboni bukkwene pe.” b

 “Ikuti twalanga bukkale bumwi akutalika kweezyeezya kuti kuli cintu citali kabotu cilimukucitika, tulakonzya kutalisya penzi mucikwati cesu.”—Ba Nadine.

 Amuzibandike nzyomulibilika. Kufwumbwa naa ncinzi cimupa kuba abuzuba, amumwaambile ngomukwetene limwi kutegwa mutubambe twaambo akulibikkila zyeelelo nzyomuzuminana alimwi nzyomukonzya kutobela nyoonse.

 “Ciindi nomubandika, mweelede kuyeeya kuti ngomukwetene limwi tayandi kuti mulimvwe bubi, alimwi akuti awalo uyanda kupanga zyakusala zili kabotu. Lyoonse kamuyeeya kuti ujisi makanze mabotu. Andiza mulaciindizya kulibilika naa mulangila zinji. Naa ambweni ngomukwetene limwi talimvwide kuti tamubikkili maano.”—Ba Ciara.

 Njiisyo yamu Bbaibbele: “Umwi aumwi kayandisya kugwasya bamwi ikutali buyo kuligwasya lwakwe mwini.”—1 Bakorinto 10:24.