Marko 6:1-56
6 Mpoonya wakazwa ooko abasikwiiya bakwe akuboola kumunzi okwabo.+
2 Mu Sabata, wakatalika kuyiisya mucikombelo, lino ibunji bwabaabo ibakali kumuswiilila bakagambwa akubuzya kuti: “Ino muntu ooyu wakazijana kuli zintu eezyi?+ Alimwi nkaambo nzi busongo oobu ncobwakapegwa kulinguwe, alimwi amilimo mipati eeyi nciicitilwa amuntu ooyu?+
3 Sena ooyu tali sikubeza mapulanga,+ imwana wa Mariya+ alimwi imunyina Jakobo,+ Josefa, Judasi alimwi a Simoni?+ Alimwi sena bacizyi bakwe tatuli limwi aano?” Aboobo bakamukaka.
4 Pele Jesu wakabaambila kuti: “Musinsimi ulalemekwa koonse ccita buyo mumunzi okwabo, kuli bamukowa alimwi akuli bamuŋanda yakwe.”+
5 Aboobo tanaakali kukonzya kucita mulimo mupati uuli woonse ooko, ccita buyo kubikka maanza aakwe abalwazi basyoonto akubaponya.
6 Masimpe, kubula lusyomo kwabo kwakamugambya. Eelyo wakaunka akwiinda muminzi yoonse iizingulukide, kayaabuyiisya.+
7 Mpoonya wakaita bali Kkumi Ababili akutalika kubatuma bobilo-bobilo,+ alimwi wakabapa nguzu zyakutanda myuuya iisofweede.+
8 Alimwi wakabalailila kuti kutabi cintu ncobatolelezya mulweendo lwabo ccita buyo nkoli—tiibakeelede kutolelezya cakulya, nkomo yakubikkila cakulya, naaba mali* muzikwama zyabo+—
9 pele bakeelede buyo kusama mpato alimwi tiibakeelede kusama zisani zyobilo.*
10 Kumane wakabaambila kuti: “Kufwumbwa nkomunjila muŋanda, amukkale oomo kusikila mukazwe kubusena oobo.+
11 Alimwi kufwumbwa kubusena nkobatakamutambuli naa kumuswiilila, mwaakuzwa ooko amukakunkumune lusuko kumaulu aanu kuti bukabe bumboni kulimbabo.”+
12 Mpoonya bakaunka akutalika kukambauka kuti bantu beempwe,+
13 alimwi bakatanda madaimona manji+ akunanika balwazi banji mafwuta alimwi akubaponya.
14 Lino Mwami Heroda wakamvwa cakali kucitika, nkaambo izina lya Jesu lyakamwaika koonse, alimwi bantu bakali kwaamba kuti: “Johane Mubbapatizi wabusyigwa kubafwu, nkakaambo kaako ncakonzya kucita milimo mipati.”+
15 Pele bamwi bakali kwaamba kuti: “Ngu Elija.” Alimwi bamwi bakali kwaamba kuti: “Musinsimi mbuli umwi wabasinsimi bakaindi.”+
16 Pele Heroda naakamvwa makani aaya, wakaamba kuti: “Ooyu ngu Johane ngundakakosola mutwe, wabusyigwa.”
17 Nkaambo Heroda kumugama nguwakatuma bantu kuyoojata Johane akumwaanga muntolongo akaambo ka Herodiya imukaintu wa Filipo imunyina, akaambo kakuti Heroda wakalimukwete.+
18 Nkaambo Johane wakali kwaambila Heroda kuti: “Tacizumizyidwe pe kukwata mukamunyoko.”+
19 Aboobo Herodiya wakalimubikkililide Johane alimwi wakali kuyanda kuti amujaye, pele tanaakali kukonzya.
20 Nkaambo Heroda wakali kumuyoowa Johane, wakamuzyi kuti muntu uululeme alimwi uusalala,+ alimwi wakali kumubamba kabotu. Naakali kumuswiilila wakali kubula cakucita, pele lyoonse cakali kumukonda kumvwa nzyaakali kwaamba.
21 Pele bwakasika ibuzuba bweelede Heroda naakaba apobwe mubuzuba bwakuzyalwa+ kwakwe ndyaakabambila balupati-pati bakwe abeendelezi babasikalumamba, alimwi ankumekume zyaku Galilaya.+
22 Lino mwana musimbi wa Herodiya wakaboola akuzyana cakuti Heroda wakakondwa abaabo mbaakali kulya limwi.* Mwami wakaambila musimbi ooyu kuti: “Kondaambila kufwumbwa ncoyanda, ndilakupa.”
23 Aboobo, wakamukonkezya kuti: “Kufwumbwa ncotiindilombe, ndilakupa, kusikila kucisela cabwami bwangu.”
24 Aboobo wakaunka anze kuyoobuzya banyina kuti: “Ncinzi nconditiilombe?” Bakaingula kuti: “Mutwe wa Johane Mubbapatizi.”
25 Ndilyonya wakanjila kabalika kuya kumwami akumulomba kuti: “Ndiyanda kuti mundipe lino aawa mutwe wa Johane Mubbapatizi mumutiba.”+
26 Nokuba kuti eeci cakamupa kuusa kapati, mwami tanaakali kukonzya kumukakila, akaambo kakuti wakakonka alimwi akaambo kabeenzu bakwe.*
27 Aboobo ndilyonya eelyo mwami wakatuma sikumulindilila akumulailila kuti amuletele mutwe wa Johane. Eelyo wakaunka akumukosola mutwe Johane muntolongo
28 akuuleta mutwe mumutiba. Wakaupa musimbi, awalo musimbi wakaupa banyina.
