KuBa-efeso 4:1-32
4 Nkinkaako, ime ndimusungwa muMwaami, ndilikumukombelezya kuti mweende bweelede kweendelana akwiitwa nkumwakayitwaako,
2 akulibombya koonse amoyo uubombede, amoyo mulamfu, kamweetelelana muluyando,
3 kamweezya amanguzu aanu woonse kubamba kujatana kwamuuya, muchaanzyo chaluumuno.
4 Kuli mubili uumwi amuuya uumwi, mbuli mbumwakayitwa kubulangilizi bumwi bwakwiitwa kwanu,
5 Mwaami uumwi, lusyomo lumwi, kubbabbatizigwa kumwi,
6 Leza uumwi aTaata wabantu boonse, weendelezya bantu boonse, uubeleka mubantu boonse alubo uuli mubantu boonse.
7 Umwi awumwi wesu wakapegwa luzyalo lupati kweendelana ambaakamupimina Kkristu chipo eechi chitabbadalwi.
8 Nkaambo lugwalo lwaamba kuti: “Naakatanta kuya kujulu wakabweza basungwa; wakapa zipo mubantu.”
9 Bbala lyakuti “wakatanta” lyaambaanzi? Lyaamba kuti wakaseluka aansi, nkukwaamba aanyika.
10 Muntu ooyo wakaselukide, ngunguwe wakatanta kujulu kwiinda majulu woonse kuchitila kuti azuzikizye zintu zyoonse.
11 Alubo wakapa kuti bamwi babe baapostoli, bamwi babe bapolofita, bamwi babe bakambawusi,* bamwi babe beembeli abayiisi,
12 kuchitila kuti basalali balulamikwe,* bachite mulimu mumbungano, bayake mubili waKkristu,
13 kusikila toonse tujatane mulusyomo amuluzibo lwachoonzyo lwaMwana waLeza, tube muntu mupati kusikila tusike aakuba aachiimo chizwide chaKkristu.
14 Nkinkaako, atuleke kuchita mbuli bana, katuli kutontwa koonse-koonse amayuwe, akupupululwa ooku akookuya aluuwo loonse lwanjiisyo, kwiinda mubuchenjezu bwabantu anzila zyalweeno.
15 Pesi kwiinda mukwaamba kasimpe, atukomene muzintu zyoonse kwiinda muluyando muli yooyo uuli mutwe wesu, Kkristu.
16 Kuzwa kulinguwe, mubili woonse uliswaanizidwe kabotu-kabotu alubo ulikuchitwa kuti ubelekelaamwi kwiinda munswaanganino zyoonse ziwupa nzuuyanda. Kuti chipanzi chimwi achimwi chabeleka kabotu, mubili ulakomena akuliyaka awulikke muluyando.
17 Nkinkaako, nzindilikwaamba akupa bukamboni atala anzizyo muMwaami nzyakuti, tamucheelede kweenda mbuli mbubeenda bantu bazisi, beenda mubufuba-fuba bwamizeezo yabo.*
18 Mizeezo yabo ili mumudima alubo balaanzaanisidwe kubuumi buzwa kuli Leza akaambo kakutaziba kuli mulimbabo akutindibala kwamyoyo yabo.
19 Mbukunga tabachitilimuki pe nibabisya, bakalipeda kuti bachite michito iitondwa,* kuchitila kuti bachite zintu zyoonse zitasalali chabutangazu.
20 Pesi inywe, teemwakayiya kuti Kkristu mbabede oobu.
21 Nkaambo kwaamba choonzyo, mwakamumvwa alubo mwakayiisigwa kwiinda mulinguwe, mbukunga kasimpe kali muli Jesu.
22 Mwakayiisigwa kuti mugwisye buntu bwachiindi bweendelana aabuumi mbumwakali kupona chiindi, bulikupambanika kweendelana akulombozya kwabo kwalweeno.
23 Alubo mweelede kwiinkilila kunembo kuchitwa kuti mube bapya munzila njimuyeeyaayo,
24 alubo mweelede kuzwaata buntu bupya bwakalengwa kweendelana akuyanda kwaLeza mubululami bwachoonzyo amukusyomeka.
25 Nkinkaako, mbukunga lino mwalusowa lweeno, umwi awumwi wanu aambe choonzyo kuli simayakilane wakwe, nkaambo tuli zipanzi zyamubili uumwi.
26 Kuti mwanyema mutabisyi pe, mutabbizyi zuba kamunyemede,
27 mutamupi mweenya* Dyabbulosi.
28 Ooyo uubba, atachibbi lubo pe, pesi abeleke changuzu achite mulimu mubotu amaboko aakwe, kuchitila kuti ajane chimwi chintu chakupa ooyo uutakwe.
29 Mutazwi jwi libolede munkanwa lyanu, pesi amuzwe zibotu kupela, ziyaka bamwi kweendelana achiimo, kuchitila kuti zigwasye aabo balikuswiilila.
30 Alubo mutapi kuti muuya uusalala waLeza wuuse, ooyo ngumwakabikkwa chitondeezyo akaambo kabuzuba bwakwaangununwa kwiinda muchinunuzyo.
31 Amusowe misyobo yoonse yakulutila, kunyema, bukali, kupopota amajwi mabi, kuswaanizya achintu choonse chikonzya kuchisa bamwi.
32 Pesi amufwidilane luzyalo, mube aamoyo mutete, kamulekelelana amoyo woonse mbukunga anguwe Leza wakamulekelela aamoyo woonse kwiinda muli Kkristu.
Makani Aamunsi
^ Naakuti, “basikwaambilizya makani mabotu.”
^ Naakuti, “bayiisigwe.”
^ Naakuti, “mumizeezo yabo yabuyo.”
^ Naakuti “babisye kabatakwe bweeme.” ChiGrikki, a·sel′gei·a. Langa Bupanduluzi Bwamabala.
^ Naakuti, “mutamupi ndawu.”
