Banji bayeeya kuti aabo bayiide kapati alimwi bavwubide banoojisi buumi bubotu kumbele. Basyoma kuti lwiiyo lwakuyunivesiti lulakonzya kupa kuti muntu abe mubelesi mubotu, munamukwasyi uuli kabotu alimwi asicisi uuli kabotu. Alimwi balakonzya kulimvwa kuti kuba alwiiyo lwaatala kuyoobapa kujana mulimo uuvwolwa mali manji alimwi akuti aabo bajana mali manji banookkomene mubuumi.

Amubone ncobakaamba ba Zhang Chen, ibazwa ku China. Bakati: “Ndakali kusyoma kuti ndakeelede kuba adigili yakuyunivwsiti kutegwa ndileke kuba mucete, akuti kuba amulimo uuvwolwa mali manji kupa kukkomana akukkutila mubuumi.”

Kutegwa bakabe abuumi bubotu kumbele, banji bayanda kuunka kumayunivesiti aazyibidwe kapati, ambweni kuzisi zimbi buya. Eeci cali kudumide kapati kusikila bulwazi bwa COVID-19 nobwakaleta buyumuyumu bwakuunka kunze azisi. Lipooti yamu 2012 yaba Organisation for Economic Co-operation and Development yakaamba kuti: “Mweelwe wiinda ku 52% wabasicikolo bayiila kunze acisi, bazwa ku Asia.”

Bazyali kanji-kanji balabeleka canguzu kutegwa bana babo bakayiile kuyunivesiti yakucisi cimbi. Ba Qixiang, bazwa ku Taiwan bakaamba kuti: “Bazyali bangu tiibakavwubide, pele bakakonzya kututola kukkoleji ku United States toonse 4.” Kutegwa bakonzye kubbadela, bamukwasyi wakwe bakanjila muzikwelete, mbubwenya mbuli mikwasyi iimbi.

Lwiiyo lulabusumpula buumi munzila zimwi, pele talili lyoonse nolubapa kuba azintu nzyobakali kulangila basicikolo. Mucikozyanyo, kwayinda myaka minji yakubeleka canguzu alimwi akukweleta mali akubbadelela cikolo, banji tabaujani mulimo ngobakali kuyanda. Lipooti iyakaambwa aba Rachel Mui mu Business Times yaku Singapore yakati: “Basikumanizya cikolo cayunivesiti banji tabajani mulimo.” Ba Jianjie, mwaalumi uujisi madigili aakuyunivesiti manji ibakkala ku Taiwan bakaamba kuti: “Banji inga tabaujani mulimo weendelana alwiiyo ndobajisi.”

Aabo bajana mulimo weendelana alwiiyo lwabo balakonzya kujana kuti buumi bwabo tabucinci kweelana ambobakali kuyanda. Nobakazwa kuyunivesiti ku United Kingdom, ba Niran ibazwa ku Thailand, bakaujana mulimo weendelana alwiiyo lwabo. Bakaamba kuti: “Kweelana ambondakali kulangila, digili yakandigwasya kujana mulimo uuvwolwa mali manji. Nokuba boobo, ndakeelede kubeleka canguzu alimwi amawoola manji kutegwa kandivwola mali manji. Mukuya kwaciindi, babelesi banji bakatandwa mulimo akkampani kubikkilizya andime. Ndakajana kuti kunyina mulimo uukonzya kupa muntu kuyooba abuumi bubotu kumbele.”

Nobaba baabo bajisi mali manji alimwi ibalibonya kuti bakkede kabotu balijisi mapenzi aamumukwasyi, balaciswa, alimwi bacilibilika kujatikizya mali. Ba Katsutoshi ibazwa ku Japan bakaamba kuti: “Ndakalijisi mali manji, pele kunyina nondakakkomene nkaambo bamwi bakali kundifwida munyono alimwi akundeendelezya munzila mbyaabi.” Ba Lam, mukaintu uukkala ku Vietnam, bakaamba kuti: “Bantu banji balasoleka kuti bajane mali manji nkaambo bayeeya kuti alakonzya kubapa kuba abuumi bubotu, pele kanji-kanji abapa kwiindila buya kulibilika naa kuciswa alimwi akutyompwa.”

Mbubwenya mbuli ba Franklin, banji basika mpobazyiba kuti kuli zintu ziyandika kapati mubuumi kwiinda kuba alwiiyo lwaatala alimwi alubono. Muciindi cakubikkila maano kuzintu zyakumubili, bamwi balasola kuyandaula buumi bubotu kwiinda mukuba bantu bali kabotu alimwi akucitila bamwi zibotu. Sena eeci cilakonzya kumupa kuyooba abuumi bubotu kumbele? Cibalo citobela cilawiingula mubuzyo ooyu.