TUPANGO TWAMU BBAIBBELE TWAPANDULULWA

Baroma 10:13—‘Kwiita Zina lya Jehova’

AMULIZYE

“Muntu woonse wiita zina lya Jehova uyoofwutulwa.”—Baroma 10:13, Bbaibbele lya Busanduluzi Bwanyika Mpya.

“Umwi aumwi uulilila izina lya-Mwami ulafutuka.”—Baroma 10:13, The Bible in Tonga Lyamu 1963.

Bupanduluzi bwa Baroma 10:13

Leza tasalululi, alimwi ulapa coolwe kubantu kuti bakafwutuke alimwi akujana buumi butamani, tacikwe makani acisi, musyobo naa bukkale nkobazwa. Nokuba boobo, kutegwa tugwasyigwe tweelede kwiita zina lya Jehova, lyalo ndezina lya Leza Singuzuzyoonse. a—Intembauzyo 83:18.

Mu Bbaibbele, mabala aakuti ‘kwiita zina lya Jehova’ taambi buyo kuzyiba zina lya Leza alimwi akulibelesya ciindi notumukomba. (Intembauzyo 116:12-14) Cibikkilizya kumusyoma Leza alimwi akulanga kulinguwe kutegwa atugwasye.—Intembauzyo 20:7; 99:6.

Izina lya Leza lyakali kuyandika kapati kuli Jesu Kristo. Majwi aakusaanguna mumupailo wakwe wacikozyanyo akali aakuti: “Taateesu ooli kujulu, alisalazyigwe zina lyako.” (Matayo 6:9) Kunze lyaboobo, Jesu wakatondezya kuti tweelede kumuzyiba, kumumvwida, alimwi akumuyanda Jehova, ikuti katuyanda kuba abuumi butamani.—Johane 17:3, 6, 26.

Nkaambo nzi ncotukonzya kwaamba kuti Jehova ngo “Mwami” waambidwe kulugwalo lwa Baroma 10:13 mu The Bible in Tonga? Akaambo kakuti kapango kazubuludwe kuzwa kuli Joeli 2:32, kwalo zina lya Leza, kutali lyabulemu lyakuti “Mwami,” nkolijanika mumwaambo wa Chihebrayo wakusaanguna. b

Makani aayengelede lugwalo lwa Baroma 10:13

Ku Baroma caandaano 10, Bbaibbele lyaamba kuti, kutegwa muntu abe acilongwe cili kabotu aa Leza weelede kuba alusyomo muli Jesu Kristo. (Baroma 10:9) Kaambo aaka kaleendelana amagwalo manji aazubuludwe kuzwa mu Cizuminano Cakaindi. Muntu ulatondezya lusyomo lwakwe kwiinda ‘mukwaambilizya antangalala,’ calo cibikkilizya kukambauka makani mabotu aalufwutuko kubantu batali basyomi. Akaambo kaceeci, bantu bamwi baba acoolwe cakuba alusyomo lwalo lusololela kubuumi.—Baroma 10:10, 14, 15, 17.

Amubale Baroma caandaano 10 kubikkilizya abupanduluzi buyungizyidwe alimwi amakani aakozyenye.

a Izina lya Leza lilajanika ziindi zibalilwa ku 7,000 mumalembe aamu Bbaibbele aakaindi. Mu Chihebrayo, zina lya Leza lilajanika mumabala one, aazyibidwe kuti, Tetragrammaton. Zina eeli lizyibidwe kuti “Jehova” mu Chitonga; nokuba boobo, basyaazibwene inga bayanda kubelesya lyakuti “Yahweh.”

b Kulibonya kuti balembi Banakristo ba Bbaibbele bakabelesya zina lya Leza ciindi nobakali kuzubulula magwalo aali mu “Cizuminano Cakaindi” aajisi zina eeli. Bbaibbele litegwa The Anchor Bible Dictionary lyaamba kuti: “Kuli bumboni bumwi butondezya kuti Tetragrammaton, Zina lya Leza, Yahweh, lyakajanika muzibeela zimwi naa muzibeela zyoonse zyamu Cizuminano Cakaindi izyakazubululwa mu Cizuminano Cipya ciindi nocakasaanguna kulembwa.” (Volyumu 6, peeji 392) Kutegwa muzyibe makani manji, amubone “The Divine Name in the Christian Greek Scriptures” mu Appendix A5 mu Bbaibbele lya Busanduluzi Bwanyika Mpya lyakwiiya. Appendix C2 ilijisi mulongo wabusanduluzi bwama Bbaibbele aabelesya zina lya Leza ku Baroma 10:13.