Sena kuli nomwakabulide cakucita ciindi muntu umwi iwakali afwaafwi andinywe naakali kulila akaambo kakufwidwa muyandwa wakwe? Zimwi ziindi inga katutazyi cakwaamba naa cakucita, aboobo inga twasala kuumuna buyo. Pele kuli zintu zigwasya nzyotukonzya kucita.

Kanji-kanji, iciyandika buyo nkujanika kumalila alimwi akwaamba majwi masyoonto mbuli aakuti, “Ndausa kapati.” Mumasena aamwi, kumukumbata muntu naa kumubuwa-buwa kujanza ninzila mbotu yakutondezya kuti mulamubikkila maano. Ikuti sikufwidwa kayanda kwaambaula, amumuswiilile calubomba. Kwiinda zyoonse, amugwasyilizye mukwasyi uuli mubuumba, ambweni kwiinda mukucita milimo imwi yaaŋanda njobatakonzyi kucita, mbuli kujika, kulanganya bana, naa kugwasyilizya bubambe bwamalila ikuti eeco kaciyandika. Kucita boobo kulakonzya kugwasya kapati kwiinda majwi aakumulomo buyo.

Mukuya kwaciindi, inga mwayanda kubandika makani aajatikizya sikwaazwa, ambweni kwaamba bube bwakwe bubotu mbwaakajisi naa zintu zibotu nzyaakacita. Mubandi uuli boobo ulakonzya kumukkomanisya muntu wakafwidwa. Mucikozyanyo, ba Pam, ibakafwidwa balumi babo ba Ian, myaka iili cisambomwe yainda bakaamba kuti: “Zimwi ziindi bantu balandaambila zintu zibotu nzyobakali kucita ba Ian nzyondatakazyi, zyalo izindipa kukkomana.”

 Basikuvwuntauzya baamba kuti bantu banji ibafwidwa balagwasyigwa kapati mbwaacitikila buyo malila, pele kwainda ciindi balalubwa abeenzinyina kuti baciyandika lugwasyo mubuumi bwabo. Aboobo, ciindi aciindi amusolekesye kubaswaya naa kubandika abalongwe banu ibali mubuumba kuzwa nobafwidwa. * Bantu banji ibali mubuumba balakkomana kapati kuswaigwa nkaambo cibapa coolwe cakwaamba mbobalimvwa.

Amulange-lange cikozyanyo caba Kaori, mukaintu uucili mwana-mwana waku Japan, iwakatyompedwe kapati akaambo kalufwu lwabanyina alimwi alwabapati bakwe ibakafwa kakwiindide buyo myezi iili 15 kuzwa ciindi banyina nibakafwa. Cikkomanisya ncakuti, ba Kaori ciindi aciindi bakali kutambula lugwasyo kuzwa kubalongwe babo basyomeka. Bamwi mbaa Ritsuko, mbapati kwiinda ba Kaori balo ibakalyaaba kuba balongwe babo beni-beni. Ba Kaori bakaamba kuti: “Kwaamba masimpe, tiindakaakkomanina makani aaya. Tiindakali kuyanda muntu uuli woonse kuti alibikke muciimo cabamaama bakandizyala, alimwi kunyina nindakali kuyeeya kuti kuli uukonzya kucita oobo. Nokuba boobo, akaambo kambobakali kundilanganya bamaama ba Ritsuko, ndakatalika kulimvwa kwaanguluka kuli mbabo. Nsondo ansondo, twakali kuunka mubukambausi antoomwe alimwi akumiswaangano ya Bunakristo antoomwe. Bakali kundiita kukunywa tii akundiletela zyakulya, ziindi zinji bakali kundilembela magwalo alimwi atukkaadi. Bube bubotu bwabamaama ba Ritsuko bwakandigwasya kapati.”

Kwainda myaka iili 12 kuzwa ciindi banyina baba Kaori nibakafwa, alimwi ba Kaori abalumi babo mbapainiya baciindi coonse. Ba Kaori bakaamba kuti: “Bamaama ba Ritsuko, bazumanana kundibikkila maano. Ciindi nonduunka kuŋanda, ndilabaswaya alimwi ndilaikkomanina mibandi yabo iikulwaizya.”

Acimbi cikozyanyo camuntu iwakaumbulizyigwa akaambo kakuzumanana kugwasyigwa mba Poli, umwi wa Bakamboni ba Jehova baku Cyprus. Ba Poli bakajisi balumi basilubomba ba Sozos, balo ibakajisi cikozyanyo cibotu kabali mweembezi Munakristo nkaambo ziindi zinji bakali kutamba bamucaala alimwi abamukabafwu kuŋanda yabo kucakulya akukulikkomanisya. (Jakobo 1:27) Cuusisya ncakuti, kabajisi myaka iili 53, ba Sozos bakafwa abulwazi bwakkansa yakubongo. Ba Poli bakaamba kuti: “Ndakasweekelwa mulumaangu uusyomeka walo ngotwakakkala anguwe myaka iili 33 mucikwati.”

Naakamana malila, ba Poli bakalongela ku Canada antoomwe amwanaabo musankwa Daniel iwakajisi myaka iili 15. Kabali ku Canada, bakatalika kuyanzana ambungano ya Bakamboni ba Jehova. Ba Poli bakaamba kuti: “Balongwe mbondakajana mumbungano mpya tiibakazyi cili coonse kujatikizya bukkale bwesu bwamusyule alimwi abuyumuyumu mbotwakajisi. Pele eeco tiicakabalesya kuti batugwasye kwiinda mumajwi aabo aalubomba alimwi azintu nzyobakali kutucitila. Eelo kaka lwakali lubotu kapati lugwasyo lwabo ilwakapegwa ciindi mwanaangu naakali kuyandika bausyi! Aabo ibakali kusololela mumbungano bakali kumubikkila kapati maano Daniel. Umwi akati kabo wakali kubona masimpe kuti Daniel nkwali ciindi nobalikondelezya abeenzinyina naa ciindi nobaunka kuyakuuma bbola.” Mazuba aano, Daniel alimwi abanyina bapona buyo kabotu.

Kwaamba masimpe, kuli nzila zinji nzyotukonzya kubelesya kuumbulizya baabo balila. Ibbaibbele alyalo lilatuumbulizya kwiinda mukutupa bulangizi bwakumbele bukkomanisya.