Makani Aakalembwa aaLukka 22:1-71
-
Bapayizi bayanduula nzila yakujaya Jesu (1-6)
-
Kulibambila Pasika yamamanino (7-13)
-
Kutalika Chilalilo chaMwaami (14-20)
-
‘Sikunduuzya ulaamwi andime aatebbulu’ (21-23)
-
Kukazyania atala akuti ngwani mupati (24-27)
-
Chizuminano chaJesu chabwaami (28-30)
-
Petro wabuzigwa kuti uzookaka Jesu (31-34)
-
Mbukuyandikana kulibambila; mapanga aabili (35-38)
-
Nkombyo yaJesu kuChilundu chama-Olifa (39-46)
-
Jesu wasungwa (47-53)
-
Petro wakaka Jesu (54-62)
-
Jesu wafubaazigwa (63-65)
-
Kubetekwa muNkuta Mpati yamaJuda (66-71)
22 Pobwe lyaZinkwa Zitakwe Bumena lyiitwa kuti Pasika, lyakali lyaba aafwiifwi.
2 Alubo bapati babapayizi abalembi bakali kuyanduula nzila iilikabotu yakumujaya nkaambo bakali kuyoowa bantu.
3 Mpawo Saatani wakanjila muli Judasi, ooyo uutegwa Isikkariyoti, wakali umwi wabali Kkumi Ababili.
4 Mpawo wakayinka waakwaambuula aabapati babapayizi abapati babalindi batempele kuti ulamuuzya biyeni kulimbabo.
5 Bakabotelwa loko nibakamvwa oobo alubo bakazuminana kumupa mali yansiliva.
6 Nkinkaako, wakazumina mpawo wakasaanguna kuyanduula mweenya uuli kabotu wakuti amuuzye kulimbabo kakutakwe nkamu yabantu.
7 Buzuba bwaPobwe lyaZinkwa Zitakwe Bumena bwakasika, aawo nikweelede kupayizigwa chipayizyo chaPasika.
8 Nkinkaako, Jesu wakatuma Petro aJohane kati: “Amwiinke mukatubambile Pasika tuzoolye.”
9 Mpawo bakati kulinguwe: “Nkuukuli nkuyanda kuti tukalibambile Pasika?”
10 Wakati kulimbabo: “Amubone! Kuti mwanjila mumuunzi, mulaswaana mwaalumi uunyampwide nongo yamaanzi. Amumutobele mukanjile mung’anda njatakanjile.
11 Mpawo mubuzye mwining’anda kuti, ‘Muyiisi wati kulinduwe: “Ili kuli ng’anda yabeenzu njindikonzya kulida Pasika abasikwiiya bangu?”’
12 Mpawo mwaalumi ooyo uzoomutondeezya ng’anda mpati yamujulu, iibambidwe kabotu. Amutubambile Pasika mumoomo.”
13 Nkinkaako, bakazwa bayinka mpawo bakaakuzijana kazili mbuli mbaakababuzizye mpawo bakalibambila Pasika.
14 Nichakasika chiindi, wakakkala aatebbulu abaapostoli.
15 Mpawo wakati kulimbabo: “Ndali aachiyandisyo chipati chakuti ndiyilye aandinywe Pasika kanditanapenzegwa,
16 nkaambo ndimubuzya kuti, tandizooyilyi lubo pe kusikila ikazuzikizigwe muBwaami bwaLeza.”
17 Mpawo naakatambula nkomeki, wakalumba mpawo wakati: “Amubweze nkomeki eeyi mutambikizyanie,
18 nkaambo ndimubuzya kuti, kuzwa lino tandizooyinywi lubo pe wayini yamasaansa kusikila buzoosike Bwaami bwaLeza.”
19 Alubo wakabweza chinkwa, walumba, wachikwamuna, wabapa kati: “Eechi chiiminina mubili wangu uutazoopegwe akaambo kandinywe. Amukkale kamuchita oobu kamundiyeeya.”
20 Nibakamaninsya kulya chilalilo, wakachita zikozyenie akunkomeki, kati: “Nkomeki eeyi yiiminina chizuminano chipya chibawo kwiinda muganzi lyangu litazootilwe akaambo kandinywe.
21 “Pesi amubone, kuboko kwasikunduuzya kulaamwi andime aatebbulu.
