Ei, ukwaghaôndo cii mba kwaghmôm ga. Bibilo ôr kwagh u ukwaghaôndo kpishi mba ve eren ishima i Aôndo ga yô. Ukwaghaôndo mban mba ker avegher ahar.

Vegher 1: U civir mbaaôndo mba aiegh

 Bibilo pase ér u civir mbaaôndo mba aiegh la ka “gbilinkwagh” man “agbilinakaa” shi i kaa ér “kwagh môm u lun a inja ngu ker ga.” (Yeremia 10:3-5; 16:19, 20) Yehova * Aôndo yange kaa a ikyuior i Iserael i sha ayange a tsuaa la ér: “De lu a mbaaôndo mbagenev ga, saa Mo.” (Ekesodu 20:3, 23; 23:24) Yange Mbaiserael vea civir mbaaôndo mbagen yô, “ishima nyoon TER” a ve.—Numeri 25:3; Levitiku 20:2; Mbaajiriv 2:13, 14.

 Nyian ne kpa, ior ka vea civir akaa agen a i ‘yer ér mbaaôndo’ la yô, ishima i vihi Aôndo ker kpishi. (1 Mbakorinte 8:5, 6; Mbagalatia 4:8) A kaa a mba ve soo u civir un la ér, ve de lun imôngo a mba ve eren kwaghaôndo u aiegh la ga. A kaa ér: “Due nen hen atô ve kera, pav nen a ve.” (2 Mbakorinte 6:14-17) Nahan aluer ukwaghaôndo mba kwaghmôm shi ve cii mba eren ishima i Aôndo yô, er nan ve a we imba tindi nee?

Vegher 2: U civir Aôndo u mimi sha gbenda u a lumun a mi ga yô

 Ashighe agen Mbaiserael yange ve civir Aôndo sha igbenda i i civir mbaaôndo mba aiegh la, kpa Yehova yange a venda mcivir ve la, sha ci u soo ér ve nungwa mcivir u mimi a mcivir u aiegh ga. (Ekesodu 32:8; Duteronomi 12:2-4) Yesu yange puu mbahemenev mba kwaghaôndo mba sha ayange a na la sha ci u gbenda u ve lu civir Aôndo la. Yange kaa a ve ér: “Akaa a a hembe lun hange hange a ken Atindi la yô, ne mba we a ikyo ga. A yô, ka ijirôron i mimi, man mhôônom ma zungwen man jighjigh.”—Mateu 23:23.

 Nyian kpa, ka kwaghaôndo u a tesen mimi la tseegh a wasen ior u yan ijende a Aôndo ye. Mimi ne ngu ken Bibilo. (Yohane 4:24; 17:17; 2 Timoteu 3:16, 17) Ukwaghaôndo mba atesen a ve a kaha a kwagh u Bibilo i tese la ka ve na ior ve kera ya ijende a Aôndo ga. Atesen ne kpishi a ior ve hen ér a due ken Bibilo, er ityesen i Triniti man i uma kpen ga kua ityesen i igyamusu la nahan cii due hen mbacivir mbaaôndo mba aiegh. Ukwaghaôndo mba ve tesen akaa ne cii mcivir ve ‘ka gbilinkwagh,’ sha ci u ka i hemba doon ve u tesen ior aeren a ityôô a u tesen ve atindi a Aôndo.—Marku 7:7, 8.

 Aôndo kôr ukwaghaôndo mba ve we imanger la ihyom. (Titu 1:16) Cii ve kwaghaôndo a wase ior ve kporom hen Aôndo yô, gba u kwaghaôndo la una tese ve akaa a aa wase ve ken uma ayange ayange yô, a lu di u dondon aeren a kwaghaôndo tsô ga. Ikyav i tesen yô, Bibilo kaa ér: “Aluer or hen ér nan ngu or u civir Aôndo, kpa nan kôron nombor u nan tsaha ga yô, nan ngu tsughun ishima i nan, shi mcivir u nan la ka gbilinkwagh. Mcivir u wang, u a lu a acôghor sha ishigh ki Ter wase Aôndo ga yô, ka un ne: ka u nengen sha ancôgholov man kasev mba côgholov ken ican ve, shi lun wang sha u palegh akaa a taregh.” (Yakobu 1:26, 27 ngeren u shin kpe) Bibilo i King James la yila mcivir u a lu a acôghor shin imanger ga ne ér “kwaghaôndo u wang.”