«HASYL bol, emma işçi az. Şonuň üçin hasyly ýygnamaga işçileri iberer ýaly, hasyl Eýesine ýalbaryň» (Luka 10:2). Takmynan 2 müň ýyl mundan öň Isanyň aýdan bu sözleri şu günler Mýanmadaky ýagdaýy gowy suratlandyrýar. Näme üçin şeýle diýse bolar? Mýanmada 4 müň 200 töweregi wagyzçy bar. Olar 55 milliona golaý adama hoş habary wagyz edýärler.

Emma «hasyl Eýesi» Ýehowa dünýäniň dürli künjeginde ýaşaýan müňlerçe dogan-uýalary Aziýanyň günorta-gündogarynda ýerleşýän Mýanmada hasyl ýygymyna gatnaşmaga höweslendirýär. Olary ýaşaýan ýerini goýup, başga ýurda göçmäge näme höweslendirdi? Şol ýere göçmäge olara näme kömek etdi? Olar nähili bereketleri aldylar? Geliň, bu barada bileliň.

Birnäçe ýyl mundan öň Ýaponiýada pioner bolup gulluk edýän Kazuhiro garaguş keseli sebäpli özünden gidip, hassahana düşýär. Lukman oňa iki ýyllap ulag sürmeli däldigini aýdýar. Muny bilende, Kazuhiro ör-gökden gelýär. Ol öz-özüne: «Indi men pioner gullugymy nädip dowam ederkäm?» diýýär. Ol pioner gullugyny dowam edip biler ýaly, Ýehowa ýalbaryp, gyzgyn doga edýär.

Kazuhiro şeýle ýatlaýar: «Şondan bir aý geçensoň, Mýanmada gulluk edýän dostum düşen ýagdaýym barada eşidýär. Ol maňa jaň edip: „Mýanmada köplenç eýläk-beýläk awtobusda gidýäris. Eger gelseň, bärde saňa gulluk etmek üçin ulagyňam gerek bolmaz“ diýdi. Men lukmanymdan Mýanma gitmek üçin saglyk ýagdaýymyň nähilidigi barada soradym. Ol: „Ýaponiýa Mýanmadan beýni boýunça ökde hünärmen geldi. Men seni onuň bilen tanyşdyraýyn. Eger ýene-de keseliň gozgasa, ol saňa kömek edip biler“ diýende, haýran galdym. Şonda eden dogama Ýehowa lukmanyň üsti bilen jogap beren ýaly boldy».

Kazuhiro haýal etmän aýaly bilen Mýanmada pioner bolup gulluk etmek isleýändigi barada filiala hat ugradýar. Bary-ýogy bäş gün geçensoň, filialdan «Geliň, bize köpräk pioner gerek» diýen jogap gelýär. Kazuhiro dogan iki ulagynam satyp, özi we aýaly Meri üçin wiza açdyrýar hem-de uçara petek alýar. Häzir olar Mandalaýdaky lallaryň toparynda şatlyk bilen gulluk edýärler. Kazuhiro şeýle diýýär: «Bu waka biziň Zebur 37:5-däki „Ýoluňy Rebbe  tabşyr, Oňa bil bagla; Ol dilegiňi ýerine ýetirer“ diýen Hudaýyň wadasyna bolan ynamymyzy hasam berkitdi».

2014-nji ýylda Ýehowanyň Şaýatlary Mýanmada ýörite kongres gurnadylar. Oňa daşary ýurtdan hem köp myhmanlar gatnaşdy. ABŞ-da ýaşaýan 34 ýaşly Monika uýamyz şeýle diýýär: «Kongresden öýe gelenimden soň, durmuşymy üýtgetmek üçin ätmeli ädimlerim barada Ýehowa doga etdim. Şeýle-de ene-atam bilen ruhy maksatlarym hakda gepleşdim. Ene-atamam, özümem Mýanma gitmelidigime göz ýetirdim. Ýöne munuň üçin biraz wagt gerek boldy we men öňümde goýan maksadyma ýetmek üçin köp doga etdim».

