Milimo 15:1-41
15 Lino kwakaboola baalumi bamwi kuzwa ku Judaya akutalika kuyiisya bakwesu kuti: “Ikuti tiimwapalulwa kweelana aciyanza ca Musa,+ tamukonzyi kufwutulwa pe.”
2 Pele Paulo a Barnaba nobakaimpana akukazyanya kapati ambabo, bakasala kuti Paulo, Barnaba abamwi akati kabo baunke ku Jerusalemu+ ikutola makani aaya kubaapostolo abaalu.
3 Aboobo nobakasindikilwa ambungano kwamusinzo uuli mboubede, baalumi aaba bakazumanana alweendo lwabo kwiinda ku Fonike aku Samariya, kabayaabwaamba makani oonse aakusanduka kwabantu bamasi, eelyo bakali kubapa kukondwa kapati bakwesu boonse.
4 Nobakasika ku Jerusalemu bakatambulwa kabotu ambungano, baapostolo alimwi abaalu, eelyo bakabaambila zintu zinji Leza nzyaakacitide kwiinda mulimbabo.
5 Pele basyomi bamwi aabo kaindi ibakali mukakamu kacikombelo caba Farisi bakanyamuka muzyuuno zyabo akwaamba kuti: “Kuleelede kubapalula akubalailila kuti kabatobela Mulawo wa Musa.”+
6 Aboobo baapostolo abaalu bakaswaangana antoomwe kuti baalange-lange makani aaya.
7 Lino nobakabandika* kwaciindi cilamfwu, Petro wakanyamuka akubaambila kuti: “Nobaalumi, bakwesu, mulizyi kabotu kuti kuzwa kumatalikilo Leza wakandisala akati kanu kutegwa, kwiinda mulindime bantu bamasi bamvwe makani mabotu akusyoma.+
8 Alimwi Leza uuzyi myoyo yabantu+ wakacitila bumboni kwiinda mukubapa muuya uusalala+ mbubonya mbwaakacita akulindiswe.
9 Alimwi kunyina naakatondezya kwiindana kuli koonse akati kandiswe ambabo,+ pele wakasalazya myoyo yabo kwiinda mulusyomo.+
10 Aboobo, ino nkaambo nzi lino ncomusunka Leza kwiinda mukubikka joko munsingo zyabasikwiiya+ eelyo ndyobatakali kukonzya kunyamuna bamatata notuba ndiswe?+
11 Muciindi caboobo, tusyoma kuti tulafwutulwa kwiinda muluzyalo lwa Mwami Jesu+ mbubonya buyo mbuli bantu aabo.”+
12 Aciindi aawo nkamu yoonse yakaumuna, eelyo bakatalika kuswiilila Barnaba a Paulo kabaluula zitondezyo azintu zigambya zinji Leza nzyaakacita kwiinda mulimbabo akati kabamasi.
13 Nobakamana kwaambaula, Jakobo wakaingula kuti: “Nobaalumi, bakwesu, amundiswiilile.
14 Simiyoni+ wapandulula cakusalazya Leza kwaciindi cakusaanguna mbwaakababikkila maano bamasi kuti mulimbabo ajane bantu bazina lyakwe.+
15 Alimwi eeci cileendelana amajwi aa Basinsimi, mbubonya mbokulembedwe kuti:
16 ‘Zyaakwiinda zintu eezyi ndiyoopiluka akuliimika alimwi tente* lya Davida liwide; ndiyooyakulula matongo aandilyo akulibukulusya,
17 kutegwa bantu aabo ibayoosyaala bakayandaule Jehova* camoyo woonse, antoomwe abantu bamumasi oonse, ibantu baitwa azina lyangu, mbwaamba Jehova* ooyo uucita zintu eezyi,+
18 izizyibidwe kuzwa kaindi.’+
19 Aboobo kuyeeya kwangu nkwakuti tutabakatazyi bamasi aabo basandukila kuli Leza,+
20 pele atubalembele kuti batantamuke zintu zisofwaazyidwe amituni,+ bwaamu,*+ zintu zisinidwe* alimwi abulowa.+
21 Nkaambo kuzwa kaindi bantu bali kukambauka kujatikizya Musa mumunzi amunzi, alimwi mabbuku aakwe alabalwa cakupozya muzikombelo sabata imwi aimwi.”+
22 Mpoonya baapostolo abaalu antoomwe ambungano yoonse bakasala kutuma baalumi basalidwe akati kabo kuunka ku Antiokeya antoomwe a Paulo a Barnaba; bakatuma Judasi ooyo iwakali kwiitwa kuti Barsaba antoomwe a Sila,+ baalumi ibakali kusololela akati kabakwesu.
