Peepe, Bbaibbele kunyina noliyiisya kuti nyika ilipapalete. a Bbaibbele talili bbuku lyasayaansi. Aciindi nciconya, talikazyanyi asayaansi. Ncolyaamba ‘lyoonse cilasyomeka, lino mane kukabe kutamani.’​—Intembauzyo 111:8.

•  Ino Bbaibbele lyaamba nzi noliti “zyooko zyoonse zyone zyanyika”?

•  Ino mbuti kujatikizya musunko Diabolosi ngwaakaletela Jesu?

 Mabala aakuti “zyooko zyoonse zyone zyanyika” (alo muma Bbaibbele aamwi aalembedwe kuti “makkona one aanyika) alimwi aakuti “kumagolelo aanyika” ayelede kubonwa kuti maambilambali, kutali kuti nyika ijisi makkona one naa ijisi magolelo. (Isaya 11:12; Jobu 37:3) Aboobo, maambilambali aaya aamba nyika yoonse mbwiizulwa. Bbaibbele libelesya mabala aakuti “kuzwa kujwe akumbo, akuzwa kunyika akumusanza.”​—Luka 13:29.

 Kuboneka kuti bbala lya Chihebrayo lyakasandululwa kuti “makkona” naa “magolelo” maambilambali aabbala lyakuti “mababa.” Bbuku litegwa The International Standard Bible Encyclopedia litondezya kuti, “akaambo kakuti bbaba lyamuyuni libelesyegwa kuvwumba twana twakwe, [ibbala lya Chihebrayo eeli] lipa muzeezo wamagolelo aacintu cili coonse kuti cavwungululwa.” Bbuku ndilyonya eeli lyakayungizya kuti ku Jobu 37:3 a Isaya 11:12, “mabala aakabelesyegwa aamba nkomwe, minyinza, naa magolelo aanyika.” b

 Kutegwa asunke Jesu, “Diabolosi wakamutola kucilundu cilamfwu kapati akumutondezya mami oonse aamunyika abulemu bwangawo.” (Matayo 4:8) Bamwi baamba kuti cibalo camu Bbaibbele eeci ciyiisya kuti nyika yoonse ilakonzya kubonwa kuzwa abusena bumwi akaambo kakuti ilipapalete. Nokuba boobo, kulibonya kuti mucibalo eeci “cilundu cilamfwu kapati” tabuli busena bwini. Amubone twaambo ncotwaambila boobu.

•   Kunyina cilundu munyika mpotukonzya kubona mami oonse aamunyika.

•   Diabolosi wakatondezya Jesu kutali buyo mami oonse pele “abulemu bwangawo.” Zintu eezyi nocatakakonzyeka kuzibona kuzwa kulamfwu, aboobo kulibonya kuti Diabolosi wakabelesya cilengaano kutondezya Jesu. Eeci cilakonzya kukozyanisyigwa kumuntu uubelesya fooni kutondezya muntu umwi mafwoto aamasena aindene-indene aamunyika.

•   Cibalo cikozyene kulugwalo lwa Luka 4:5 caamba kuti Diabolosi wakatondezya Jesu “mami oonse aamunyika mukaindi kaniini buyo,” calo catakali kukonzyeka kwiinda mukubona cacigaminina. Eeci caamba kuti Diabolosi wakasunka Jesu kwiinda mukubelesya nzila iimbi kutali kubona cacigaminina.