Monika munuň sebäbini şeýle düşündirýär: «Isa şägirtlerine bir işe başlamazdan öň, „çykdajylaryny hasaplamagy“ maslahat berdi. Şonuň üçin öz-özümden: „Men başga ýurda göçmäge taýynmy? Ol ýerde özümi ekläp bilerinmi?“ diýip soradym. Şonda men dünýäniň ol ujuna göçmek üçin ýeterlikli pulumyň ýokdugyna düşündim». Uýamyza näme kömek etdikä? (Luka 14:28).

Monika şeýle ýatlaýar: «Bir gün başlygym meni ýanyna çagyrdy. Ol meni işden çykarjak bolýandyr öýdüp, biraz alada etdim. Ýöne ol meni gowy işleýändigim üçin öwüp, sylag hökmünde goşmaça pul bermekçi bolýandygyny aýtdy. Haýran galaýmaly, şol pullar meniň çykdajylarymy ýapmaga ýetýärdi».

Monika 2014-nji ýylyň dekabr aýyndan bäri Mýanmada gulluk edýär. Ol wagyzçylaryň ýetmeýän ýerinde gulluk etmek barada şeýle diýýär: «Bu ýerde gulluk edýändigime örän begenýärin. Meniň üç sany okuw geçýänim bar. Olaryň biri 67 ýaşynda. Ol meni hemişe güler ýüz bilen we gujak açyp garşylaýar. Ol Hudaýyň adynyň Ýehowadygyny bilende, gözüne ýaş aýlap: „Men Hudaýyň adynyň Ýehowadygyny ömrümde ilkinji sapar eşidýärin. Sen menden gaty ýaş hem bolsaň, öň hiç haçan bilmedik has wajyp zadymy öwretdiň“ diýdi. Şonda men hem göz ýaşymy saklap bilmedim. Şeýle wakalar durmuşyňy hasam manyly edýär». Ýakynda Monika «Hoş habarçylar mekdebinde» okady.

Ýehowanyň Şaýatlarynyň 2013-nji ýylda çykaran «Ýyllyk kitabynda» Mýanma barada ýazylan wakalar käbir dogan-uýalary ol ýere göçmäge höweslendirdi. Aziýanyň günorta-gündogarynda ýaşaýan 30 ýaşlaryndaky Li atly uýamyz uzak wagtly gulluk edýärdi. Emma «Ýyllyk kitabynda» agzalan wakalar ony Mýanma göçmäge höweslendirýär. Ol şeýle diýýär: «2014-nji ýylda Ýangonda ýörite kongrese gatnaşanymda, Mýanmada hytaý dilindäki ýygnakda gulluk edýän bir är-aýal bilen tanyşdym. Men hytaýça gepläp bilýändigim sebäpli, şol dildäki topara kömek etmek üçin Mýanma göçmegi ýüregime düwdüm. Biz Monika bilen bilelikde Mandalaýa göçdük. Ýehowa ikimize-de şol bir mekdepden ýarym günlük iş tapmaga kömek etdi. Şeýle-de biz işimize golaý ýerden jaý tapdyk. Howanyň yssylygyna we oňaýsyz şertlere garamazdan, men bu ýerde gulluk etmekden şatlyk tapýaryn. Mýanmada adamlar sada ýaşasalar-da, olar mähirli we hoş habary höwes bilen diňleýärler. Ýehowanyň wagyz işini çaltlandyrýandygyny öz gözüň bilen görmek, diýseň ruhlandyrýar. Men Mandalaýda gulluk etmegimiň Ýehowanyň islegidigine berk ynanýaryn».

