Lugwalo lwaJakkobo 1:1-27
1 Ndime Jakkobo, muzike waLeza awaMwaami Jesu Kkristu, ndilikulembela misyobo iili 12 iimwayikide koonse-koonse:
Ndilikumujuzya!
2 Amukondwe bakombima, chiindi nimuswaana masunko aasiyene-siyene,
3 mbukunga mulizi kuti, kuti lusyomo lwanu lwasunkwa munzila iili boobu, lupa kuti mulisimye.
4 Pesi amulekele kulisimya kuti kumaninsye mulimu wako, kuchitila kuti mumaninine akuti muchite kabotu muzintu zyoonse, kakutakwe nchimubula pe.
5 Nkinkaako, kuti umwi wanu katakwe busongo, ayinkilile kunembo kubukumbila kuli Leza, mpawo ulabupegwa nkaambo Leza ulabapa boonse amoyo woonse katabasampawuli* pe.
6 Pesi ayinkilile kunembo kukumbila kalaalusyomo, katazumbuuzyi naaba aaniini, nkaambo muntu uuzumbuuzya uli mbuli mayuwe aamulwizi, aatontwa aaguwo akutolwa koonse-koonse.
7 Kwaamba choonzyo, muntu ooyo teelede kulangilila kutambula chimwi chintu kuzwa kuli Jehova.*
8 Ulaamyoyo iibili alubo takkalinkene pe munzila zyakwe zyoonse.
9 Pesi mukombima waansaansi abotelwe* akaambo kakusumpulwa kwakwe,
10 alubo ooyo uunotede abotelwe akaambo kakuchesegwa kwakwe, nkaambo uzooyinda mbuli duba lyamulusaka.
11 Nkaambo mbuli mbulipasuka zuba akupya kwalyo akupa kuti chilimwa chipusame, akuti duba lyacho liloke akuti bubotu bwacho bwakunze bumane, anguwe muntu uunotede mbatazoobe, uzooloba muzintu nzyaliyandwiida.
12 Ulabotelwa muntu wiinkilila kunembo kulisimya mumasunko, nkaambo kuti watambulika, uzootambula bulumbu bwabuumi,* oobo Jehova* mbwaakasyomezya aabo bayinkilila kunembo kumuyanda.
13 Chiindi muntu nalikusunkwa, ataambi kuti: “Ndilikusunkwa aaLeza.” Nkaambo Leza tasunkwi aazintu zibi pe, alubo anguwe tasunki muntu pe.
14 Pesi umwi awumwi ulasunkwa kwiinda mukukwelelezegwa amukoongelezegwa* aachiyandisyo chakwe.
15 Mpawo kuti chiyandisyo eecho chakomena,* chizyala chibi, mpawo kuti chibi chachitwa, cheeta lufu.
16 Muteenwi pe nibakombima bayandwa.
17 Zipo zyoonse zibotu azipo zyoonse zimaninide zizwa kujulu, kaziseluka kuzwa kuli Taata wamimuni yakujulu, uutasanduki naakuti kuchincha mbuli myeenzule iichincha-chincha.
18 Nguwe wakayanda kuti tubewo kwiinda mujwi lyakasimpe, kuchitila kuti tube imwi michelo yakusaanguna yazilenge zyakwe.
19 Nibakombima bayandwa, amuzibe zintu eezi: Muntu woonse weelede kufwambaana kuswiilila, anonoke kwaambuula, anonoke kunyema,
20 nkaambo kunyema kwamuntu takweeti bululami bwaLeza pe.
21 Nkinkaako, amugwisye kutasalala koonse abubi boonse,* alubo amukutambule amoyo uubombede kubyalwa kwajwi likonzya kumufutula.
22 Nikuba oobo, amube basikuchita zyaambwa aajwi, kutali basikumvwa kupela, kamulyeena amizeezo yakubeja.
23 Nkaambo kuti muntu kalisikumvwa zyaambwa aajwi kupela pesi katali sikuzichita, uli mbuli muntu uulilanga kumeso mugilazi.
24 Nkaambo ulalilanga, mpawo aamaninsya ulayinka, alubo ulafwambaana kuluba kuti muntu uulibiyeni.
25 Pesi ooyo uulangisisya mumulawu uumaninide walwaangunuko akwiinkilila kunembo mulinguwo, waba sikuchita mulimu, kutali sikumvwa uuluba, alubo unoobotelwa muzintu nzyachita.
26 Kuti muntu kayeeya kuti mukombi waLeza, pesi katanyoni lulimi lwakwe,* uliikulyeena mumoyo wakwe alubo bukombi bwakwe mbwabuyo.
27 Bukombi busalala alubo butakwe doti mumeso aaLeza wesu Taata, mboobu: kugwasya bamuchaala abamukabafu mumapenzi aabo akukkala katutakwe kabata kazwa munyika.
Makani Aamunsi
^ Naakuti, “katabajanini mulandu.”
^ Langa Bupanduluzi Bwamabala.
^ MuchiGrikki, “alidunde.”
^ Naakuti, “musini wabuumi.”
^ Langa Bupanduluzi Bwamabala.
^ Naakuti, “amukuchegwa.”
^ MuchiGrikki, “chamintwa.”
^ Amwi malembe ati, “akuvula kwabubi.”
^ Naakuti, “katabikki matomu aalulimi lwakwe.”
