KuMahebberu 10:1-39
10 Nkaambo mbukunga Mulawu mweenzule wazintu zibotu zilikuza, kutali chintu chili nchicho chazintu eezyo, tawukonzyi pe* kupa kuti aabo baswena kuli Leza bamaninine kwiinda muzipayizyo zikozyenie zipegwa munyaka amunyaka.
2 Kaansinga mbukubede, zipayizyo teezyalikunooleka na kupegwa? Nkaambo aabo babeleka mulimu uusalala kuti basalazigwa biyo, myoyo yabo tayichibapi mulandu pe akaambo kazibi zyabo.
3 Pesi zipayizyo eezi zibayeezya zibi zyabo munyaka amunyaka,
4 nkaambo tazichiti pe kuti ganzi lyabapule bang’ombe alyampongo ligwisye zibi.
5 Nkinkaako, naza munyika waamba kuti: “‘Chipayizyo achipo teewakaziyanda pe, pesi wakandibambila mubili.
6 Teewakazitambula pe zipayizyo zitentwa bukkwene azipayizyo zyazibi.’
7 Mpawo ndakati: ‘Bona! Ndasika (mubbuku lyakupeta kulilembedwe atala andime) kuti ndizoochite kuyanda kwako O Leza.’”
8 Naakaamba kuti: “Teewakaziyanda pe nikuba kuzitambula zipayizyo azipo, azipayizyo zitentwa bukkwene azipayizyo zyazibi”—nkukwaamba zipayizyo zipegwa kweendelana aMulawu—
9 mpawo wakati: “Bona! Ndasika kuti ndizoochite kuyanda kwako.” Ugwisya chakusaanguna kuchitila kuti abikke chachibili.
10 Kwiinda ‘mukuyanda’ ooku, twakasalazigwa kwiinda muchipayizyo chamubili waJesu Kkristu chakapegwa kamwi biyo.
11 Alubo, mupayizi woonse ulayimikila buzuba abuzuba kuti achite mulimu uusalala,* akuti ape zipayizyo zikozyenie chiindi choonse, zitakonzyi kugwisya zibi chakumaninina.
12 Pesi muntu ooyu wakapa chipayizyo chimwi akaambo kazibi, kamwi biyo alubo wakakkala aansi kukuboko kwachilisyo kwaLeza,
13 kuzwa kuchiindi eecho, ulikulindila kusikila basinkondonyina babe mbuli chilyatililo chamawulu aakwe.
14 Nkaambo kwiinda muchipayizyo chimwi biyo nchaakapa, wapa kuti aabo balikusalazigwa bamaninine kukabe kutamani.
15 Mukuyungizya, anguwo muuya uusalala ulikupa bukamboni kulindiswe, nkaambo kusaanguna waamba kuti:
16 “‘Eechi nchicho chizuminano nchinditazoochite ambabo aakwiinda mazuba aayo,’ mbaamba Jehova.* ‘Ndizoobikka milawu yangu mumyoyo yabo alubo ndizooyilemba mumizeezo yabo.’”
17 Mpawo uzoowambe kuti: “Alubo tandizooziyeeyi lubo pe zibi zyabo alubo michito yabo mibi tandizooyiyeeyi lubo pe.”
18 Kuti zintu eezi zyalekelelwa, nga takuchikwe chipayizyo chazibi pe.
19 Nkinkaako bakombima, mbukunga tuli aachibindi chakweenda* munzila iitunjizya mundawu iisalala, kwiinda muganzi lyaJesu,
20 iili njiinzila iipona njaakatujulila* naakanjila mukketeni, nkukwaamba mubili wakwe,
21 alubo mbukunga tuli aamupayizi mupati weendelezya ng’anda yaLeza,
22 atuswene aafwiifwi amyoyo yoonse alusyomo lumaninide, katuli aamyoyo yakasansiilwa akusalazigwa kuchitila kuti tutabi aamoyo* mubi alubo mibili yesu kayili yasanzigwa aamaanzi aasalala.
