Makani mabotu aakalembwa aaMateyo 24:1-51
24 Jesu naakali kuzwa aatempele, basikwiiya bakwe bakasika kuti bazoomutondeezye mayake aatempele.
2 Mpawo wakati kulimbabo: “Mulizibwene na zintu zyoonse eezi? Kwaamba choonzyo, ndimubuzya kuti, taakwe bbwe litazoosiigwe aajulu aabbwenyina, kalitakolomwedwe pe.”
3 Naakakkede aaChilundu chama-Olifa, basikwiiya bakasika kulinguwe kakutakwe bantu mpawo bakati: “Tubuzye, zintu eezi zizoochitika lili alubo niinzi chitazoobe chitondeezyo chakubawo kwako* achamamanino aabwiime bwazintu?”*
4 Jesu wakabasandula kuti: “Amuchenjelele kuti kutabi muntu uumweena pe,
5 nkaambo bantu biingi bazoosika muzina lyangu kabati, ‘Ndime Kkristu’ alubo bazooyena bantu biingi.
6 Muzoomvwa atala ankondo amilumbe yankondo. Mutazooyoowi pe nkaambo zintu eezi zyeelede kuchitika pesi mamanino nga taanasika pe.
7 “Nkaambo chisi chizoobukila chimwi chisi, alubo bwaami buzoobukila bumwi bwaami alubo kuzooba nzala amizuzumo yanyika mundawu zisiyene-siyene.
8 Zintu zyoonse eezi, matalikilo aamapenzi aali mbuli kumyongwa kwamwanakazi uuyanda kutumbuka.
9 “Mpawo bantu bazoomutola kuti mukapenzegwe alubo bazoomujaya, alubo muzoozondwa aazisi zyoonse akaambo kazina lyangu.
10 Mpawo biingi bazoolebwa, alubo bazoowuzyania akuzondana.
11 Kuzooba bapolofita biingi bakubeja alubo bazooyena bantu biingi,
12 alubo luyando lwabantu biingi luzootontola akaambo kakuvula kwabubi.
13 Pesi ooyo uulisimya kusikila kumamanino, uzoofutulwa.
14 Alubo, aaya makani mabotu aaBwaami, azookambawukwa munyika yoonse kuti bube bukamboni kuzisi zyoonse, mpawo mamanino azoosika.
15 “Nkinkaako, mwaakubona chintu chisesemya cheeta lunyonyooko chakaambwa aamupolofita Daniyele, kachiimvwi aandawu iisalala (ooyo uubala abelesye maanu),
16 mpawo aabo bali muJudiya abasaangune kuchijila kuzilundu.
17 Muntu uuli aajulu aang’anda, ataselukili kuyoobweza zintu zili mung’anda yakwe,
18 alubo muntu uuli mumuunda, atabweedi musule kuti akabweze chigogo chakwe chaajulu.
19 Bali aapenzi banakazi banooli aamada abanoonyonsya mumazuba aayo!
20 Amwiinkilile kunembo kukombela kuti, mutazoochiji muchiindi champeyo naakuti mubuzuba bwaSabata.
21 Nkaambo kuzooba mapenzi mapati aatanaba aabuzuba achitika kuzwa kumatalikilo aanyika kusikila sunu, alubo taazoochitiki lubo pe.
22 Kwaamba choonzyo, kuti mazuba aayo taafwiinsigwa, taakwe muntu uutazoofutulwe pe, pesi akaambo kabaabo basalidwe, mazuba aayo azoofwiinsigwa.
23 “Mpawo kuti umwi muntu wamubuzya kuti: ‘Amubone! Ngoyu Kkristu,’ naakuti wati, ‘Nguulya aalya,’ mutasyomi pe.
24 Nkaambo kuzooba baKkristu bakubeja abapolofita bakubeja alubo bazoochita zitondeezyo zipati azigambyo kuti beezye kweena basalidwe kuti kazichita.
25 Amubone! Ndamuchenjezya kakuchili chiindi.
26 Nkinkaako, kuti bantu bamubuzya kuti: ‘Amubone! Uli munkanda,’ mutayinki pe, alubo kuti bati, ‘Amubone! Uli mumaanda aamukati,’ mutasyomi pe.
27 Nkaambo mbuli kulaba kwakalabi kamweka kuzwa kubuzwezuba kusikila kububbila, akubawo* kwaMwanaamuntu mbukutazoobe.
28 Kufumbwa kuli munyama* uufwide, nkuko nkwaatazoobungane magumbe.
29 “Mbaatamane biyo mapenzi aamazuba aayo, zuba lizoochitwa kuti lisiye alubo mweezi tawuzoomuniki pe, nyenyeezi zizooloka kuzwa kujulu alubo manguzu aakujulu azoozunganisigwa.
