Iti i Aôndo Ér Ana? Aôndo iyol na kaa ér: “Mo m ngu Yehova. Ka iti yam je la.” (Yesaia 42:8, NWT) I ter iti i Aôndo kpôô kpôô la ken Bibilo kuma kwa 7,000. Nahan kpa, ken Ubibilo kpishi, i er kwagh u ma i er ga yô, sha ci u i dugh iti ne kera; ka i gema i nger ititom, er “Ter” nahan, sha ajiir la. Aôndo soo ér we u lu ijende na, nahan ngu taver we ishima ér we u ‘yilan un sha iti Na.’—Pasalami 105:1.

Atiatom a Yehova. Bibilo ka ia ôron kwagh u Yehova yô, i ter un sha atiatom er “Aôndo,” man “U Hemban Agee Cii,” man “U A Gbe Akaa Cii,” man “Ter,” man “Tor u Hemban” nahan. I nger mbamsen kpishi ken Bibilo, mba i ter Yehova ker sha ma ititom i icivirigh kua iti na kpôô kpôô, i Yehova la yô.—Daniel 9:4.

 Er Aôndo a Lu La. Aôndo ka jijingi, mba nengen a na ga. (Yohane 4:24) Bibilo kaa wang ér “or ngu a nenge a Aôndo ga.” (Yohane 1:18) Bibilo pase er ka i lu Aôndo ken ishima yô. Ior vea fatyô u nan un ishimavihin, shin vea fatyô u “van un a msaanyol.”—Anzaakaa 11:20; Pasalami 78:40, 41, NWT.

Aeren a Aôndo a Doon Tsung. Aôndo sangen a sange ga, ngohol ior ken mbamlu vev cii man ken akuraior cii. (Aerenakaa 10:34, 35) Heela tseegh ga, “zungwen ior mhôônom shi kunya ngu ker un a ior, vihin ishima fele ga, shi eren kwagh a ior nav sha dooshima man sha mimi tsung.” (Ekesodu 34:6, 7, NWT) Nahan kpa, Aôndo ngu a aeren a a hembe doon cii yô, anyiin.

Tahav. Er a lu “Aôndo U Hemban Agee Cii” yô, tahav nav mbu a ikighir ga, nahan una fatyô u eren nyityôkwagh i a tende zwa cii.—Genese 17:1, NWT.

Kwaghfan. Kwaghfan u Aôndo hemba u hanma orgen cii. Ka vough er Bibilo i kaa nahan, ér ka “un tswen a lu a kwaghfan” ye.—Mbaroma 16:27.

Ijirôron i Mimi. Aôndo eren kwagh u shami hanma shighe cii. Ieren na ngi “vough,” shi “mayange ôron ijir sha ifer ga.”—Duteronomi 32:4, NWT.

Dooshima. Bibilo kaa ér “Aôndo ka dooshima.” (1 Yohane 4:8) Aôndo tesen ior dooshima tseegh ga—un kpôô kpôô ka dooshima. Hanma kwagh u a eren cii, ka dooshima u a hembe ken a na la ka a mgbegha un a er ye, man kwagh la ngu a wase se sha igbenda kpishi.

Aôndo Ye Ijende a Uumace. Aôndo ka Ter wase u sha u se doo un ishima yô. (Mateu 6:9) Aluer se na un jighjigh yô, se fatyô u lun azende a na. (Pasalami 25:14) Jighilii yô, Aôndo ngu lôhôn we ér u kporom hen a na ken msen shi u ‘gema ishimanyian you cii, u haa sha a na, sha ci u kwagh wou gba un ishima.’—1 Peteru 5:7; Yakobu 4:8.

Yesu Ka Aôndo Ga. Yesu ngu kposo—ka un tseegh Aôndo yange gba sha uwegh nagh ye. Ka nahan Bibilo i yer un ér Wan u Aôndo ye. (Yohane 1:14) Yehova yange gbe Yesu kera cii yô, hide er tom a waniunda na u lu “orfantom” la sha u gban hanma kwagh kua hanma orgen cii.—Anzaakaa 8:30, 31; Mbakolose 1:15, 16.

 Ma Shighe Môm kpa Yesu Kaa Ér Un Ngu Aôndo Ga. Yange gema pase ér: “Ka hen [Aôndo] m dugh ye, shi ka Un a tindim kpaa ye.” (Yohane 7:29) Zum u Yesu lu lamen a orhenen na ugen yô, a yila Yehova ér “Terem man Ter wen,” kua “Aôndo wam man Aôndo wen.” (Yohane 20:17) Yesu yange kpen kera yô, Yehova nder un shin ku yem a na sha, za ver un ken uwegh Nagh ku yanegh shi na un tahav kpishi.—Mateu 28:18; Aerenakaa 2:32, 33.

Yesu Kristu Una Wase U u̱ Kporom hen Aôndo

Yesu yange va shin tar u va tesen se kwagh u Ter na. Yehova iyol na ôr kwagh u Yesu kaa ér: “Ngun ka Wan wam u ishima ishima. Ungwan nen un.” (Marku 9:7) Orgen môm fa Aôndo er Yesu a fe un la ga. A kaa ér: “Ter kpaa or môm nan fa un ga, ka Wan tseegh a fe un ye, kua ma or u Wan a soo u pasen nan kwagh u Ter yô.”—Luka 10:22.

Yesu ngu a aeren a Aôndo la vough. Yesu bee ter na sha aeren a na la vindi vindi je yô, yange kaa ér: “Or u nan nenge a mo yô, nan nenge a Ter kpaa.” (Yohane 14:9) Yesu yange urugh ior va a ve hen Aôndo sha u tesen ve dooshima u Ter na sha kwaghôron man ieren na. A kaa ér: “Mo m ngu gbenda man mimi man uma. Or môm nana gba van hen Ter ga, saa nana kar her a mo.” (Yohane 14:6) Shi a kaa ér: ‘Mba ve civir Aôndo sha mimi la vea civir Ter ken jijingi kua ken mimi, sha ci u, jighilii yô, Ter ngu keren ambaaior la ér a civir un.’ (Yohane 4:23) Nenge sha wono! Yehova ngu keren ior er we nahan, mba ve soo u zuan a mfe u mimi sha kwagh na yô.