Maria Ka Ngô u Aôndo?

KUHWA

Mlumun u Bibilo i ne yô

Ei, Bibilo tese ér Maria ka ngô u Aôndo ga, shin i due a mhen ér Mbakristu ve civir Maria shin ve naan un icivir i za karen ikyar inya ga. * Nenge ase atôakyaa ne:

Mayange je Maria kaa ér un ngu ngô u Aôndo ga. Bibilo kaa ér yange Maria mar lu “Wan u Aôndo,” lu Aôndo iyolna ga.—Marku 1:1; Luka 1:32.
Mayange je Yesu Kristu kaa ér Maria ka ngô u Aôndo shin ér se naan Maria icivir i za karen ikyar inya la ga. Jighilii yô, Yesu yange kôôm mhen u kwase ugen, u na Maria icivir i hemban sha ci u ian i doon tsung i lu a mi i lun ngô u Yesu la, kaa ér: “Kpa jim yô, i saan mba ve ongo kwaghôron u Aôndo man ve eren sha mi kpaa la, iyol.”—Luka 11:27, 28.
Ishember i “Ngô u Aôndo”man i“Theotokos” (Kwase u maren Aôndo) la ngi ken Bibilo ga.
Ishember i “Torkwase u Sha” i ken Bibilo la, ngi ôron ka kwagh u Maria ga, kpa ka inmgbianaôndo u aiegh u Mbaiserael mba ve undu Aôndo civir la. (Yeremia 44:15-19) Alaghga tsô “Torkwase u Sha” ne lu Ishtar (Astarte), inmgbianaôndo u Mbababilon.
Mbakristu mba tsuaa mbara yange ve civir Maria shin ve naan un icivir i hemban la ga. Or u timen sha akaa a mbayiase ugen kaa ér, “Mbakristu mba tsuaa mbara yange ma ve venda kwaghaôndo u mbaimegh shi alaghga ma ve cia u nan Maria icivir za karen ikyaa inya, sha ci u u eren nahan la alaghga ior ma ve nenge ér mba civir inmgbianaôndo.”—In Quest of the Jewish Mary.
Bibilo pase ér hii sha uicôronmbaashighev je Aôndo lu. (Pasalmi 90:1, 2; Yesaia 40:28) Er a lu a mhii ga yô, una fatyô u lun a ngô ga. U seer yô, Maria una fatyô u wan yav mbu Aôndo ga; shi Bibilo pase wang ér usha je kpa fatyô u ngohol un ga.—1 Utor 8:27

Maria Ka Ngô u Yesu Ka “Ngô u Aôndo” Ga

Maria yange lu kwase u ken Yuda, shi due ken tsombor u Tor Davidi. (Luka 3:23-31) Jighjigh man mciviraôndo u Maria la na yô, Aôndo lumun un sha mhôôn tsung. (Luka 1:28) Aôndo yange tsua Maria ér a lu ngô u Yesu. (Luka 1:31, 35) Maria vea nom na, Yosev yange ve mar ônov mbagenev kpaa.—Marku 6:3.

Shin er Maria yange va hingir orhenen u Yesu nahan kpa, Bibilo kera seer ôron kwagh sha kwagh na kpishi ga.—Aerenakaa 1:14.

Er nan ve mbagenev ve nengen Maria ér ka ngô u Aôndo?

Kwagh u nan Maria icivir la yange hii ken mbee u derianyom u sha unyiin shighe wase ne. Shighe la Adua u Mbakatoliko hingir kwaghaôndo u vesen ken Tartor u Roma. Kwagh ne na yô, mbafanaôndoga kpa hingir Mbakristu mbaaiev. Shi adua ne ngohol ityesen i Triniti, i i lu ken Bibilo ga la.

Ityesen i Triniti ne na yô, ior kpishi mba ve zaan adua ne la, kure ikyaa ér aluer Yesu ka Aôndo yô, a gba u Maria di una lu ngô u Aôndo. Yange i yôô ken igbar hen mkohol u mbavesen mba côôci nyôr ken Efese, ken inyom i 431 la ér, Maria ka “Ngô u Aôndo.” Mcivir u Maria, inja na yô, ka u nan Maria icivir karen ikyar inya je la, samber zum u Mkohol u ken Efese ne bee kera yô. Man er mbafanaôndoga kpa gema zan adua yô, kure kure tsô ufoto man akav a Iniunkwase Maria, kar tile sha ityough ki anmgbianaôndo a nan mar, er Artemi (Diana, ken zwa u Mbaroma) man Isis nahan.

Ken inyom i 432 shighe wase ne, Poopu Sixtus III la, na zwa ér i maa côôci ken Roma, sha ci u icivir i “Ngô u Aôndo.” Yange i maa côôci ne ikyua a ijiir i tempel u Lucina, inmgbianaôndo u Mbaroma u nan mar lu la. Kwase u ngeren ityakerada ugen kaa ér “kwagh u ve maa ne tese wang ér Mbakatoliko gema mcivir u Ngô u Hemban u mbafanaôndoga la, hingir mcivir u Maria, zum u Mbaroma ngohol Kwaghaôndo u Mbakristu kera la.”—Mary—The Complete Resource.”

^ par. 3 Ukwaghaôndo kpishi mba tesen ér Maria ka ngô u Aôndo. Alaghga ka ve yilan un ér “Torkwase u Sha” shin Theotokos iti i ken zwa Grika i inja na i lu “kwase u maren Aôndo” la.

Atineakaa Agen a A Zough sha Itinekwagh Ne Yô

Aôndo Bibilo Mbampin mba Bibilo I Ne Mlumun sha Mi La

Kwagh Ugen u Alaghga Shi Una Doo U Yô

KAV JIGHJIGH VE U NAN

https://cms-imgp.jw-cdn.org/img/p/502018108/univ/art/502018108_univ_sqr_xl.jpg

Mbashiada mba Yehova

Maria Ka Ngô u Aôndo?

Mlumun u Bibilo i ne yô

Maria Ka Ngô u Yesu Ka “Ngô u Aôndo” Ga

Atineakaa Agen a A Zough sha Itinekwagh Ne Yô

Kwagh Ugen u Alaghga Shi Una Doo U Yô

Maria—“Nenge, Mo Kpankwase u Ter, M Ngun”

Ityesen i Triniti la Due ken Bibiloo?

Nger Wer I Tindi Or Nana Va Lam a We hen Ya Wou