“Lino kuli yooyo uukonzya kucita zintu zinji kapati kwiinda aali zyeezyo nzyotumulomba naa nzyotuyeeyela, kweelana anguzu zyakwe zibeleka mulindiswe, kulinguwe akube bulemu.”—Baefeso 3:20, 21, Bbaibbele lya Busanduluzi Bwanyika Mpya.

 “Lino kulinguwe uukonzya kucita loko mane akwiinda zyoonse nzitukumbila nanka nzituyeeya, mbuli inguzu zibeleka mukati kesu, kulinguwe akube bulemu.”—Baefeso 3:20, 21, The Bible in Tonga Lyamu 1963.

 Mwaapostolo Paulo wakatondezya lusyomo ndwaakajisi lwakuti Leza ulakonzya kwiingula mipailo alimwi akuzuzikizya zyeezyo nzyobalangila bakombi bakwe munzila njobatayeeyeli. Alimwi buya, ulakonzya kwiingula munzila mbotu kapati kwiinda mbobali kuyeeyela.

 “Lino kuli yooyo uukonzya kucita zintu zinji kapati.” Kapango 21 katondezya kuti “yooyo” ngu Jehova Leza. a Ooko Paulo wakalemba kuti: “Kulinguwe akube bulemu kwiinda mumbungano alimwi akwiinda muli Kristo Jesu kumazyalani oonse mane kukabe kutamani. Ameni.” Kuyungizya waawo, Leza ulatupa nguzu nzyotuyandika kutegwa tucite kuyanda kwakwe.—Bafilipi 4:13.

 Mukapango 20, mwaapostolo Paulo wakaamba cintu cimwi caalubazu kujatikizya ncakonzya kucita Jehova ikugwasya bakombi bakwe. Kwaamba majwi aakasandululwa kuti “kuli yooyo uukonzya,” lifalensi iimwi yakati: “Kapango aaka takaambi buyo kuti Leza ulakonzya kucita cintu cimwi naa kuyeeyela kuti inga wacicita. Pele alimwi kaamba kuti ulijisi nguzu zyakuti inga wacicita. Mukwiimpana amuntu, Jehova ulakonzya kucita kufwumbwa ziyandika kutegwa abalanganye babelesi bakwe alimwi akwiingula mipailo yabo. Walo alikke nguujisi nguzu zitagoli.—Isaya 40:26.

 ‘Leza ulakonzya kucita zintu zinji kapati kwiinda aali zyeezyo nzyotumulomba naa nzyotuyeeyela.’ Jehova ulakonzya kubacitila “zintu zinji kapati” babelesi bakwe. Ulakonzya kubagwasya munzila iinda kubota kapati kwiinda mbobali kuyeeyela kuti inga wabagwasya.

 Mabala aakuti “kwiinda aali zyeezyo nzyotumulomba naa nzyotuyeeyela” atuyiisya cintu acimwi kujatikizya kapango aaka. Kwiinda mukwaamba kuti “kwiinda aali zyeezyo nzyotumulomba naa nzyotuyeeyela,” mwaapostolo uyanda kuti Banakristo boonse bamvwisye kuti Leza ulakonzya kubagwasya munzila njobatakonzyi kuyeeyela. Zimwi ziindi, Banakristo balakonzya kulimvwa kuti mapenzi aabo mapati cakuti taakonzyi kumana. Ambweni tabacizyi buya ancobakonzya kupailila. Pele Jehova ulabumvwisya bukkale bwabo alimwi ulakonzya kubagwasya. Aciindi ceelede, ulakonzya kwaamana mapenzi oonse alimwi akucita oobo munzila njobatakali kuyeeyela. (Jobu 42:2; Jeremiya 32:17) Pele calino, ulabapa nguzu zyakuti baliyumye alimwi buya calukkomano!—Jakobo 1:2, 3.

 Bbuku lya Baefeso ndugwalo mwaapostolo Paulo ndwaakalembela Banakristo ibakali kukkala mumunzi wa Efeso ku Asia Minor, mazuba aano kwiitwa kuti Turkey. Mulugwalo lwakwe, Paulo wakalemba majwi ngaakabikkilizya mumupailo ciindi naakali kubapailila. (Baefeso 3:14-21) Wakapailila kuti kabasolekesya kumwiiya Jesu mukuyeeya alimwi amumilimo. Munzila eeyi bakali kukonzya kuluzyiba luyando lwa Kristo. Eeci cilabajatikizya Banakristo boonse mazuba aano. Paulo wakamanizya mupailo wakwe kwiinda mukutembaula Leza alimwi akwaamba majwi aajanika ku Baefeso 3:20, 21.

 Amweebelele kavidiyo aaka kutegwa mubone twaambo tupati-pati ituli mubbuku lya Baefeso.