Uiyua mbagen ka ve gba se kwagh sha ci u or u nan ne se la ka orcivirigh shin nan doo se ishima kpishi. Uiyua mbagen di yô, ka vea lu cuku kpa, ve doo se tsung sha ci u or u nan ne se la ka or u hen tsombor wase u nan doo se ishima tsung yô, gayô ma ijende yase i sôngo sôngo. Jordan u se ter kwagh na ken ngeren u ken ijime la kpa, lu ityôkyaa i yange na ve iyua i Russel na un la doo un kpishi je la. Kwagh ne zua sha iyua i ipaan la nena?

Hiihii yô, Bibilo kaa ér ‘Aôndo tindi Wan Na u môm môm shin tar, sha u se̱ lu uma sha a Na.’ (1 Yohane 4:9) Kwagh ne na yô, iyua ne ngi a inja kpishi. Or u nan lu sha ian i civirigh er Aôndo nahan nan ngu ga. Orheberu ugen yange nger Pasalmi kaa ér: “We, u i yer iti you ér Yehova la, [ka] we tseegh u lu Uhembansha sha tar cii” ye. (Pasalmi 83:18, NW) Er Aôndo a hembe sha won cii yô, orgen môm u nana na se iyua ve ia gba se kwagh tsung er iyua i Aôndo nahan, nan ngu ga.

U sha uhar yô, Aôndo ka “TER wase.” (Yesaia 63:16) Sha ci u nyi? Sha ci u ka un a ne se uma ye. Kwagh ugen yô, nengen sha a vese tsembelee er Ter u lun a dooshima ka nan nengen sha ônov mba nan doo doo nahan. Zum u Aôndo lu ôron kwagh u nongoior na u tsuaa, mba yange yila ve ér Eferaim la, a pine ér: “Eferaim ka wan u ishima ishima u doon Mo ishima kpen kpen gaa? . .  a sar ishima Yam tsung, mimi je, Me zungwe un mhôônom.” (Yeremia 31:20) Nyian kpa, kape mbacivir Aôndo sha mimi ve doo un ishima vough je la. Ngu Orgban se u hemban tseegh tsô ga, ngu Ter wase kpaa, kua Ijende yase i mimi. Nahan iyua na ia hemba gban se kwagh ga zee?

Uiyua mbagenev ka ve gba se kwagh tsung sha ci u i gba nan se tsô ér gba u a na se ga, kpa se doo or la ishima tsung ve nan ne se i ye. Or u nan ne u iyua a ishima i nan i môm yô, nan keren mtsera sha mi ga.

Aôndo na Wan na va kpe sha ci wase, sha ci u se doo un ishima. Bibilo kaa ér, “Ka sha kwagh ne man i pasen dooshima u se doo Aôndo ishima la ye, ér Aôndo tindi Wan Na u môm môm shin tar.” Yange tindi un shin tar sha ci u nyi? “Sha u se̱ lu uma sha a Na.” (1 Yohane 4:9) Aôndo yange er kwagh ne sha ci u gba u una er nahan shinii? Mayange ga! “Mpaa u a lu ken Kristu Yesu la” ka ‘mlumun u sha mhôôn’ u Aôndo a tese se yô.—Mbaromanu 3:24.

Iyua i Aôndo a ne se la ka “mlumun u sha mhôôn” sha ci u nyi? Bibilo kaa ér: “Aôndo tese se dooshima Na sha ku u Kristu A kpe sha ci wase er se lu mbaasorabo her la.” (Mbaromanu 5:8) Ka dooshima u tangen iyol ga la yange na ve Aôndo er kwagh ne sha ci u uumace mba ve yen, ve lu a iniôngon ga shi ve lu mbaasorabo ne ye. Se kuma u Aôndo una tese se imba dooshima ne ga, shi mayange se fatyô u eren un kwagh u kuman sha mi ga. Iyua i Aôndo a ne se ne ka dooshima u hemban cii u a tese uumace yô.

Uiyua mbagen ka ve doo se tsung sha ci u ka ve tese ér ican i or nan ye sha u nan se iyua la i kehe. Or ka nana kegh iyol u panden kwagh u nan u injaa tsung nan se yô, iyua la ka i doo se kpen kpen, sha ci u ican i nan ye la.

