E tokalahi nā tino kua hē toe olo ki a latou lotu auā e hē maua e ki latou te takitakiga fakateagaga pe ko te fakamafanafanaga. Aiheā e tatau ai koe ke fano ki nā hauniga Kelihiano kua fakamaopoopo e Molimau a Ieova? Ko he ā ka kē maua i kinā?

Ko te fiafia i te fakatahi ma nā tino e alolofa ma manatu mamafa atu. I te henituli muamua, na fakamaopoopo nā Kelihiano ki ni fakapotopotoga, ma na fai a latou hauniga ke tāpuaki ki te Atua, ke hukehuke nā Tuhituhiga Paia, ma te fakamalohi tētahi ki tētahi. (Epelu 10:​24, 25) I te potopoto fakatahi ma he hikomaga alofa, na lagona e ki latou te fakatahi ai ma ni uō moni​—ko o latou uho ma tuafafine fakateagaga. (2 Tehalonia 1:3; 3 Ioane 14) E mulimuli ki matou ki te fakatakitakiga a nā Kelihiano i te henituli muamua ma ki matou maua ai he fiafiaga vēnā.

Te aogā e maua mai i te akoako o te auala e fakatino ai nā matakupu hilihili o te Tuhi Paia. E vēia ko nā taimi o te Tuhi Paia, ko nā tamāloloa, ko fafine, ko fānau e feiloaki fakatahi. Ko nā faiakoga kua i ei te poto e fakaaogā ai te Tuhi Paia ke fehoahoani mai ki a te ki matou ke iloa te auala e fakatino ai nā matakupu hilihili i o matou olaga i nā aho takitahi. (Teutelenome 31:12; Neemia 8:8) E mafai oi fai he vaega ma te aofia i nā talanoaga ma i te uhu o nā pehe, ma fakataga ke ki matou e fakaali tō matou fakamoemoe Kelihiano.​—Epelu 10:23.

Ko he fakamanuiaga te i ei tō fakatuatua ki te Atua e fakamalohia. Na taku atu e Paulo ki he tahi i te fakapotopotoga i ona aho: “Auā ko au e fofou lahi lele ke feiloaki ma koutou, . . . ke mafai ki tātou ke fakamālohi tētahi ki tētahi, e ala i to tātou fakatuatua.” (Loma 1:​11, 12) I nā hauniga, e mahani oi fetaui ma nā uho tāpuaki ma fakamalohia ai o tatou fakatuatua ma filigā ke ola i he olaga faka-Kelihiano.

Aiheā e hē talia ai te valakaulia ke fakatahi atu ki he tahi o a matou fakapotopotoga ma iloa ai lava e koe nā mea e fai ai? E matuā talia koe ma te māfana. Ko nā hauniga e hēai he totogi​—e hēai lava he peleti.

• Ko te fakatakitakiga a ai e fakavae ai nā hauniga a te matou fakapotopotoga?

• E aogā vēhea ki a te ki matou te auai ki nā hauniga Kelihiano?