Ino Caamba Nzi ‘Kulemeka Bauso Abanyoko’?

AMULIZYE

Bwiinguzi bwamu Bbaibbele

Mulawo “wakulemeka bauso abanyoko” ulajanika ziindi zinji mu Bbaibbele. (Kulonga 20:12; Deuteronomo 5:16; Matayo 15:4; Baefeso 6:2, 3) Ubikkilizya twaambo tone tuyandika.

Kamubalumba. Mulabalemeka bauso abanyoko ciindi nomubalumba akaambo kazintu zyoonse nzyobamucitila. Mulakonzya kutondezya kulumba kwiinda mukutobela busolozi bwabo. (Tusimpi 7:1, 2; 23:26) Ibbaibbele limukulwaizya kubayanda kapati bazyali banu akaambo kakuti ‘mbobulemu’ bwanu.—Tusimpi 17:6.
Amuuzumine mukuli ngobajisi. Ikapati nomucili baniini, mulabalemeka bauso abanyoko ciindi nomuuzumina mukuli ngwabapede Leza. Lugwalo lwa Bakolose 3:20 lwaambila bana kuti: “Amubamvwide bazyali banu muzintu zyoonse, nkaambo eeci cilakkomanisya mu Mwami.” Naba Jesu kacili mwana wakabamvwida bazyali bakwe cakulisungula.—Luka 2:51.
Amubalemeke. (Levitiko 19:3; Bahebrayo 12:9) Eeci cibikkilizya nzyomwaamba alimwi ambomuzyaamba. Masimpe kuti bazyali zimwi ziindi balacita zintu zipa kuti cikatazye kubalemeka. Nokuba boobo, bana balakonzya kubalemeka bazyali babo kwiinda mukweeleba ŋambawido iitali kabotu naa micito mibi. (Tusimpi 30:17) Ibbaibbele lyaamba kuti kusampaula bauso naa banyoko mulandu mupati.—Matayo 15:4.
Kamubapa nzyobayandika. Ciindi bazyali banu nobacembaala, bayandika lugwasyo. Mulakonzya kubalemeka kwiinda mukubeleka canguzu kutegwa mubajanine nzyobayandika. (1 Timoteyo 5:4, 8) Mucikozyanyo, kalaafwaafwi kufwa, Jesu wakabikka bubambe bwakulanganya banyina.—Johane 19:25-27.

Makani aakubeja kujatikizya kulemeka bazyali

Makani aakubeja: Kulemeka bauso abanyoko caamba kubalekela kweendelezya cikwati canu.

Makani aamasimpe: Bbaibbele lyaamba banabukwetene beelede kuyandana kapati kwiinda mbobayanda banamukwasyi. Lugwalo lwa Matalikilo 2:24 lwaamba kuti: “Mwaalumi uyoosiya bausyi abanyina akukakatila kumukaintu wakwe.” (Matayo 19:4, 5) Nokuba boobo, banabukwetene balakonzya kugwasyigwa alulayo lwabazyali babo naa bamakwaabo. (Tusimpi 23:22) Aboobo, banabukwetene balakonzya kusala mpobeelede kugolela banamukwasyi mucikwati cabo.—Matayo 19:6.

Makani aakubeja: Bauso abanyoko mbobeelede kukweendelezya muzintu zyoonse.

Makani aamasimpe: Nokuba kuti bazyali Leza wakabapa nguzu mumukwasyi, muntu uuli woonse nguzu zyakwe kuli mpozigolela, taziindilili anguzu zya Leza. Mucikozyanyo, ciindi bamunkuta mpati nobakasinikizya basikwiiya ba Jesu kutyola mulawo wa Leza, balo bakaingula kuti: “Tweelede kumvwida Leza mbwali mweendelezi kutali bantu.” (Milimo 5:27-29) Mbubwenya buyo, bana balabamvwida bazyali babo “mu Mwami,” nkokuti, muzintu zyoonse izyeendelana amilawo ya Leza.—Baefeso 6:1.

Makani aakubeja: Kulemeka bauso abanyoko caamba kuti weelede kubasangana mubukombi bwabo.

Makani aamasimpe: Ibbaibbele litukulwaizya kusola nzyotwiiya kutegwa tubone naa nkasimpe. (Milimo 17:11; 1 Johane 4:1) Muntu uucita boobo ulakonzya kulisalila cikombelo iciindene acabazyali bakwe. Ibbaibbele lilaamba kujatikizya babelesi ba Leza banji ibatakatobela bukombi bwabazyali babo, aaba balabikkilizya a Abrahamu, Rute, alimwi amwaapostolo Paulo.—Joshua 24:2, 14, 15; Rute 1:15, 16; Bagalatiya 1:14-16, 22-24.

Makani aakubeja: Kulemeka bauso abanyoko caamba kuti weelede kubasangana muzilengwa zyakukomba basikale.

Makani aamasimpe: Bbaibbele lyaamba kuti: “Ngu Jehova Leza wako ngoelede kukomba, alimwi ngonguwe alikke ngoelede kubelekela mulimo uusetekene.” (Luka 4:8) Muntu uukomba basikale ulamusesemya Leza. Alimwi buya, Bbaibbele liyiisya kuti “bafwide tabazyi cintu nociba comwe.” Tabakonzyi kububona bulemu mbobapegwa; tabakonzyi kugwasya naa kucisa bantu bapona.—Mukambausi 9:5, 10; Isaya 8:19.