Aôndo yange “na Wan Na u môm môm.” (Yohane 3:16) Yange ma fatyô u nan se wan na u ishima ishima la ga. Ken gôgô shighe u i fe kighir na ga, u Aôndo lu gban sha man tar la cii, Yesu lu eren tom vea na imôngo, nahan “lu un je Aôndo hemban lun vea na” ye. (Anzaakaa 8:30, NW) Yesu ka ‘Wan u Aôndo u doon un ishima,’ shi “ka ibeen i Aôndo u i nengen a Na ga la.” (Mbakolose 1:13-15) I gbe sha won je, iorov uhar mba a lu kangenaan er Yesu vea Ter na nahan ga.

Nahan kpa, “Wan [u Aôndo] iyol Na je kpaa A tange ga.” (Mbaromanu 8:32) Yehova yange tôô kwagh u a hembe lun un a inja cii la na sha ci wase. Ma iyua igen i môm hemba taver un ishe a ingin ga.

Uiyua mbagen ka ve doo se tsung sha ci u ve kure se mgbe u hange hange shin se zua a mi sha shighe u kwagh a gbe se a mi hange hange yô. U tesen ikyav yô, u gba angev mbu mbua fatyô u wuan we yô, man u ngu a inyaregh ki sôron ga, maa orgen tsua a ishima i nan ér nana kimbi inyaregh i sôr u, u de kpeen ga nahan, a lu u ken ishima nena? A doo u a nan je a zua ga! Sha mimi yô, imba iyua la ia lu u a inja tsung je, shin ka nahan ga?

‘Er i lu ken Adam man ior cii ve lu kpen yô, kape ken Kristu kpaa, á gema ior cii vea hingir mbaumav la.’ (1 Mbakorinte 15:22) Er se due ken tsombor u Adam yô, se cii se mba “kpen,” se fatyô u waren angev man ku ga, shi se fatyô u himen ayol ase a Aôndo ga, shi se fatyô u lun a ishô sha ishigh nagh kpaa ga. Man shi se uumace mba se yen ne se fatyô u eren kwagh u una na se ayol a ase, shin mbagenev ‘uma’ ga. Bibilo kaa wang je ér: “Or u nan fetyô u paan anngô u nan, nan ngu je ga, shin u nan Aôndo kwagh u á paa nan a mi kpaa ga . . . Mayange vea fatyô ga.” (Pasalmi 49:7, 8, NW) Gba u saa a wase se keng sha ci u injar i paan se a mi la i taver ishe gande se. A lu se tseegh yô, ma se fetyô ga.

Dooshima u Yehova a lu a mi wuee la yange na yô, a kar a ishima na a kimbi injar sha “twer” u waren uuma asev la, sha er “ior cii vea hingir mbaumav” ken Yesu yô. Ipaan la ngi eren kwagh ne nena? “Awambe a Yesu  Wan Na nga wanger se sha asorabo cii.” Nahan kape i lu je la, ka sea na jighjigh a awambe a Yesu a i hee inya la yô, Yehova a zua a ityôkyaa i den se asorabo, nahan kwagh la a bugh se gbenda u zuan a uma u tsôron. (1 Yohane 1:7; 5:13) Ior asev mba ve kpe la di, ipaan la ia er nyi sha ci ve? “Er i lu sha or môm man ku u ve yô, kape mnder u shin mbakpenev di kpaa i lu sha or môm [Yesu] je la.”—1 Mbakorinte 15:21, NW. *

I gbe je kpa orcivirigh nan ngu a na se iyua sha dooshima i hemba naagh ku Yesu la ga. Or môm kpa nan ngu a na se iyua mgbeghaa, er Yehova nahan ga. Shi iyua i môm i kuren mgbe u hange hange, i i hembe naagh ku yange i na kwa môm ve i yima se sha ikyev i isholibo man ku la je kpa, ngi ga. Sha kpôô yô, iyua igen i môm zurum sha ishe i iyua i ipaan, i i taver ishe je i gande u ôron la ga.