“Ikuti ncobeni koyanda kwiiya kujatikizya Leza, kokakatila kuli Bakamboni ba Jehova.” Ndakagambwa kumvwa majwi aaya. Aciindi eeco, kwakaindide ciindi cisyoonto kuzwa nondakatalika kwiiya a Bakamboni ba Jehova. Pele kutegwa mumvwisye cakapa kuti ndigambwe, amuleke ndimulwiide kujatikizya buumi bwangu.

 Ndakazyalilwa mudolopo lya Quezaltepeque mu El Salvador. Ndakali wacisambomwe akati kabana bali 15. Bazyali bangu bakasolekesya kundiyiisya kusyomeka alimwi akutobela milawo. Kuyungizya waawo, ba Leonardo alimwi a Bakamboni ba Jehova bamwi kanji-kanji bakali kuboola kutuyiisya Bbaibbele. Pele kunyina nondakali kuziyanda nzyondakali kuyiisyigwa, mane buya ndakatalika kulinjizya mumapenzi. Nindakajisi myaka iili 14, ndakatalika kunywa bukoko cakuciindizya alimwi akubelesya misamu iikola abeenzuma kucikolo. Beenzuma aaba bakacileka cikolo akunjila mukabunga kazigwebenga, andime ndakabatobela. Abuzuba twakali kujanika buyo mumigwagwa, kunyanga bantu mali alimwi akubba kutegwa tuule bukoko amisamu iikola.

 Kabunga kazigwebenga aaka wakaba ngomukwasyi wangu. Ndakali kusyomeka kulimbabo ziyume zitete. Mucikozyanyo, buzuba bumwi, umwi wamukabunga aaka iwakakoledwe amisamu wakauma simukoboma umwi. Nobakali kulwana, simukoboma wakamuzunda akwiita bamapulisa. Kandikalede kapati, ndakatalika kupwayaula mootokala wasimukoboma kwiinda mukubelesya nkoli iilema kutegwa amuleke mweenzuma. Nondakali kupwayaula mawindo akuunyonyoona mootokala oonse, simukoboma wakandikombelezya kuti ndicileke ncondakali kucita, pele tiindakamuswiilila.

 Nondakajisi myaka iili 18, kabunga kesu kazigwebenga kakalwana abamapulisa. Ciindi nondakali kuyanda kufwusa bbomba lyakulipangila, lyakabbolokela mujanza lyanu, tandizyi naa cakacitika buti. Ndakalijana buyo kuti ndalicisa kapati, mpoonya ndakanetuka. Nindakasinsimuka kucibbadela, ndakajana kuti bandikosola kwaanza kwakululyo, mpoonya kutwi kwakululyo kwakalilekede kubeleka, alimwi kwakasyeede aasyoonto kuti ndoofwaale kuliso lyakululyo.

 Nokuba kuti ndakaliliciside kapati, mbondakazwida buyo mucibbadela, ndakajoka kukabunga kazigwebenga. Tiilyakalampa, ndakaangwa akutolwa kuntolongo. Ookuya cilongwe cangu abamukabunga kazigwebenga cakayuma. Buzuba boonse, nkokuti kuzwa kuseeni twamana kufweba lubanje kusikila mane twaunka kukoona, twakali kucitila antoomwe zintu.

 Nindakali muntolongo, ba Leonardo bakandiswaya. Notwakali kubandika, bakatondeka ciganto cakali ajanza lyangu. Bakandibuzya kuti: “Sena ulicizyi ncozyaamba ziganto eezyi zyotatwe?” Ndakati: “Inzya, koonana, misamu iikola, akulikondelezya.” Pele ba Leonardo bakati: “Mebo inga ndaamba kuti cibbadela, ntolongo alimwi alufwu. Wakali mucibbadela alimwi lino uli muntolongo. Ulicizyi citobela.”

 Ncobakaamba ba Leonardo cakandiyumya mate. Bakaliluzi. Ndakali kulisyida cuumbwe kwiinda mubuumi mbondakali kupona. Ba Leonardo bakandaambila kuti kandiiya Bbaibbele ambabo, aboobo ndakazumina. Nzyondakaiya mu Bbaibbele zyakacinca buumi bwangu. Mucikozyanyo, Bbaibbele lyaamba kuti: “Kumvwana abantu babyaabi kupa kuti muntu aleke kulilemeka kabotu.” (1  Bakorinto 15:33, bupanduluzi buyungizyidwe) Aboobo cintu cakusaanguna ncondakacita, nkujana balongwe bapya. Ndakacileka kujanika kumiswaangano yakali kucitwa akabunga kazigwebenga, muciindi caboobo, ndakatalika kujanika kumiswaangano njobakali kucita Bakamboni ba Jehova muntolongo. Kumiswaangano ya Bakamboni, ndakajana mwaange wazina lya Andrés, iwakabbapatizyigwa kuba umwi wa Bakamboni ba Jehova kali muntolongo. Wakandilomba kuti katulida antoomwe cakulya camafwumofwumo. Kuzwa leelyo, ndakacileka kufweba lubanje kuseeni. Muciindi caboobo, mebo a Andrés twakali kubandika kapango kamu Bbaibbele lyoonse mafwumina.