22 Nkaambo kwaamba choonzyo, Mwanaamuntu ulikwiinka kweendelana azyakaambwa, pesi ulaapenzi muntu uuzya Mwanaamuntu!”
23 Mpawo basikwiiya bakasaanguna kubuzyania aakati kabo kuti ngwani loko wakali kuyanda kuchita zintu eezi.
24 Nikuba oobo, kwakaba kukazyania kupati aakati kabo atala akuti ngwani wakali kubonwa kuti mupati kwiinda boonse.
25 Pesi wakati kulimbabo: “Baami bazisi bachita mbuli mbubayanda kubantu alubo aabo beendelezya bamwi bazibidwe kuti Mbaasikuchita Zibotu.
26 Nikuba oobo, inywe teembumweelede kuba pe. Pesi mupati kwiinda boonse aakati kanu, abe mbuli muniini kwiinda boonse alubo ooyo uumuzulwida, abe mbuli mubelesi.
27 Nkaambo ngwani mupati, ooyo uulikulya aatebbulu* naakuti ooyo weeta chakulya?* Teeyooyo na uulikulya aatebbulu?* Pesi ime ndili aakati kanu mbuli ooyo uulikweeta chakulya.*
28 “Nikuba oobo, inywe ndinywe mwakakakatila aandime mumasunko aangu,
29 alubo ndilikuchita chizuminano andinywe, mbuli Taata mbaakachita chizuminano chabwaami andime,
30 kuchitila kuti mukalye akunywa aatebbulu lyangu muBwaami bwangu akuti mukakkale aazyuuno zyabwaami kuti mubeteke misyobo iili 12 ya-Israyeli.
31 “Simoni, Simoni, bona! Saatani ulikwaamba kuti ulikumuyanda moonse kuti amupupulule mbuli wiiti.
32 Pesi ndakukombelezezya munkombyo kuti lusyomo lwako lutamani pe alubo nwaabweeda, ukasimye bakombinyokwe.”
33 Mpawo wakati kulinguwe: “Mwaami, ndililibambilide kwiinka aanduwe mujele amulufu.”
34 Pesi Jesu wakati: “Petro, ndikubuzya kuti, mukombwe tawukookokolika pe sunu, kusikila ukazye kwaziindi zitatu kuti ulindizi.”
35 Alubo wakababuzya kuti: “Nindakamutumide kamutakwe chikwama chamali achikwama chakubikkila chakulya amanyatela, kuli nchimwakabula na?” Bakati: “Peepe.”
36 Mpawo wakababuzya kuti: “Pesi ooyo ulaachikwama chamali achibweze, ayooyo uuli aachikwama chakubikkila chakulya achibweze alubo ooyo uutakwe panga awuzye chigogo chakwe chaajulu awule panga.
37 Nkaambo ndimubuzya kuti, makani aakalembwa ayelede kuzuzikizigwa kulindime aakuti, ‘Wakabalwaamwi abantu bataswiilili mulawu.’ Nkaambo eezi zilikuzuzikizigwa atala andime.”
38 Mpawo bakati: “Mwaami, bona! Ngaya mapanga aabili.” Pesi wakati kulimbabo: “Alikkwene ngayaaya.”
39 Naakazwa mpawaawo, wakaya kuChilundu chama-Olifa mbuli mbaakazibide kuchita alubo basikwiiya bakamutobela.
40 Naakasika aandawu eeyo, wakati kulimbabo: “Amwiinkilile kunembo kukomba, kuchitila kuti mutanjili mumasunko.”
41 Mpawo wakazwa mpubakabede, weenda musinzo uuli mbuli aasika bbwe lyawaalwa mpawo wakafugama wasaanguna kukomba,
42 kati: “Taata, kuti kuyanda, gwisya nkomeki eeyi kulindime. Nikuba oobo, kutachitiki kuyanda kwangu pe pesi akuchitike kuyanda kwako.”
43 Mpawo ngilozi iizwa kujulu yakaboneka kulinguwe alubo yakamusimya.
44 Pesi wakakataazikene loko zyakuti wakayinkilila kunembo kakomba amoyo woonse alubo zitukuta zyakwe zyakaba mbuli malosi aaganzi aalokela aansi.
45 Naakazwa aakukomba, wakanyampuka wayinka kuli basikwiiya bakwe mpawo wakabajana kabalikuguna alubo kabakatede akaambo kakuusa.
46 Mpawo wakati kulimbabo: “Nkamboonzi nimulikoona? Amubuke, mwiinkilile kunembo kukomba, kuchitila kuti mutanjili mumasunko.”
