Makani mabotu aazwa kuli Jehova, Leza ubotelwa ooyo uyanda kuti impuli kazibotelwa. (1 Timoteo 1:11) Nguwe wakatalisya lukwatano. Lukwatano lulaamulawo lulayandikana kuti mpuli kiibotelwa nkaambo lupa kuti bana bakkomezegwe kabotu munzila iilaa lukwabililo. BanaKristo beelede kuswiilila milawo yakoko nkubakkala yakulembesya lukwatano.​—Bala Luka 2:1, 4, 5.

Leza ulubona biyeni lukwatano? Uyanda kuti lube lujatano lutamani lwamwaalumi amwanakazi. Jehova uyanda kuti mwaalumi amwanakazi babe basyomeka kuli umwi aumwi wabo. (baHebrayo 13:4) Leza takuyandi kulekana. (Malaki 2:16) Pesi ulazumizya kuti balekane naa kuti umwi akwate naa kukwatwa lubo ikuti umwi wabo wacita bwaamu.​—Bala Matayo 19:3-6, 9.

Jehova wakalenga mwaalumi amwanakazi kuti kabagwasyaana mulukwatano. (Matalikilo 2:18) Mbukunga mwaalumi ngumutwe wampuli, nkikaako weelede kusololela kukwiisya mpuli atalaa Leza alimwi akubayandwiida ziyandikana. Weelede kuyanda banaakwe camoyo woonse. Baalumi abanakazi beelede kutondezyana luyando akulemekana. Akambo kakuti baalumi abanakazi tabamaninide pe, nkikaako kulekelelana kulayandikana kapati kuti lukwatano kalubotezya.​—Bala baEfeso 4:31, 32; 5:22-25, 33; 1 Petro 3:7.

Ikuti kakuli buyumu-yumu mulukwatano lwenu, moonse mweelede kuzumanana kutondezyaana luyando. (1 baKorinto 13:4, 5) IJwi lyaLeza talikusungwaazi kwanzaana mbuli nzila yakumana kutamvwanana ooko kuvulide mulukwatano.​—Bala 1 baKorinto 7:10-13.

Jehova uyanda kuti mubotelwe. Umupa lulayo lwiinda lwoonse ikuti mubotelwe mucindi cakukula. Uyanda kuti mugwasigwe abusongo aluzibo lwabazyali benu. (baKolose 3:20) Alubo Jehova uyanda kuti mubotelwe kwiinda mukucita zintu ziyandwaa Mulengi wenu, aMwanaakwe.​—Bala Mukambausi 11:9–12:1; Matayo 19:13-15; 21:15, 16.

Mweelede kubeleka canguzu kuti bana benu bajane cakulya, aakukkala, azyakuzwata. (1 Timoteo 5:8) Nikuba boobu ikuti bana benu kababotelwa, mweelede kubayiisya kuti bayande Leza akwiiya kulinguwe. (baEfeso 6:4) Meendelo eenu atondezya luyando kuli Leza alakonzya kuba cikozyanyo cibotu loko kubana benu. Malailile aayeme muBbaibble alakonzya kugwasya bana benu kuti babe akuyeeya kuli kabotu.​—Bala Deuteronomo 6:4-7; Tusimpi 22:6.

Bana balagwasikana ikuti kamubasungwaazya akubalumba. Alubo beelede kululamikwa akujana lulayo. Lulayo luli boobu lulabakwabilila mukucita zintu zikonzya kumana kubotelwa kwabo. (Tusimpi 22:15) Nikuba boobu, lulayo talweelede kubaa lunya.​—Bala baKolose 3:21.

Bakamboni baJehova balikumwaya mabbuku asiyene-siyene akonzya kugwasya bazyaali abana. Mabbuku aaya aambula atalaa zili muBbaibbele.​—Bala Intembauzyo 19:7, 11.