Bayibolu ligwiriskiya ntchitu cha mazu ngakuti “kutuza nthumbu” pakukamba va kubaya mwana yo wechendaweku. Kweni pe mavesi nganandi mu Bayibolu ngo ngatiwovya kuziŵa mo Chiuta wawone umoyu wa munthu, kusazgapu wa mwana yo wechendaweku.

 Umoyu ndi mphasu yakutuliya kwaku Chiuta. (Genezesi 9:6; Salimo 36:9) Iyu wawona kuti umoyu wa chinthu chechosi ngwapade, kusazgapu umoyu wa mwana yo wechendaweku. So asani munthu watuza nthumbu, venge kubaya munthu.

 Dangu lo Chiuta wangupaska Ayisirayeli lakambanga kuti: “Asani anthulumi apumana ndipu apweteka munthukazi wanthumbu, ndipu wabala mwana muteta kweni palivi yo wafwa, munthulumi yo wapweteka munthukazi, walipiri mwakukoliyana ndi vo mulumu wa munthukazi yo wakamba. Ndipu malipiru ngo wakangapereke kwa akweruzga. Kweni asani pafwa munthu, wapereki umoyu kulipa umoyu.”—Ekisodo 21:22, 23. a

•  Kumbi umoyu wa munthu utamba wuli?

•  Kumbi Chiuta wangamugowoke munthu yo wakutuzgapu nthumbu?

•  Kumbi nkhunanga kutuzga nthumbu asani umoyu wa ma pamwenga wa mwana we pangozi?

 Chiuta wawona kuti umoyu wa munthu utamba asani ma wame waka nthumbu. Mu Mazu ngaki, Bayibolu, Chiuta walongo kuti mwana yo wechendaweku ndi munthu. Wonani vakuyeruzgiyapu vinyaki vo vilongo kuti Chiuta wapambanisa cha umoyu wa mwana yo wechendaweku ndi yo wawaku kali.

•   Fumu Davidi yingulemba kuti: “Masu nginu ngangundiwona ndichiyamba ŵaka kupangika.” (Salimo 139:16) Chiuta waziŵanga kuti Davidi wenga munthu chinanga mphanyengu yo iyu wenga wechendaweku.

•   Kweniso Chiuta wanguziŵiya limu kuti Yeremiya wazamuja ndi udindu wapade, iyu wechendaweku. Chiuta wangumukambiya kuti: “Ndingukuziŵa ndechendakupangi munthumbu ya anyoku, ndipu ndingukutowesa wechendaweku. Ndingukusankha kuti uje mchimi ku mitundu ya ŵanthu.”—Yeremiya 1:5.

•   Luka yo wangulembaku Bayibolu kweniso wenga dokotala, wangugwiriskiya ntchitu mazu nga Chigiriki ngo ngayanana ndi ngo Chiuta wangukambiya Yeremiya, pakukamba va mwana yo wechendaweku kweniso mwana yo wawaku.—Luka 1:41; 2:12, 16.

 Hinya. Ŵanthu wosi wo akutuzgapu nthumbu Chiuta wangaŵagowoke. Asani pasonu panu awona umoyu nge mo Chiuta watiwuwone, akhumbika cha kujimba mulandu. Bayibolu likamba kuti: “Yehova ngwalisungu kweniso ngwawezi . . . Nge mo ulili utali wa pakati pa ko kutuliya lumwi ndi ko liselere, ndimu so waŵikiya kutali maubudi ngidu ndi isi.” b (Salimo 103:8-12) Yehova wazamugowoke ŵanthu wosi wo akulapa maubudi ngawu kusazgapu wo akutuzgapu nthumbu.—Salimo 86:5.

 Mwakukoliyana ndi vo Bayibolu likamba vakukwaskana ndi umoyu wa mwana yo wechendaweku, kungaŵa kunanga kukulu asani ma wangatuzga nthumbu chifukwa chakuti umoyu waki pamwenga wa yo wechendaweku we pangozi.

 Wuli asani pa nyengu yakubala pakhumbika kuti asankhi chimoza, umoyu wa ma pamwenga wa mwana yo wechendaweku? Chinanga kuti va nge ivi vichitika kaŵikaŵi cha, kweni asani veviyo, weyosi wakhumbika kusankha yija yo wakhumbika kutaskika.