MAGIYA AAMUMINCINI, kwaciindi cilamfwu ali kuyeeyelwa kuti akapangwa buyo abantu. Bumboni butondezya kuti muzeezo ooyu tauluzi pe! Mubuvwuntauzi bumwi kwakajanwa kuti nsozi iicili nsyoonto iitegwa Issus leafhopper, iijanika mumyuunda ku Europe koonse ilijisi magiya aanjilana. *

Nsozi eeyi iicili nsyoonto ilakonzya kusotoka kusika kumamita aali 3.9 mukavwalu-vwalu komwe calo cipa kuti kaijisi nguzu zitandila ku 400 kwiinda nguzu zikwelela ansi! Yasotoka, ilakonzya kuleka kulibonya mukulaba kwaliso. Kutegwa isotoke anguzu, iyandika kuti maulu obilo aamunsi kaajisi nguzu zyeelene aciindi comwe. Ncinzi cipa kuti kaisotoka kabotu-kabotu?

Amulange-lange: Basayaansi bakajana kuti kunsi aamaulu obilo aamunsi aansozi eeyi kuli magiya aanjilana. Yasotoka, magiya aaya alanjilana kutegwa maulu asotokele antoomwe. Buyo-buyo inga yaalilwa kusotoka kabotu!

Banyama bapati nobasotoka inga beendelezyegwa a nervous system kutegwa maulu asotokele antoomwe. Pele kujatikizya nsozi eeyi, kubelesya nervous system kulakonzya kupa kuti kaitafwambaani kusotoka. Nkakaambo kaako ncoijisi magiya obilo aanjilana. Sikulemba alimwi sikuvwuntauzya Gregory Sutton wakaamba kuti: “Kanji-kanji tuyeeya kuti magiya ajanika buyo muzintu zyakapangwa abantu.” Alimwi wakayungizya akwaamba kuti cili boobo akaambo kakuti “kunyina kumbi nkotwakaayandaula cakulomya.”

Ino muyeeya buti? Sena magiya aajanika kunsozi eeyi iitegwa Issus leafhopper akabako akaambo kakusanduka naa akalengwa buya?