23 Bakalemba lugwalo oolu akulutuma kwiinda mulimbabo:
“Nomuyandwa bakwesu nomuzwa muli bamasi, nomuli ku Antiokeya,+ Siriya a Kilikiya. Swebo tobanyoko, tobaapostolo alimwi abaalu: Twamwaanzya!
24 Mbwaanga twakamvwa kuti ibamwi bakazwa akati kesu aboobo bakamunyonganya akaambo kazintu nzyobakaamba,+ kabasola kumuwisya kulusyomo nokuba kuti kunyina notwakabapa malailile aali oonse,
25 twazuminana kuti tusale baalumi bamwi bakutuma kulindinywe antoomwe abayandwa besu ba Barnaba a Paulo,
26 ibaalumi ibakaaba buumi bwabo akaambo kazina lya Mwami wesu Jesu Kristo.+
27 Aboobo twamutumina Judasi a Sila kuti abalo bamwaambile zintu nzizyonya eezyi mulomo mpande.+
28 Nkaambo muuya uusalala+ alimwi andiswe twasala kutamuyungizizya mukuli aumbi, ccita buyo zintu eezyi ziyandika:
29 kuti muzumanane kutantamuka zintu zituulwa kumituni,+ bulowa,+ zintu zisinidwe*+ alimwi abwaamu.*+ Ikuti mwazumanana kuzitantamuka zintu eezyi cakulomya, zinoomweendela kabotu zintu. Kamupona kabotu!”
30 Aboobo, baalumi aaba nobakaambilwa kuti baunke, bakaselemukila ku Antiokeya, eelyo ooko bakabunganya nkamu yoonse yabantu akubapa lugwalo oolu.
31 Nobakamana kulubala, bakakondwa kujatikizya makani aayo aakukulwaizya ooko.
32 Alimwi Judasi a Sila, mbwaanga abalo bakali basinsimi, bakaamba makani manji aakukulwaizya bakwesu akubayumya.+
33 Nobakakkala kwaciindi cili mbocibede, bakwesu bakalayana ambabo kuti bapiluke muluumuno kuli baabo bakabatumide.
34 *—
35 Pele Paulo a Barnaba bakasyaala mu Antiokeya kabayiisya akwaambilizya makani mabotu aa Jehova,* antoomwe abamwi banji.
36 Lino nokwakainda mazuba aali mbwaabede, Paulo wakaambila Barnaba kuti: “Lino* atupiluke tukaswaye bakwesu kuminzi yoonse ooko nkotwakaambilizya jwi lya Jehova* kutegwa tukabone mbobabede.”+
37 Barnaba wakali kuyandisya kuti bamutolelezye a Johane iwakali kutegwa Marko.+
38 Pele Paulo tanaakauzuminizya muzeezo wakuti bamutolelezye Marko, nkaambo wakalibasiide ku Pamfiliya alimwi tanaakaunkide ambabo kumulimo ooyu.+
39 Aciindi aawa bakazwangana kapati cakuti mane bakaandaana; eelyo Barnaba+ wakatola Marko akuunka ku Kupro abwato.
40 Paulo wakasala Sila akuunka ibakwesu nobakamana kumubikka mumaanza aa Jehova* kuti amufwide luzyalo lwakwe.+
41 Wakainda mu Siriya amu Kilikiya kayaabuyumya-yumya mbungano.
Bupanduluzi buyungizyidwe
^ Naa, “nobakakazyanya.”
^ Naa “katungu; ŋanda.”
^ Amubone Makani Aayungizyidwe A5.
^ Amubone Makani Aayungizyidwe A5.
^ Naa “zijaigwa kakunyina kutenda amoyo kuti bulowa buzwe.”
^ Mu Chigiriki, por·neiʹa. Amubone Bupanduluzi Bwamabala.
^ Mu Chigiriki, por·neiʹa. Amubone Bupanduluzi Bwamabala.
^ Naa “zijaigwa kakunyina kutenda amoyo kuti bulowa buzwe.”
^ Amubone Makani Aayungizyidwe A3.
^ Amubone Makani Aayungizyidwe A5.
^ Naa ambweni, “Ziyume zitete.”
^ Amubone Makani Aayungizyidwe A5.
^ Amubone Makani Aayungizyidwe A5.