 Tiilyakalampa, bamukabunga kazigwebenga bakabona kuti ndakatalikide kucinca. Aboobo, musololi umwi wakabunga aaka wakaamba kuti wakali kuyanda kubandika andime. Ndakayoowa. Tiindakazyi ncaakali kuyoondicita amvwa makanze aangu, nkaambo tacizumizyidwe naaceya kusiya kabunga kazigwebenga. Wakati: “Twabona kuti tocijaniki kumiswaangano yesu, muciindi caboobo ujanika kumiswaangano ya Bakamboni ba Jehova. Ino ujisi makanze nzi?” Ndakamwaambila kuti ndiyanda kuzumanana kwiiya Bbaibbele alimwi akucinca buumi bwangu. Cakandigambya ncakuti, wakandaambila kuti kabunga aaka inga kalemeka kusala kwangu lilikke buyo kuti kandiyandide ncobeni kuba umwi wa Bakamboni ba Jehova. Mpoonya wakati: “Kuti koyanda ncobeni kwiiya kujatikizya Leza, kokakatila kuli Bakamboni ba Jehova. Tulangila kuti uleke kucita zintu zibi. Wacita kabotu. Wasala nzila iiluzi. Bakamboni balakugwasya ncobeni. Ndakali kwiiya ambabo ku United States, alimwi bamwi mumukwasyi wangu Mbaakamboni ba Jehova. Utayoowi pe. Utajoki munsi.” Ndakaciliyoowede, pele aciindi nciconya, ndakalikkomene kapati. Mumoyo ndakamulumba kapati Jehova Leza. Ndakalimvwa mbuli kayuni kagwisyigwa mucizekwe, alimwi ndakaamvwisya majwi aa Jesu aakuti: “Muyoozyiba kasimpe, eelyo kasimpe kayoomwaangununa.”​—Johane 8:32.

 Balongwe bangu bamwi bakaindi, bakali kundisunka kwiinda mukundipa misamu iikola. Kwaamba masimpe, zimwi ziindi ndakali kuzumina. Pele mukuya kwaciindi, kwiinda mukupaila mipailo minji iizwa ansi aamoyo, ndakaileka micito mibi.​—Intembauzyo 51:10, 11

 Nondakaangununwa muntolongo, banji bakali kuyeeya kuti ndilajokela kubukkale bwangu bwakaindi, pele kunyina nindakacita oobo pe. Muciindi caboobo, ndakali kuunka kanji-kanji kuntolongo kutegwa ndikaambile baange nzyondakaiya kuzwa mu Bbaibbele. Kumamanino, ibakali beenzuma kaindi bakalibonena kuti ndakalicincide ncobeni. Cuusisya ncakuti oobo tabusyi mbocakabede akuli basinkondoma bakaindi.

 Buzuba bumwi notwakaunka kuyookambauka, cakutayeeyela twakazingulukwa ankamu yazingwebenga, zyakali kuyanda kundijaya. Ngondakali kubeleka limwi mubukambausi, cabulemu alimwi cabusongo wakabapandulwida kuti tindakacili kuzulilwa mukabunga kazigwebenga. Ndakasolekesya kukkazika moyo. Nobakamana kunduuma akundicenjezya kuti ndisowe kasamu ajongolo kubusena oobo, bakabikka zilwanyo zyabo akutuzumizya kuti tuunke. Masimpe Bbaibbele lyakabucinca buumi bwangu. Nkaambo naali mazuba aakaindi nindakajosya cibi. Pele lino ndilalutobela lulayo lwamu Bbaibbele luli ku 1 Batesalonika 5:​15: “Amubone kuti kutabi muntu naba omwe uupilusya cibi kumuntu uuli woonse, pele lyoonse amusungwaale kucita zibotu kubeenzinyoko alimwi akubantu boonse.”

 Kuzwa nindakaba umwi wa Bakamboni ba Jehova, ndilasolekesya kuba muntu uusyomeka. Nokuba boobo tiicali cuuba-uba. Pele kwiinda mukugwasyigwa a Jehova Leza, lulayo luzwa mu Bbaibbele, alimwi abalongwe bapya, ndacikonzya kuzwidilila. Kunyina nondiyanda naaceya kupilukila kubukkale bwangu bwakaindi.​—2 Petro 2:​22.

 Ndakali cigwebenga cikali. Ndilisinizyide kuti nindalifwide nindakazumanana abukkale obuya bubyaabi. Nzyondakaiya mu Bbaibbele zyakacinca buumi bwangu. Ndakaileka micito yangu mibyaabi. Ndaiya kubayanda aabo ibakali basinkondoma. (Luka 6:​27) Lino ndilikkomene kuba abalongwe ibandigwasya kuba abube bubotu. (Tusimpi 13:20) Ndipona buumi ibulaampindu, kumwi kandibelekela Leza iwakandilekelela zibi zyoonse nzyondakacita.​—Isaya 1:​18.

 Mu 2006, ndakanjila cikolo caalubazu cabakambausi Banakristo batakwete. Nikwakainda myaka, ndakazookwata, alimwi lino tujisi mwana musimbi. Lino ndibelesya ciindi cangu kuyiisya bamwi njiisyo zyamu Bbaibbele zyakandigwasya. Kunze lyaboobo, ndili mwaalu mumbungano yesu alimwi ndilasola kugwasya bakubusi kutantamuka micito njondakali kucita nindakali aciimo cabo. Muciindi cakulisyida cuumbwe, ndilibambila buumi butamani mbwaakasyomezya Leza mu Bbaibbele.