Wagyzçylaryň ýetmeýän ýerine göçen dogan-uýalar bilen bolan wakalar doga etmegiň nähili peýdasynyň bardygyny görkezýär. Geliň, 35 ýaşlaryndaky Jampeý we onuň aýaly Nao bilen bolan waka seredeliň. Bu är-aýal Ýaponiýada lallaryň dilindäki ýygnakda gulluk edýärdi. Olary Mýanma göçmäge  näme höweslendirdikä? Jampeý şeýle ýatlaýar: «Aýalym ikimiz hemişe-de daşary ýurtda wagyzçylaryň az ýerinde gulluk etmegi maksat edinýärdik. Ýaponiýada ýygnagymyzdan bir dogan Mýanma göçdi. Az-owlak ýygnan pulumyz bolansoň, 2010-njy ýylyň maý aýynda bizem şol ýere göçdük. Mýanmadaky dogan-uýalar bizi gujak açyp garşy aldylar». Jampeý Mýanmadaky lal adamlara wagyz etmek barada şeýle diýýär: «Bu ýerde gyzyklanýan adamlar gaty köp. Biz lal adamlara olaryň dilinde wideolary görkezenimizde, haýran galýarlar. Ýehowa köpräk gulluk etmek üçin bu ýere göçendigimize biz örän begenýäris».

Jampeý bilen Nao özlerini nädip ekleýärler? Olar şeýle ýatlaýar: «Üç ýylyň içinde biz ýygnan pulumyzyň köpüsini sowandygymyz üçin geljek ýyl jaýyň tölegini tölemäge ýeterlik pulumyz ýokdy. Aýalym ikimiz ençeme gezek gyzgyn doga etdik. Birdenem, wagtlaýyn ýörite pioner gullugyna başlamak barada filialdan hat geldi. Biz Ýehowa bil baglaýardyk we onuň bizi taşlamaýandygyna göz ýetirdik. Hawa, ol hemişe biziň aladamyzy edýär». Ýakynda Jampeý bilen Nao «Hoş habarçylar mekdebinde» okadylar.

43 ýaşly Saýmon dogan öň Italiýada ýaşaýardy, aýaly Anna bolsa 37 ýaşlarynda we asly Täze Zelandiýadandy. Olary Mýanma göçmäge näme höweslendirdi? Anna şeýle diýýär: «2013-nji ýylda çykan „Ýyllyk kitabyndaky“ Mýanma baradaky waka bizi şol ýere göçmäge höweslendirdi». Adamsy Saýmon bolsa şeýle diýýär: «Mýanmada gulluk etmek biziň üçin uly hormat. Bu ýerdäki adamlar örän sada ýaşaýarlar, şonuň üçin men Ýehowanyň işine köp wagtymy sarp edip bilýärin. Wagyzçylaryň ýetmeýän ýerinde gulluk edip, Ýehowanyň mähirli aladasyny görmek diýseň ruhlandyrýar» (Zeb. 121:5). Anna sözüni şeýle dowam edýär: «Bu ýerde gulluk edýändigimize örän begenýärin, biz sada ýaşaýarys we ýanýoldaşym bilen köp wagtymyzy bile geçirýäris. Bu bolsa bizi biri-birimize hasam ysnyşdyrýar. Şeýle-de biz täze dostlary edindik. Adamlar Ýehowanyň Şaýatlaryna erbet garamaýarlar, gyzyklanýanlaram gaty köp».

Anna şeýle diýýär: «Bir gün men dükanda ýaş talyp gyza wagyz etdim we gaýtadan idege gepleşdim. Indiki gezek ol ýany bilen jorasynam alyp gaýdypdyr. Ondan soňky sapar ýanynda başga-da joralary bardy. Soňra ol ýene bir jorasyny getirdi. Häzir men olaryň bäşisi bilenem okuw geçýärin». Saýmon bolsa şeýle diýýär: «Bu ýerdäki adamlar göwnaçyk, bilesigeliji; olaryň köpüsi aýdýan zatlarymyz bilen gyzyklanýar. Dogrymy aýtsam, gyzyklanýan adamlaryň hemmesi bilen gepleşmek üçin wagtymyzam ýetenok».

