Mbakolose 1:1-29
1 Mo Paulu, i yilam ér m lu apostoli u Kristu Yesu sha ishima i Aôndo, m ngu vea anmgbian wase Timoteu,
2 m ngu ngeren washika ne hen uicighanmbaiorov man anmgbianev mba dondon Kristu sha mimi, mba ve lu ken Kolose la:
Aôndo Ter wase a̱ tese ne erdoo na u sha mhôôn shi a̱ na ne bem.
3 Hanma shighe ka se eren msen sha ci wen, se sughun Aôndo, Ter u Ter wase Yesu Kristu,
4 gadia se ungwa ser ne na Kristu Yesu jighjigh, shi uicighanmbaiorov cii doo ne ishima
5 sha ci u ishimaverenkeghen yen i va zuan a kwagh u i ver sha ci wen sha la. Ne vande ungwan kwagh u ishimaverenkeghen ne ken kwaghôron u mimi u loho u dedoo
6 u u ar a ven la. Er loho u dedoo shon u lu umen atam shi samber sha tar seer a seer nahan, kape hen a ven kpa u lu eren vough je la, hii sha iyange i ne ungwa shi ne zua a mfe u vough sha kwagh u erdoo u Aôndo, er a lu jim jim la je.
7 Ka kwagh u ne ongo hen Epafera, or u doon se ishima, u un kpa a lu kpan er se nahan, shi a lu eren Kristu tom sha mimi sha ci wase la je la.
8 Shi a ôr se er jijingi a mgbegha ne ne lu tesen dooshima yô.
9 Shi ka sha ityôkyaa la kpa, hii sha iyange i se ungwa kwagh ne la je, se mem u eren msen sha ci wen ga ye; se lu sônon ser ma i iv ne a mfe u vough u sha kwagh u awashima na, a hanma kwaghfan kua mkav u sha akaa a ken jijingi cii,
10 sha er ne zenden sha gbenda u doon Yehova,* ne eren hanma kwagh u a soo, er ne lu umen atam ken hanma tom u dedoo, shi ne lu zuan a mfe u vough sha kwagh u Aôndo seer a seer la;
11 shi Aôndo ma a ne ne agee sha tahav nav mbu hemban la, sha er ne taver ishima ken akaa cii, shi ne wa ishima shi a saan ne iyol yô,
12 shi sughun nen Ter u a ne ne kom u zuan a kwar ken dyako u uicighanmbaiorov mba ve lu ken iwanger la.
13 A yima se, se kera mba sha ikyev i tahav mbu imegh ga, a nyôr a vese ken tartor u Wan na u ishima ishima,
14 un shon u i paa se sha a na, se kera lu uikyangen ga la, ka asorabo a i de se la je la.
15 Un ka ibyeen i Aôndo u i nengen a na ga la, ka waniunda ken akaa a i gbe a cii;
16 sha ci u ka sha ikyev na i gbe akaa agen cii ye, a sha man a shin tar, akaa a i nengen a mi man akaa a i nengen a mi ga la, a̱ lu mkônom ma torom shin utor shin ugomoti shin mbautahav kpaa. Akaa agen cii, i gba a sha ikyev na, shi ka sha ci na.
17 Heela tseegh ga, yange vande lun cii ve i va gba akaa agen cii ye, shi ka sha ikyev na i gbe akaa agen cii, a hingir u lun ye,
18 shi ngu ityough ki tiônnongo, ka iyol na je la. Un ka mhii, ka waniunda sha kwagh u mnder u shin ku,* sha er una hingir or u hiihii ken akaa cii yô;
19 sha ci u yange doo Aôndo u un shon ne a̱ iv a akaa cii,
20 shi una hime a akaa agen cii sha a na, a̱ lu akaa a shin tar shin akaa a sha kpaa, sha u keren bem sha awambe a na, a yange haa inya sha ku u a kpe sha kon* la.
21 Jighilii yô, yange ne lu paleghaa a Aôndo shi ne lu mbaihyomov nav, sha ci u asema a en lu sha ityom i ifer.
22 Hegen ngu himen ior a na sha iyol i un shon ne, sha ku na la, sha u ne̱ lu sha ishigh nagh wang man a acôghor shio, shi ne̱ de lu a ibo sha ma kwagh ga—
23 aluer ne za hemen u lun a jighjigh u nan, ne tile dông sha imaagh ki jighjigh u nan wen ki i we la, ne tenger ga, shi ne de ner or a̱ na ne gbihi ishimaverenkeghen i ne zough a mi sha loho u dedoo u yange ne ungwa la ga yô, loho shon u i pase u shin tar hen akaa a i gbe a cii la. Ka loho u dedoo shon ne, mo Paulu, m hingir ortom u u ye.
24 Hegen m ngu ember ken atsan a m lu yan sha ci wen ne, shi m kegh iyol u yan atsan a Kristu ya, a mo m lu a ya ga la, ken iyol yam, sha ci u tiônnongo u a lu iyol na la.
25 M hingir ortom u tiônnongo ne, ka Aôndo je a nem tom ne ye, man ka sha ci u iwasen yen, sha u m pase loho u Aôndo sha afatyô wam cii,
26 ka icighan kwaghmyer u yange lu myer ken tar u* ngise la man ken ikyov i ken ijime la. Kpa hegen i pase un hen uicighanmbaiorov nav,
27 hen ve mba ken akuraior agen, mba Aôndo a nenge i doo un u pasen ve icighan kwaghmyer u a lu kwagh u icivirigh kpishi ne la. Icighan Kwaghmyer shon yô, ka u ne̱ lu ken mzough vea Kristu, inja na yô, ka u ne̱ lu a ishimaverenkeghen i va lun ken iengem na.
28 Ka un shon ne se lu yôôn kwagh na ye; se mba wan hanma or kwagh shi tesen hanma or kwagh a hanma kwaghfan cii sha u wasen hanma or nana̱ via ken Kristu.
29 Ka sha ityôkyaa ne jighilii je m lu eren tom kpoghuloo, nôngon sha afatyô wam cii, sha agee a na a a lu eren tom ken a mo sha gbenda u kpilighyol la ye.
Ngeren mba shin kpe
^ Nenge Ngeren u Pasen Asember.
^ Shin “ka un i hii nderen shin ku ye.”
^ Nenge Ngeren u Pasen Asember.
^ Shin “ikyov i.” Nenge Ngeren u Pasen Asember, “Kov.”
