Bibilo tese ikyav i ia wase se u fan mkposo u mba ve eren kwaghaôndo u mimi la a mba ve eren ga la yô. I kaa ér: “Ka sha atam a ve man né fa ve ye. Mba zer wain sha usaa, shin mba zer tur sha ishishagh ase?” (Mateu 7:16) Er or ka nan fa mkposo u kon u tur a ishishagh sha atam a ve nahan, kape u fatyô u fan mkposo u kwaghaôndo u mimi a kwaghaôndo u aiegh sha atam a ve, shin sha aeren a i fe ve a mi la vough je la; er a i ter shin heen ne nahan:

1.   Kwaghaôndo u mimi tesen mimi u a dugh ken Bibilo jighilii yô, tesen kwaghfan u ior ga. (Yohane 4:24; 17:17) Kwaghaôndo u mimi tesen mimi sha kwagh u uma man ishimaverenkeghen i va lun uma gbem sha won ken paradiso sha tar la, kua akaa a mimi agen kpishi. (Pasalmi 37:29; Yesaia 35:5, 6; Esekiel 18:4) Shi cian u ponon atesen a kwaghaôndo a a lu a aiegh la ga.—Mateu 15:9; 23:27, 28.

2.   Kwaghaôndo u mimi wasen ior ér ve fa Aôndo kua iti na i Yehova la. (Pasalmi 83:18; Yesaia 42:8; Yohane 17:3, 6) Tesen ityesen i i kaan ér Aôndo ngu ica a ior shin taver u fan kwagh na la ga; kpa tesen ér Aôndo soo ér se ya ijende a na.—Yakobu 4:8.

3.   Kwaghaôndo u mimi pasen kwagh u Yesu Kristu ér ka sha ikyev na Aôndo a yem ior ye. (Aerenakaa 4:10, 12) Mba ve eren kwaghaôndo u mimi la mba ongo atindi a Yesu shi ka ve nôngon sha afatyô ve cii ér vea dondo ieren na.—Yohane 13:15; 15:14.

4.   Kwaghaôndo u mimi hembe ôron kwagh u Tartor u Aôndo ér ka u tseegh ua va bee a mbamzeyol mba uumace cii ye. Mba ve eren kwaghaôndo u mimi la ka ve pase mbagenev kwagh u Tartor la sha gbashima.—Mateu 10:7; 24:14.

5.   Kwaghaôndo u mimi la taver ior asema ér ve tesen ior dooshima u tangen iyol ga la. (Yohane 13:35) Tesen ér i naan akuraior cii icivir shi i de nyaghen ior-il shin ior-nyian, shin ityô igen shin ma zwa ugen kpaa ga, kpa i̱ ngohol hanma injaor cii. (Aerenakaa 10:34, 35) Dooshima u mba ve eren kwaghaôndo u mimi la na yô, mba nenge ityav ga.—Mika 4:3; 1 Yohane 3:11, 12.

6.   Kwaghaôndo u mimi ngu a mbahemenev mba i kimbin ve inyaregh ga, shi mba yer ior vev sha atiatom a vesen er ukwaghaôndo mbagenev ve eren nahan ga.—Mateu 23:8-12; 1 Peteru 5:2, 3.

7.   Kwaghaôndo u mimi we uwegh sha akaa a patii cuku tsô kpaa ga. (Yohane 17:16; 18:36) Nahan kpa, mba ve eren un la mba ne gomoti icivir shi mba dondon atindi a gomoti hanma ijiir i ve lu cii, er Bibilo i kaa nahan, ér: “Na nen Shisar akaa a a lu a Shisar yô [ka mbahemenev mba gomoti je la], Aôndo di kpaa na nen Un akaa a a lu a Aôndo yô.”—Marku 12:17; Mbaromanu 13:1, 2.

8.   Kwaghaôndo u mimi ka kwagh u ior ve eren a uma ve jimin cii yô, ka kwagh u eren sha iyol tsô ga. Mba ve eren un la mba kor atindi a Bibilo a sha kwagh u ieren i wang la sha hanma kwagh u ve eren ken uma ve cii. (Mbaefese 5:3-5; 1 Yohane 3:18) Nahan kpa, mba kighir ior ga, saan ve iyol kpishi er ve civir “Aôndo u sar sar” yô.—1 Timoteu 1:11; NW.

9.   Mba ve eren kwaghaôndo u mimi la vea vese iyenge ga. (Mateu 7:13, 14) Ior ka ve nengen mba ve eren kwaghaôndo u mimi la ér ve gba kwagh ga, shi i tuhwan ve shi i tôvon ve a ican sha ci u mba eren ishima i Aôndo yum.—Mateu 5:10-12.

Ka hanma kwaghaôndo u or nenge ér a doo nan cii a lu u mimi ga

 Ka kwaghbo u or gban tsuan kwaghaôndo tsô ér ka a na i saan nan iyol la. Bibilo ôr kwagh u shighe i ior “vea kohol mbatesen [mba kwaghaôndo] kpishi sha asaren a ve ayol a ve sha ci u ato vande ngiligh ve yô.” (2 Timoteu 4:3) Sha nahan yô, Bibilo taver se ishima ér se dondo ‘kwaghaôndo u a lu u wang shi a lu a acôghor iyol sha ishigh ki Aôndo ga yô,’ aluer kwaghaôndo shon due iti ga je kpaa.—Yakobu 1:27; Yohane 15:18, 19.