Lwakusaanguna Luya Kuli Timoti 2:1-15
2 Nkinkaako, chakusaanguna ndimusungwaazya kuti, nkombyo zyakukombelezya, zimwi nkombyo, nkombyo zyakukombela bamwi ankombyo zyakulumba, zichitilwe bantu bamisyobo yoonse,
2 baami abantu boonse bali muzyuuno zili aajulu, kuchitila kuti twiinkilile kunembo kupona muluumuno amukulyiiba, katulipedelede kuli Leza chakumaninina alubo katutawubaansyi zintu.
3 Eezi zilikabotu alubo zilatambulika mumeso aaLeza Mufutuli wesu,
4 ooyo uuyanda kuti bantu bamisyobo yoonse bafutulwe akuti babe aaluzibo lwachoonzyo lwakasimpe.
5 Nkaambo kuli Leza uumwi, asimwiimaakati uumwi aakati kaLeza abantu. Muntu ooyo nguKkristu Jesu,
6 ooyo wakalipeda kuti abe chinunuzyo cheelene chabantu boonse*—bukamboni buli atala azintu eezi buzoopegwa kuchiindi chabo cheelede.
7 Akaambo kabukamboni oobu, ndakasalwa kuti ndibe mukambawusi amwaapostoli—ndilikwaamba choonzyo, tandilikubeja pe—muyiisi wazisi mumakani aalusyomo akasimpe.
8 Nkinkaako, ndiyanda kuti mundawu zyoonse, baalumi bayinkilile kunembo kukomba, kabatambikide maboko aasyomeka, kakutakwe kunyema akukazyania.
9 Alubo banakazi beelede kuzwaata zigogo zili kabotu, zili aabulemu alubo zitondeezya kuti bali aamizeezo iilikabotu,* kutali kuluka masusu munzila iigambya loko, kuzwaata zintu zipangidwe aangolida naakuti amaparela naakuti zigogo zidula loko,
10 pesi munzila yeelela banakazi balyaamba kuti balilipedelede kuli Leza, nkukwaamba kwiinda mumilimu mibotu.
11 Mwanakazi ayiye kawumwide akulibombya koonse.*
12 Tandimuzumizyi pe mwanakazi kuti ayiisye naakuti ayendelezye mwaalumi pesi weelede kukkala kawumwide.*
13 Nkaambo Adamu nguwe wakasaanguna kulengwa, mpawo kwazoolengwa Eva.
14 Alubo Adamu taakeenwa pe, pesi mwanakazi nguwe wakeenwa chakumaninina mpawo wakaba sikusotoka mulawu.
15 Nikuba oobo, mwanakazi unookwabililidwe kwiinda mukuzyala bana, kufumbwa kuti wayinkilila kunembo* kuba mulusyomo, muluyando amubusalali amukuba aamizeezo iilikabotu.*
Makani Aamunsi
^ Naakuti, “chabantu bamisyobo yoonse.”
^ Naakuti, “bayeeya kabotu; bali aamaboneno aali kabotu.”
^ Naakuti, “ayiye kabeteme.”
^ Naakuti, “kabeteme.”
^ MuchiGrikki, “kuti bayinkilila kunembo.”
^ Naakuti, “akuyeeya kabotu; amaboneno aali kabotu.”