23 Atujatisisye kukwaambilizya bulangilizi bwesu aantanganana katutazungaani pe, nkaambo ooyo wakasyomezya ulasyomeka.
24 Alubo atuyeeyane,* kuchitila kuti tusungwaazyanie* kuba aaluyando akuchita milimu mibotu,
25 tutaleki pe kubunganaamwi, mbuli mbubayandisya kuchita bamwi, pesi tusungwaazyanie, kapati mbuli mbumubwene kuti buzuba bwaswena aafwiifwi.
26 Nkaambo, kuti katuli aachiimbo chakuchita chibi achaali kakuli twakajana luzibo lwachoonzyo lwakasimpe, taachikwe chimwi chipayizyo chazibi chasyaala pe,
27 pesi kuli bulangilizi buyoosya bwalubeta abukali buyaka, butazoonyonyoone aabo bakazya.
28 Muntu uubaansya Mulawu waMozesi ulafwa kateetelelwi pe kubukamboni bwabantu babili naakuti batatu.
29 Mubonaanga weelela kupegwa chisubulo chipati biyeni muntu walyatuuka Mwana waLeza alubo wabona kuti ganzi lyachizuminano ndyaakasalazigwa aandilyo ndyabuyo alubo wanyemya muuya waluzyalo lupati kwiinda mukuunyansya?
30 Nkaambo tulimuzi Ooyo wakaamba kuti: “Kubweedezya nkukwangu, ndizoobapa zibeelede.” Akuti: “Jehova* uzoobeteka bantu bakwe.”
31 Nchintu chiyoosya kuwida mumaboko aaLeza uupona.
32 Nikuba oobo, amukkale kamwaayeeya mazuba aachiindi nimwakazwa aakumunikilwa, mwakalisimya munkondo mpati amumapenzi.
33 Aali chimwi chiindi, mwakali kubikkwa aantanganana* kuti musampulwe akuti mupenzegwe, alubo aali chimwi chiindi, mwakalaamwi abaabo bakali kuswaana zyiimo eezi.
34 Nkaambo mwakabeetelela aabo bakali mujele, alubo mwakazumina kubbidwa zintu zyanu kamubotelwa, mbukunga mulizi kuti inywe mulaazintu zibotu zitamani.
35 Nkinkaako, mutachisowi pe chibindi chanu, chitazoope* kuti mujane bulumbu bwiingi.
36 Nkaambo mweelede kulisimya, kuchitila kuti mwamana kuchita kuyanda kwaLeza, mutambule kuzuzikizigwa kwachisyomezyo.
37 Nkaambo “muchiindi chifwiifwi biyo,” alubo “ooyo uulikuza uzoosika alubo takoononoka pe.”
38 “Pesi mululami wangu uzoopona akaambo kalusyomo,” alubo “kuti wabweeda musule, tandibotelwi pe anguwe.”
39 Iswe tatuli baabo babweeda musule kukunyonyoonwa, pesi tuli baabo bali aalusyomo kuchitila kuti buumi bwesu bufutulwe.
Makani Aamunsi
^ Amwi malembe ati, “bantu tabakonzyi pe.”
^ Naakuti, “mulimu wakugwasya bantu.”
^ Langa Bupanduluzi Bwamabala.
^ Naakuti, “tatuyoowi kweenda.”
^ Naakuti, “njaakasaanguna.”
^ Bbala lyakuti ‘moyo,’ aawa lyaamba kuziba chibotu achibi. Langa Bupanduluzi Bwamabala, “Moyo.”
^ Naakuti, “atube aandaba kuli umwi awumwi.”
^ Naakuti, “tubusilizyanie.”
^ Langa Bupanduluzi Bwamabala.
^ MuchiGrikki, “kubikkwa aantanganana mbuli kuti muli mubbuwa lyazisobano.”
^ MuchiGrikki, “mutalusowi pe lwaangunuko lwanu lwakwaambuula lutazoope.”
