Yeeya eezi: Luyando nalilanga agilazi ulibona kali chivuvu. Ukkala kalibuzya kuti “Ndeelede kuchesya mubili wangu” nikuba kuti bazyali bakwe abeenzinyina bamubuzya kuti ulaamubili uulikabotu.

Luyando ulikuyeeya mbakonzya kuchesya mubili wakwe. Nchayanda kuchita nkulyiimya chakulya amwi mazuba . . .

Kuti kulimvwa mbuuli Luyando, kujana wachita biyeni?

Teekubi pe kukataazikana ambuboneka. Bbayibbele lyaambuula atala abaalumi abanakazi bakali babotu mbuuli Sara, Rakkele, Abbigayeli, Josefa aDavida. Bbayibbele lyaamba kuti Abbisagi wakali mwanakazi “mweebesi loko.”—1 Bami 1:4.

Nikuba boobo, bachikula biingi balalikataazya anzila njibabonekaayo. Eezi zilakonzya kubeetela mapenzi. Atulange-lange makani aatobela:

• Kuyanduulisisya kwakachitwa kwakatondeezya kuti mubasimbi bali 58 pesenti baamba kuti baneneede bali 17 pesenti mbabo baneneede.

• Alubo kumwi kuyanduulisisya kwakatondeezya kuti banakazi bali 45 pesenti bakali kubonaanga balineneede pesi bakalikotede.

• Kwiinda mukweezya kuchesya mibili, bachikula biingi bakajatwa abulwazi bwa-anorexia, bulwazi bujeya bupangwa akulyiimya chakulya.

 Kuti kuli apenzi lyakulyiimya chakulya naakuti bulwazi bwa-anorexia weelede kukumbila kuti ugwasigwe. Weelede kubuzya bazyali naakuti muntu ngusyoma. Bbayibbele lyaamba kuti: “Muzwalani ulayandisya kuziindi zyoonse, alimwi munyina wazyalilwa mapenzi.”—Tusimpi 17:17.

Buntu bwamukati mbubo bupa kuti muntu abote naakuti abije. Atulange-lange chikozyano chamwana waMwaami Davida Abbisalomu. Bbayibbele lyaamba kuti:

‘Taakwe muntu naba omwe iwakatembawulika kwiinda Abbisalomu kumakani aabweebesi. Kuzwa kundyato kusikila kumutwe taakalikwe kampenda.’—2 Samuele 14:25.

Abbisalomu wakali kulisumpula, kuyanda kubonwa alubo taakali kusyomeka! Bbayibbele talimwaambi kuti Abbisalomu wakali muntu uulikabotu pesi litondeezya kuti taakali kusyomeka pe akuti wakali kusulayika bamwi.

Nkinkaako Bbayibbele lituchenjezya kuti:

‘Mulisamike buntu bupya.’—BaKolose 3:10.

“Kulisakatizya kwanu kutabi kwaatala . . . , akube kwamukati kamoyo.”—1 Petro 3:3, 4.

Nikuba kuti teekubi pe kuyanda kuboneka kabotu pesi chintu chiyandikana nkuba abube bulikabotu. Kuba abube bulikabotu kuyoopa kuti bantu bakuyande kutali kuba achiwa chibotu. Musimbi utegwa Luzyalo wakati “Kuti kuli achiwa chibotu bantu balakonzya kukubona pesi balafwambaana kukuluba pesi kuti kuli abube bulikabotu bantu bayookkala kabakuyeeya.”

Ilakunyemya na nzila njubonekaayo?

Kuli mpunga wayeeya kubelesya mafuta aasalazya na, naakuti kulyiimya chakulya kuti uboneke kabotu?

Nikuli ulakonzya kulichincha, nziizili zintu nzwaali kunoochincha? (Yengela nzuyanda.)

• BULAMFU

• KUNENEYA

• MASUSU

• MBUUBONEKA MUBILI

• BUSYU

• KUSALALA

Kuti wasandula kuti iiyi kumibuzyo iili kumasaangunino naakuti weengela zintu zitatu naakuti zyiinda aawo kumubuzyo wachitatu, yeeya makani aaya: Kuli zintu zibotu bantu nzibabona kulinduwe kutali nzila njulibonaayo. Nkinkaako tuyelede kulikataazya loko pe atala anzila njubonekaayo.—1 Samuele 16:7.