Ýöne Mýanma göçmek üçin nähili ädimleri ätmeli? Ýaponiýaly Mizuho şeýle ýatlaýar: «Ýanýoldaşym Saçiýo ikimiz hemişe wagyzçylaryň ýetmeýän ýerinde gulluk etmek isleýärdik. Ýöne nirä gitmelidigimiz barada bir karara gelip bilmeýärdik. 2013-nji  ýylyň „Ýyllyk kitabyndaky“ Mýanma baradaky wakalar bize güýçli täsir etdi. Bu bolsa bizi Mýanma göçmäge höweslendirdi». Saçiýo sözüni şeýle dowam edýär: «Biz başda Mýanmanyň öňki paýtagty Ýangon şäherinde bir hepde gulluk etmegi maksat edindik. Garaz, şol ýeri gözden geçirmek isleýärdik. Bu gysga wagtlyk syýahat biziň ol ýere göçmek höwesimizi hasam artyrdy».

Awstraliýaly 50 ýaşlaryndaky Rodneý bilen aýaly Jeýn hem-de ogly Jordan we gyzy Danika dagylar 2010-njy ýyldan bäri Mýanmada wagyzçylaryň ýetmeýän ýerinde gulluk edýärler. Rodneý şeýle diýýär: «Adamlaryň ruhy teşneligi bize güýçli täsir etdi. Men beýleki maşgalalara hem Mýanma ýaly wagyzçylaryň az ýerine göçmegi maslahat berýärin. Sebäbi bu ýere göçenimizden bäri, maşgalamyz Ýehowa has-da ýakynlaşdy. Ýaşlaryň köpüsi telefon, ulag, iş we şuňa meňzeş zatlar bilen başagaý. Biziň çagalarymyz bolsa wagyzda adamlar bilen gürrüňdeş bolup biler ýaly, täze sözleri öwrenmäge jan edýärler. Olar Mukaddes Ýazgylary bilmeýän adamlar bilen söhbetdeş bolmaga, ýygnakda ýerli dogan-uýalaryň dilinde jogap bermäge we başga-da ruhy işleri etmäge çalyşýarlar».

ABŞ-da ýaşaýan 37 ýaşly Oliwer dogan gullugyň bu görnüşine gatnaşyp görmegi näme üçin maslahat berýändigini şeýle düşündirýär: «Men sada ýaşap, Ýehowa gulluk edenimde köp bereketleri aldym. Öýümi goýup, başga ýere göçmegim nähili ýagdaý bolaýsa-da, Ýehowanyň goldajakdygyna ynamymy artdyrdy we oňa bil baglamagy öwrendim. Öň tanamaýan, ýöne meniňki ýaly ynançlary bolan dogan-uýalar bilen gulluk etmegim maňa Hudaýyň Patyşalygynyň berjek bereketleri bilen deňeşdireniňde, bu dünýäniň hödürleýän zatlarynyň hiç zatdygyna düşünmäge kömek etdi». Häzir Oliwer dogan aýaly Anna bilen Mýanmada lallaryň dilindäki ýygnakda yhlasly gulluk edýär.

Awstraliýaly 52 ýaşly Trazel uýamyz hem 2004-nji ýyldan bäri Mýanmada gulluk edýär. Ol şeýle diýýär: «Men mümkinçiligi bolan dogan-uýalary wagyzçylaryň ýetmeýän ýerinde gulluk etmäge höweslendiresim gelýär. Eger köpräk gulluk etmäge islegiň bolsa, Ýehowanyň edýän tagallaňy patalaýandygyna göz ýetirdim. Şeýle durmuşy men düýşümde-de görmändim. Bu meniň arzuw eden zadymdy».

Goý, Mýanmada wagyzçylaryň ýetmeýän ýerinde gulluk edýän dogan-uýalaryň tolgundyryjy sözleri sizi hem wagyz edilmedik ýerlerde ýaşaýan akýürekli adamlara kömek etmäge höweslendirsin! Hawa, şol ýerdäki dogan-uýalar: «Mýanma geliň-de, bize kömek ediň» diýip, haýyş edýärler.