47 Kachaambuula, lino bona, kwakasika nkamu yabantu yakali kuzulwidwa aamwaalumi uutegwa Judasi, ooyo wakali umwi wabali Kkumi Ababili alubo wakasika kuli Jesu kuti amumyonte.
48 Pesi Jesu wakati kulinguwe: “Judasi, ulikuuzya Mwanaamuntu kwiinda mukumumyonta na?”
49 Aabo mbaakali aabo, nibakabona zyakali kuyanda kuchitika, bakati: “Mwaami, tubalwane aapanga na?”
50 Nikuba oobo, umwi wabo wakakwapula kutwi kwachilisyo kwamuzike wamupayizi mupati.
51 Pesi Jesu wakati: “Kwakkwana.” Mpawo wakajata kutwi kwakwe wamuponia.
52 Mpawo Jesu wakabuzya bapati babapayizi abapati babalindi batempele abaalu bakali bazida nguwe nkukooko kuti: “Mwaza aamapanga ankoli mbuli kuti mwazida chigwebenga na?
53 Nindakali aandinywe mutempele buzuba abuzuba teemwakandijata pe. Pesi eeyi ni-awa yanu ayabweendelezi bwamudima.”
54 Mpawo bakamusunga bayinkaawe alubo bakanjilaawe mung’anda yamupayizi mupati pesi Petro wakali kuyabutobela kali kule-kule.
55 Nibakakunka mulilo aakati kalubuwa akukkala aansi kabalaamwi, anguwe Petro wakalikkede aakati kabo.
56 Pesi umwi musimbi mubelesi, naakamubona kakkede aamulilo wakali kuyaka, wakamulangisisya mpawo wakati: “Mwaalumi ooyu walaamwi anguwe.”
57 Pesi wakakaka kati: “Yoomwanakazi, tandimuzi pe me muntu ooyu.”
58 Nikwakayinda chiindi chifwiifwi, umwi wakamubona mpawo wakati: “Anduwe uli umwi wabo.” Pesi Petro wakati: “Iwe, tandili umwi wabo pe me.”
59 Alubo nikwakayinda chiindi chisika ku-awa iimwi, umwi mwaalumi wakasaanguna kusimatizya kwaamba kuti: “Mwaalumi ooyu wakalaamwi aJesu nkaambo kwaamba choonzyo, uzwa kuGalili!”
60 Pesi Petro wakati: “Iwe, nzulikwaamba tandizizi pe me.” Aachiindi nchicheecho kachaambuula, mukombwe wakakokolika.
61 Mpawo Mwaami wakachengunuka alubo wakalangisisya Petro, mpawo Petro wakayeeya majwi Mwaami ngaakamubuzizye aakuti: “Mukombwe kawutanakokolika sunu, ulandikaka tutatu.”
62 Mpawo wakazwa aanze waakulila loko.
63 Bantu bakasungide Jesu bakasaanguna kumufubaazya kabalikumuuma
64 alubo nibakamuvumba kumeso bakali kumubuzya kuti: “Polofita! Ngwani wakuuma?”
65 Alubo bakaamba zimwi zintu zyiingi zyakumusampula.
66 Nibwakacha, nkamu yabaalu babantu, nkukwaamba bapati babapayizi abalembi, bakabunganaamwi alubo bakamutola muNkuta Mpati yamaJuda mpawo bakati:
67 “Kuti kuli Kkristu tubuzye.” Pesi Jesu wakati kulimbabo: “Nikuba kuti ndamubuzya, tamukoosyoma kale pe.
68 Alubo kuti ndamubuzya mubuzyo, tamukoowusandula pe.
69 Nikuba oobo, kuzwa lino Mwanaamuntu unookkede kukuboko kwachilisyo kwaLeza kuli aamanguzu.”
70 Mpawo boonse bakati: “Uli Mwana waLeza na?” Wakati kulimbabo: “Ndinywe mwandaamba oobo.”
71 Mpawo bakati: “Kuchili bumwi bukamboni na mbutuchiyanda? Nkaambo iswe twalimvwida kaamba amulomo wakwe.”
Makani Aamunsi
^ Naakuti, “uukkede aatebbulu.”
^ Naakuti, “uulikumubelekela.”
^ Naakuti, “uukkede aatebbulu.”
^ Naakuti, “uulikumubelekela.”
