Jobu 2:1-13
2 Kuzwa waawo bwakasika buzuba eelyo bana* ba Leza mwini-mwini+ nibakaboola kuzikwiima kumbele lya Jehova,+ eelyo Saatani awalo wakaboola akati kabo kuti aime kumbele lya Jehova.+
2 Mpoonya Jehova wakabuzya Saatani kuti: “Ino wazwa kuli?” Saatani wakavwiila Jehova kuti: “Ndazwa kukuzinguluka munyika akweendeenda mulinjiyo.”+
3 Kumane Jehova wakabuzya Saatani kuti: “Sena wamubona* mubelesi wangu Jobu? Kunyina muntu naba omwe uuli mbuli nguwe munyika. Mwaalumi uululeme alimwi uusyomeka,*+ uuyoowa Leza akutantamuka cibi. Kusika lino ucisyomeka,+ nokuba kuti yebo usola kundipa+ kuti ndimunyonyoone* kakunyina kaambo.”
4 Pele Saatani wakavwiila Jehova kuti: “Lukanda kulukanda. Muntu uyoopa zintu zyoonse nzyajisi kutegwa avwune buumi bwakwe.
5 Pele lino, kotandabika janza lyako ujate zifwuwa anyama yamubili wakwe, ulabona ulakutukila kolangilila.”+
6 Aboobo Jehova wakaambila Saatani kuti: “Bona! Ngooyo uli mumaanza aako!* Pele utasoli kumujaya!”
7 Eelyo Saatani wakazwa kumbele* lya Jehova amane wakapa kuti Jobu abe azyuute zicisa kapati*+ kuzwa kunsi aamaulu aakwe kusikila akatwikkilo kamutwe wakwe.
8 Aboobo Jobu wakabweza lukaye kuti kalikwezya, alimwi wakali kukkala mubbunta lyamulota.+
9 Mukuya kwaciindi mukaintu wakwe wakamwaambila kuti: “Sena aino ucisyomeka? Komutukila Leza kutegwa ufwe buyo!”
10 Pele wakamuvwiila kuti: “Yebo waambaula mbuli mbobaambaula bamakaintu bafwubafwuba. Sena tweelede kutambula buyo zintu zibotu kuzwa kuli Leza mwini-mwini akutazizumina azyalo zintu zibi?”+ Muzintu zyoonse eezyi, Jobu tanaakabisya amulomo wakwe.+
11 Lino beenzinyina Jobu botatwe bakaamvwa mapenzi aaya oonse aakamusikila, aboobo bakayoboloka umwi aumwi kuzwa kubusena bwakwe—Elifazi+ muna Temani, Bilidadi+ muna Sua+ a Zofari+ muna Naamati. Aboobo bakapangana kuti baswaangane kutegwa baunke kuyoomubona Jobu akumuumbulizya.
12 Nibakamubona kulaale, tiibakamuzyiba pe. Aboobo bakatalika koongolola kulila, bakazapula zisani zyabo akuwaala mavwu mujulu alimwi aamitwe yabo.+
13 Mpoonya bakakkala ansi anguwe kwamazuba aali ciloba, isyikati amasiku. Kunyina wakali kwaamba jwi noliba lyomwe kulinguwe, nkaambo bakabona kuti wakamvwide kucisa kapati.+
Bupanduluzi buyungizyidwe
^ Maambilambali aamu Chihebrayo aamba bana ba Leza bangelo.
^ Mu Chihebrayo, “wabikka moyo wako ku.”
^ Naa “Mwaalumi uunyina kampenda alimwi mululami.”
^ Mu Chihebrayo, “ndimumene.”
^ Naa “munguzu zyako.”
^ Mu Chihebrayo, “kubusyu.”
^ Naa “azilonda zicisa kapati.”
