Peepe. Lyoonse tulatola lubazu mumulimo wakuŋanda aŋanda, pesi tatusyomi kuti mulimo ooyu nguupa kuti tukafwutuke. (Baefeso 2:8) Nkaambo nzi?

 Amuyeeye cikozyanyo eeci: Amweezyeezye kuti muntu ulaaluzyalo wakasyomezya kupa cipego cidula kumuntu uuli woonse uyoosika abusena bumwi mubuzuba bubikkidwe. Kuti kamucisyoma ncobeni cisyomezyo camuntu ooyo, sena inga mwaatobela malailile aakwe? Cakutadooneka, inga mwaatobela! Ambweni inga mwaambila beenzinyoko alimwi abamukwasyi kujatikizya coolwe eeco kutegwa abalo bakajane mpindu. Nokuba boobo, tamukonzyi kwaamba kuti mwacibelekela cipego eeco kwiinda mukutobela buyo malailile. Cipego ncipego, tacibelekelwi buya pe.

 Mbubwenya buyo, Bakamboni ba Jehova balasyoma mucisyomezyo ca Leza cabuumi butamani kuli boonse bamumvwida. (Baloma 6:23) Tulasolekesya kwaambila bamwi lusyomo lwesu, kutegwa abalo bajane mpindu muzisyomezyo zya Leza. Pele tatusyomi kuti lufwutuko lwesu lulaboola akaambo buyo kakubeleka mulimo wamumuunda. (Baloma 1:17; 3:28) Masimpe, kunyina muntu uukonzya kucita zyoonse ziyandika kutegwa apegwe zilongezyo eezyi kuzwa kuli Leza. ‘Wakatufwutula ikutali akaambo kamilimo iiluleme njotwakacita, pele akaambo kaluse lwakwe mwini.’​—Tito 3:5.