29 Basikwiiya bakwe nibakaamvwa makani aaya, bakaboola akubweza mubili wakwe baakuuzikka mucuumbwe.
30 Lino baapostolo bakabungana kuli Jesu akumwaambila zintu zyoonse nzibakacita anzibakayiisya.+
31 Mpoonya wakabaambila kuti: “Atweende tukkalile kubusena bunyina bantu mulyookezye aniini.”+ Nkaambo mbanji bantu ibakali kuboola akuunka, cakunga bakabula aciindi cakupumuna kuti balye.
32 Aboobo bakatanta bwato akuunka kubusena bunyina bantu kutegwa bakabe buyo balikke.+
33 Pele bantu bakababona kabaunka, alimwi banji bakazyiba, eelyo bakayoboloka kuzwa muminzi yoonse akubalika amaulu, baakusaanguna mbabo kusika kubusena ooko.
34 Lino naakaseluka wakabona nkamu mpati yabantu, aboobo wakabeetelela+ nkaambo bakali mbuli mbelele zitakwe mweembezi.+ Mpoonya wakatalika kubayiisya zintu zinji.+
35 Kumabbililo aazuba, basikwiiya bakwe bakaboola kulinguwe akumwaambila kuti: “Okuno nkuusyokwe, alimwi ciindi caunka kale.+
36 Kobaambila bamwaikizyanye, kutegwa baunke mutunzi amuminzi yeengelede kuti bakalyuulile zyakulya.”+
37 Wakabaingula kuti: “Amubape zyakulya.” Balo bakamubuzya kuti: “Sena tuunke tukaakuule zinkwa zyuulwa madinari* aali 200 akubapa bantu kuti balye?”+
38 Wakababuzya kuti: “Ino mujisi zinkwa zyongaye? Kamuya mukalange!” Nibakalanga, bakati: “Zyosanwe answi zyobilo.”+
39 Mpoonya wakaambila bantu boonse kuti bakkale mutubunga-bunga aamweemvwe.+
40 Aboobo bakakkala mutubunga mumwi kabali 100 mumwi kabali 50.
41 Lino naakabweza zinkwa zyosanwe answi zyobilo wakalanga kujulu akulumba Leza.+ Amane wakakomauna zinkwa akuzipa basikwiiya bakwe kutegwa babape bantu, azyalo nswi eezyi zyobilo wakazyaabanya akati kabo boonse.
42 Aboobo boonse bakalya akukkuta,
43 alimwi bakabweza zisuwo zili 12 izyakazwide bufwefwelenga, kutabikkilizya answi.+
44 Aabo ibakalya zinkwa bakali baalumi bali 5,000.
45 Mpoonya kakunyina kusowa ciindi, wakaambila basikwiiya bakwe kuti batante mubwato basolole kuya mutala ku Betesaida, walo naakacili kumwaya nkamu yabantu.+
46 Naakamana kubalaya, wakaunka kucilundu kuyoopaila.+
47 Lino nikwakaba kumangolezya, bwato bwakali akati kalwizi pele walo wakacili mutala alikke.+
48 Mpoonya naakabona kuti cabakatazya kukwasula, nkaambo guwo lyakali kubbubbula kuletezya nkobakali kuya, kubucedo* wakaboola kulimbabo, keenda atala aamaanzi mulwizi; pele wakali kuyanda kubaindilila.
49 Mbobakamubonena buyo keenda atala aamaanzi mulwizi bakati: “Ncilengaano!” Eelyo bakakwiila.
50 Nkaambo boonse bakamubona alimwi bakayoowa. Pele ndilyonya eelyo wakaambaula ambabo akubaambila kuti: “Amukkazike myoyo! Ndime; mutayoowi pe.”+
51 Mpoonya wakatanta mubwato mobakabede, aboobo guwo lyakaleka. Eeci cakabagambya kapati,
52 nkaambo tiibakamvwisya ncozyakali kwaamba zinkwa, alimwi mumyoyo cakacili cintu ciyumu kulimbabo ikumvwisya.
53 Lino nibakazabuka mutala bakasika ku Genesarete alimwi bakaimika bwato acito munsi akooko.+
54 Pele mbobakazwida buyo mubwato, bantu bakamuzyiba.
55 Mpoonya bakabilingana mucooko eeco coonse akutalika kuleta bantu ibakali kuciswa, bakali kubanyamuda amacila akubaleta ooko nkobakamvwide kuti nkwabede.
56 Alimwi kufwumbwa naakali kunjila muminzi naa muminzi mipati naa mutunzi, bakali kuleta balwazi mumisika akumulomba kuti bajate buyo maaya aacisani cakwe caatala.+ Eelyo boonse aabo ibakaajata bakapona.
Bupanduluzi buyungizyidwe
^ Mu Chigiriki, “mukuba.”
^ Naa “zisani zyakucinca.”
^ Naa “mbaakakkede limwi kutebulu.”
^ Naa “baabo bakakkede kutebulu.”
^ Amubone Makani Aayungizyidwe B14.
^ Nkokuti, cakuma 3 koloko yamasiku kusikila kumapaswido aazuba cakuma 6 koloko.
