Zeru zo Zingawovya Kuti Muje ndi Banja Lalikondwa
Nthengwa kweniso ŵana ndi mphasu zakuzirwa zakutuliya ku Mlengi widu. Iyu wakhumba kuti tijengi ndi banja lalikondwa. Mwaviyo, kuziya mu buku lakali lakupaturika, iyu watipaska ulongozgi wo ungatiwovya kuti tije ndi banja lamampha kweniso lalikondwa. Wonani ulongozgi wazeru wo we mumphata umu.
Anthulumi Muyanjengi Awolu Ŵinu
“Anthulumi atenere kwanja awolu ŵawu nge maliŵavu nga ŵeneku. Munthu yo watanja muwolu waki watijiyanja yija, pakuti palivi munthu yo watinkha liŵavu laki, kweni watiliryisa ndipuso watiliyanja.”—AEFESO 5:28, 29.
Munthulumi ndiyu mutu wa banja. (Aefeso 5:23) Munthulumi wamampha watuŵa mukali cha pamwenga wakulamula ŵaka chechosi. Iyu wawona kuti muwolu waki ngwakuzirwa ndipu watimuphwere mwakuliŵavu kweniso kuti wawonengi kuti watanjika. Watesesa so kuti muwolu waki wakondwengi ndipu nyengu zosi wajaliya ŵaka kumuchichizga cha kuti wachitengi vo iyu wakhumba. (Afilipi 2:4) Iyu wakambiskana ndi muwolu waki mwakufwatuka ndipuso watimuvwisiya asani walongoro. Iyu ‘watimukwiyiya ukongwa’ cha muwolu waki, kumupuma pamwenga kulongoro nayu mwaganyavu.—Akolose 3:19.
Anthukazi Mutumbikengi Alumu Ŵinu
“Munthukazi nayu wamutumbikengi ukongwa mulumu waki.”—AEFESO 5:33.
Asani munthukazi watumbika mulumu waki kweniso wakoliyana ndi vo wasankha, watovya kuti mubanja muje chimangu. Asani mulumu waki wanangisa, iyu watimuyuyuwa cha kweni walutirizga kuchita vinthu mwakuzikira kweniso mwaulemu. (1 Peturo 3:4) Asani wakhumba kukambiya mulumu waki vakukwaskana ndi suzgu yinyaki, iyu wasankha nyengu yamampha kweniso watimukambiya mwaulemu.—Wakutawula 3:7.
Mujengi Wakugomezgeka ku Munthu yo Mukutorana Nayu
“Munthulumi . . . wazakujibatika ku muwolu waki, ndipu yiwu azamuja liŵavu limoza.”—GENEZESI 2:24.
Asani munthulumi ndi munthukazi atorana, akoliyana ukongwa. Mwaviyo, ŵanthu akutorana akhumbika kuyesesa kuti banja lawu lije lakukho mwakukambiskana kutuliya pasi pa mtima kweniso kuchitiyana tinthu timanatimana takulongo kuti atanjana. Yiwu akhumbika so kuja akugomezgeka ndipu akhumbika cha kugonana ndi munthu yo akuleka kutorana nayu. Kuleka kugomezgeka ndi nkhaza. Kuchitiska kuti ŵanthu aleki kugomezgana kweniso kuti nthengwa yimali.—Aheberi 13:4.
Apapi Musambizengi Ŵana Ŵinu
“Sambiza mwana nthowa yo watenere kwendamu; ndipu chinanga wangakuwa watuwengemu cha.”—NTHANTHI 22:6, mazu ngamumphata.
Chiuta wakupaska apapi udindu wakuti asambizengi ŵana ŵawu. Venivi visazgapu kuŵasambiza kuziya mu vo apapi achita kweniso nkharu yawu. (Dotoronome 6:6, 7) Asani mwana wanangisa, mpapi wazeru wachita vinthu mwakwenere. Iyu ‘watuŵa mpusu kuvwa, wasweriyapu kulongoro, ndipuso wakwiya liŵi cha.’ (Yakobe 1:19) Asani mpapi wakhumba kulunguchizga mwana waki, watenere kuchita vinthu mwachanju, mwaukali cha.
Mwaŵana Muvwiyengi Apapi Ŵinu
“Mwaŵana, muvwiyengi apapi ŵinu . . . ‘Utumbikengi awusu ndi anyoku.’”—AEFESO 6:1, 2.
Ŵana akhumbika kuvwiya apapi ŵawu kweniso kuŵatumbika ukongwa. Asani ŵana atumbika apapi ŵawu atovya kuti mubanja muje chimangu, kukoliyana kweniso likondwa. Asani ŵana arara aphwere apapi ŵawu, alongo kuti atiŵatumbika. Venivi vingasazgapu kuŵanozge nyumba pamwenga kuŵapaska ndalama.—1 Timote 5:3, 4.
Mungayanja Kuŵerenga so Nkhani Izi
BANJA LINU LIKHOZA KUJA LALIKONDWA
Muthembengi Chiuta Kuti Nthengwa Yinu Yije Yalikondwa
Kugwiriskiya nchitu mafumbu ngaŵi ngambula kusuzga, kungakuwovyani kuti nthengwa yinu yije yalikondwa.
CHIGONGWI CHA MLINDA
Anthurumi—Muchitengi Vinthu Mwachanju ndi Awolu Ŵinu
M’banja mungaŵa masuzgu chinanga kuti lingaŵa lakukhupuka.
MAFUMBU NGO BAYIBOLU LIMUKA
Kumbi Bayibolu Likambanji pa Nkhani ya Kuphwere Apapi Akukota?
Bayibolu likonkhoska vo anthulumi ndi anthukazi anyaki anguchita pakuphwere apapi ŵawu. Kweniso le ndi ulongozgi wo ungawovya ŵanthu wo aphwere apapi ŵawu akukota.
JANI MASU!
Kumbi Mungalongo Wuli Kuti Mutumbikana?
Ŵanthu akutorana atenere kutumbikana nyengu zosi. Kumbi mungalongo wuli kuti mutumbika munthu yo mukutorana nayu?
