Bbuku lyakuti: Ancient World Leaders—Cyrus the Great lyaamba kuti: “Ciindi Koresi naakakanza kusaala Babuloni, bantu bamumunzi ooyu tiibakapakamene kwiinda bantu bamuminzi imbi yoonse.” Mulonga wa Firate wakali kwiinda mu Babuloni, alimwi kwakali mifwolo yakazingulukide malambo malamfwu. Zyintu eezyi zyobilo zyakapa kuti munzi ukwabililwe akulibonya mbuli kuti taukonzyi kusaalwa.

Basikalumamba ba Koresi bakaanyona meenda aakali kwiinda mu Babuloni kuzwa mumulonga wa Firate, cakuti meenda aayo akaceya. Mpoonya bakainda mumeenda kuya kumulyango wamunzi walo iwatakajedwe, akuusaala munzi ooyu kakunyina buyumuyumu. Basyaazibwene mumakani aakaindi ba Herodotus alimwi a Xenophon bakaamba kuti, busiku mbobakasaalwa bana Babuloni bantu bakali kuyeeya kuti balikwabilidwe, nkaambo bantu banji kubikkilizya amwami bakali kupobola. (Amubone kabbokesi kajisi mutwe wakuti  “Bulembo Abwaanda.”) Nokuba boobo, kuzunda kwa Koresi kwakazuzikizya businsimi bugambya bwamu Bbaibbele.

Businsimi bwa Isaya bulagambya kapati nkaambo bwakalembwa myaka iitandila ku 200 ambweni iili 150 katanazyalwa Koresi. Amubone businsimi oobu:

• Mwaalumi wazyina lya Koresi wakali kuyoosaala Babuloni akwaangulula ba Juda.—Isaya 44:28; 45:1.

• Mulonga wa Firate wakali kuyooyuminina, kutegwa mpi ya Koresi icikonzye kwiinda.—Isaya 44:27.

• Milyango yamunzi yakali kuyoosiigwa bukwazi.—Isaya 45:1.

• Basikalumamba bana Babuloni ‘bakaleka kulwana.’ —Jeremiya 51:30; Isaya 13:1, 7.

Mu 607 B.C.E., basikalumamba bana Babuloni bakanyonyoona Jerusalemu akutola ba Juda mubuzike. Ino ba Juda bakali kuyookkala mubuzike kwaciindi cilamfwu buti? Leza wakaamba kuti: “Lino kumamanino aamyaka iili makumi aali musanu aabili, njoobweedezya mwami wa-Babuloni amusyobo oyo anyika . . . nkabela nyika iyooba matongo mazuba oonse.” —Jeremiya 25:12.

Mbubwenya mbokwaambwa kale, Koresi wakausaala munzi wa Babuloni mu 539 B.C.E. Mbwaakamanina kusaala Babuloni, wakabaangulula ba Juda, balo bakatalika kupiluka kumunzi wabo mu 537 B.C.E.—aciindi cini myaka iili 70 noyakakkwana kuzwa nibakatolwa mubuzike. (Ezara 1:1-4) Mukuya kwaciindi munzi wa Babuloni wakaba “matongo,” calo cakasinizya kusyomeka kwabusinsimi bwamu Bbaibbele.

Amulange-lange twaambo ootu: Bbaibbele lyakaambila limwi (1) myaka iili 70 ba Juda njobakali kuyookkala mubuzike, (2) kusaala Babuloni nkwaakacita Koresi alimwi anzila nzyaakabelesya, alimwi (3) akunyonyoonwa kwa Babuloni. Oobu tiibwakali busongo bwabantu pe. Kaambo kapati nkakuti: “Kunyina ciindi ibusinsimi nobwakaba akaambo kakuyanda kwamuntu, pele bantu bakaambaula zyakazwa kuli Leza.” (2 Petulo 1:21) Masimpe ngakuti, Bbaibbele tweelede kulibala.