Lwabili Luya Kuli Timoti 3:1-17
3 Pesi ziba kuti kumazuba aakumamanino, kuzooba ziindi ziyumu, zikataazya kupona mulinzizyo.
2 Nkaambo bantu bazooba basikuliyanda, basikuyandisya mali, basikulidunda, basikulisumpula, basikusampula, bataswiilili bazyali, batalumbi, batasyomeki,
3 batakwe luyando, batayandi kuzuminana aabamwi, basikubejelezya, batalinyoni, bayoosya, batayandi bubotu,
4 basikuuzya bamwi, bali aamitwe miyumu, balibikka aajulu, bayandisya zyakulikondelezya kwiinda kuyandisya Leza,
5 babonekaanga bayanda Leza pesi kabataponi kweendelana anzibasyoma,* bantu bali boobu batantamuke.
6 Aakati kabo, kuzwa baalumi basobelela kunjila mumaanda akukwelelezya banakazi batasimide balemenedwe aazibi, beendelezegwa aakulombozya kusiyene-siyene,
7 bakkala kabayiya, pesi kabatasiki aakuba aaluzibo lwachoonzyo lwakasimpe.
8 Mbuli Janesi aJambure mbubakakazya Mozesi, ambabo aaba balikwiinkilila kunembo kukazya kasimpe. Bantu bali boobu, bali aamizeezo iipambanikide loko, alubo tabatambuliki pe kumakani aalusyomo.
9 Nikuba oobo, taakwe nkubataye pe nkaambo bufuba-fuba bwabo buzooba aantanganana kubantu boonse, mbuli mbukwakachitika kubaalumi aabo babili.
10 Pesi iwe wakakutobela aafwiifwi kuyiisya kwangu, maponeno aangu, makanze aangu, lusyomo lwangu, moyo mulamfu wangu, luyando lwangu, kulisimya kwangu,
11 kupenzegwa amakataazyo aali mbuli aayo ngindakaswaana ku-Antiyokkiya, ku-Ikkoniyo, kuListra. Ndakalisimya mumapenzi aaya alubo Mwaami wakandivuna mulingawo woonse.
12 Kwaamba choonzyo, aabo boonse bayanda kupona kweendelana akulipeda kwabo kuli Leza kabalaamwi aKkristu Jesu, ambabo bazoopenzegwa.
13 Pesi bantu babi abasilweeno bazoozwa kukubija baye kukubija loko kabalikweena bamwi, ambabo kabalikweenwa.
14 Nikuba oobo, iwe yinkilila kunembo muzintu nzwaakayiya alubo nzwaakagwasigwa kusyoma nkaambo ulibazi bakakuyiisya zintu eezyo
15 akuti kuzwa kubwana, ulaazi malembe aasalala aakonzya kupa kuti ube musongo, kuchitila kuti ukafutuke kwiinda mukuba aalusyomo muli Kkristu Jesu.
16 Magwalo woonse akazulwidwa aaLeza alubo alagwasya kukuyiisya, kukululamika, kukoolola zintu, kukulaya chabululami,
17 kuchitila kuti muntu waLeza ayelele choonzyo, kalibambilide chakumaninina kuchita milimu yoonse mibotu.
Makani Aamunsi
^ Naakuti, “pesi kabaakaka manguzu aakulipeda ooko.”