30 Mpawo chitondeezyo chaMwanaamuntu chizooboneka kujulu alubo bantu bamisyobo yoonse yaanyika bazoolyuuma aatwaango kabalikulila akaambo kakuusa, alubo bazoobona Mwanaamuntu kaza aamayoba aakujulu kali aamanguzu abulemu bupati.
31 Alubo uzootuma ngilozi zyakwe akulila kwamweembo kupati, mpawo zizoobunganizya bantu bakwe basalidwe, kuzwa kumabazu aane,* kuzwa kumagolelo amwi aajulu kusikila kulaamwi magolelo.
32 “Amwiiye chikozyanisyo eechi kuzwa kumukuyu: Mbuutabe aantabi mpya akusyuuka matu, nga mwaziba kuti mayinza abaafwiifwi.
33 Munzila iikozyenie, andinywe kuti mwazoobona zintu zyoonse eezi, amuzibe kuti waba aafwiifwi, aamilyango.
34 Kwaamba choonzyo, ndimubuzya kuti, zyalani eeli talizooyindi pe kusikila zintu zyoonse eezi zichitike.
35 Julu anyika zizooyinda pesi majwi aangu taazooyindi pe.
36 “Taakwe muntu uubuzi pe buzuba a-awa nizitazoochitike zintu eezi, niziba ngilozi zyakujulu, naaba Mwana, pesi Taata alikke.
37 Nkaambo mbuli mbukwakabede mumazuba aaNowa, akubawo* kwaMwanaamuntu mbukutazoobe.
38 Nkaambo mbuli mbubakabede mumazuba aayo Zambangulwe kalitanasika, bantu bakali kulya akunywa, baalumi bakali kukwata alubo banakazi kabali kukwatwa, kusikila mubuzuba oobo Nowa mbwaakanjila mubwaato,
39 alubo teebakaba aandaba pe kusikila nilyakasika Zambangulwe akubakukula boonse, akubawo kwaMwanaamuntu mbukutazoobe.
40 Mpawo baalumi babili banooli mumuunda, umwi uzoobwezegwa alubo umwi uzoosiigwa.
41 Banakazi babili banooziya aaziyo, umwi uzoobwezegwa alubo umwi uzoosiigwa.
42 Nkinkaako, amukkale kamulindide, nkaambo tamubuzi pe buzuba Mwaami wanu mbwatazoosike.
43 “Pesi amuzibe chintu eechi: Kuti mwining’anda kazi kuti sikubba usika lili,* walikunookkala kalangide, kuchitila kuti sikubba atanjili mung’anda yakwe.
44 Akaambo kakaambo aaka, andinywe amulibambile nkaambo Mwanaamuntu ulasika ku-awa njimutayeeyeli pe.
45 “Ngwani loko muzike uusyomeka alubo uuchenjede,* ooyo wakasalwa aasimalelaakwe kuti alanganie bamung’anda yakwe, kuti abape chakulya chabo aachiindi cheelede?
46 Ulabotelwa muzike ooyo kuti aazoosika simalelaakwe, azoojane kachita mbuboobo!
47 Kwaamba choonzyo, ndimubuzya kuti, uzoomusala kuti alanganie zintu zyakwe zyoonse.
48 “Pesi kuti muzike ooyo mubi waamba kuti mumoyo wakwe: ‘Simalelaangu wanonoka,’
49 mpawo wasaanguna kuuma bazikenyina akulya akunywa abasibukande bazibinkene,
50 simalelaakwe uzoosika mubuzuba mbwatayeeyeli pe amu-awa njatazi pe,
51 mpawo uzoomupa chisubulo chipati akumupa ndawu yakwe aamwi abasikuupa-wupa. Ooko nkuko nkwatazoolilile akulumina ntwinyo.
Makani Aamunsi
^ Langa Bupanduluzi Bwamabala.
^ Naakuti, “aachiindi.” Langa Bupanduluzi Bwamabala.
^ Langa Bupanduluzi Bwamabala.
^ Naakuti, “muntu.”
^ MuchiGrikki, “kumyuuwo iine.”
^ Langa Bupanduluzi Bwamabala.
^ Naakuti, “chiindi chili chamansiku.”
^ Naakuti, “musongo.”
