Luka 3:1-38
3 Ken inyom i hemen u Tiberiu Shisar nyôr anyom 15, hen shighe u Pontiu Pilatu lu gomna u Yudia, Herode lu ityoor* u Galilia, anmgbian na Filibu di lu ityoor sha haregh u Ituria man Terakoniti, Lasenia lu ityoor u Abilene,
2 sha ayange a pristi u tamen Anasi man Kayafa la, Aôndo ôr Yohane, wan u Sekaria loho ken taaikyôngo.
3 Nahan a zende ken ikyôngough ki hen haregh u Yordan la cii, lu pasen er i gbe u ior vea er batisema sha u tesen ikyav ér ve gema ishima, sha u i de ve asorabo a ve yô,
4 vough er i nger ken takeda u akaaôron a profeti Yesaia nahan, ér: “Or ngu yôôn ken taaikyôngo ér: ‘Sôr nen gbenda u Yehova!* Kôôm nen igbenda na i lu jighilii.
5 I̱ cir hanma pev, shi i̱ hembe hanma uwo kua igyungu; i̱ kôôm igbenda i huren i lu jighilii, shi igbenda i lun agber agber kpa i sôr i i hingir vaanaa.
6 Nahan ior* cii vea nenge a myom u Aôndo.’”*
7 Tsô a gba kaan a ikpelaior i i lu van sha u a er ve batisema la ér: “Ne ônov mba igbindev mban, ka an nan we ne kwagh ér ne yevese iyugh i i lu van la?
8 Nahan yô, ume nen atam a a tese mgemshima yô. De kaan nen ken ishima yen ner, ‘Se mba ônov mba Aberaham’ ga. Nenge, me kaa ne, Aôndo una fatyô u geman awen ne aa hingir ônov mba Aberaham.
9 Jighilii yô, i ver ijembe hen atine a ikyon mba keghen a kegh. Nahan hanma kon u u um ityamegh ki dedoo ga cii yô, a gber u a kende ken usu.”
10 Nahan ikpelaior la lu pinen un ér: “Tsô ka nyi i gbe u se ere?”
11 A gema a kaa a ve ér: “Or u nan lu a akondo ahar yô, nana na orgen u nan lu a mi ga la i môm, shi or u nan lu a kwaghyan kpa nana er nahan.”
12 Mbangoholkpandegh je kpa va ér a er ve batisema, ve va pine un ér: “Ortesen, ka nyi i gbe u se ere?”
13 A kaa a ve ér: “De ngohol nen kpandegh i hemban er i gbe u a ta la ga.”
14 Shi mba eren tom shojaa kpa lu va pinen un ér: “Ka nyi i gbe u se ere?” A kaa a ve ér: “De nzughul nen a ma or* ga, shi de waan nen ma or aie iyol ga, kpa kwagh u i nan* ne la a kuma ne.”
15 Hen shighe ne ior lu veren ashe keghen, nahan ve cii ve lu henen sha kwagh u Yohane ken asema a ve ér, “Alaghga tsô ka un a lu Kristu ye shinii?”
16 Yohane na mlumun, kaa a ve cii ér: “Mo yô, m ngu eren ne batisema sha mnger, kpa orgen u a hembem tahav yô ngu van. M kuma u saghen un ikyor i akôvough* ga. Un yô, una er ne batisema sha icighan jijingi man sha usu.
17 Ngu a kwagh u peer akoo* a mi ken uwe, sha u una ese vande na u gbidyen iyiav pele pele, shi una kura alakema una za ombo ken iyou na i koson iyiav.* Kpa akoo yô, una nande a ken usu u a fatyô u pirin ga yô.”
18 Shi a wa ior kwagh sha akaa agen kpishi, shi a za hemen u pasen ve loho u dedoo.
19 Kpa er Yohane na Herode u lu ityoor la ibo sha akaabo a a er la cii, kua sha ikyaa i Herodia, kwase u anmgbian u Herode la yô,
20 Herode shi seer eren kwaghbo ugen: A wuhe Yohane ken purusu.
21 Tsô er i lu eren ior cii batisema yô, Yesu kpa i er un batisema. Ngur eren msen yô, i bugh sha,
22 maa icighan jijingi gba senen sha a na, lu er ikyungugh nahan, shi imo due sha aôndo kaa ér: “U ngu Wan wam u ishima ishima. Doom a we.”
23 Shighe u Yesu hii tom na la, anyom a na kuma er 30 nahan. Er ior nenge nahan, lu wan uYosev,wan u Heli,
24 wan u Matati,wan u Levi,wan u Meki,wan u Yanai,wan u Yosev,
25 wan u Matatia,wan u Amoshi,wan u Nahum,wan u Eseli,wan u Nagai,
26 wan u Meati,wan u Matatia,wan u Semein,wan u Yoseki,wan u Yoda,
27 wan u Yoanan,wan u Resa,wan u Serubabel,wan u Sheatiel,wan u Neri,
28 wan u Meki,wan u Adi,wan u Kosam,wan u Emedam,wan u Er,
29 wan u Yesu,wan u Eliezar,wan u Yorim,wan u Matati,wan u Levi,
30 wan u Shimeon,wan u Yuda,wan u Yosev,wan u Yonam,wan u Eliakim,
31 wan u Melea,wan u Mena,wan u Matata,wan u Natan,wan u Davidi,
32 wan u Yese,wan u Obedi,wan u Boashi,wan u Salmon,wan u Nashon,
33 wan u Aminadabi,wan u Ani,wan u Heseron,wan u Pereshi,wan u Yuda,
34 wan u Yakob,wan u Isaka,wan u Aberaham,wan u Tera,wan u Nahor,
35 wan u Serugi,wan u Riu,wan u Pelegi,wan u Eber,wan u Shela,
36 wan u Kainan,wan u Apakashadi,wan u Shem,wan u Noa,wan u Lameki,
37 wan u Metusela,wan u Enoki,wan u Yaredi,wan u Mehalalee,wan u Kainan,
38 wan u Enoshi,wan u Setu,wan u Adam,wan u Aôndo.
Ngeren mba shin kpe
^ Zwa Grika, “tetera.”
^ Nenge Ngeren u Pasen Asember.
^ Shin “uumace.”
^ Shin “kwagh u Aôndo a er u yiman ior la.”
^ Shin “de ngohol nen ma or kwagh sha igyosor.”
^ Shin “kwagh u i kimbin.”
^ Shin “sanda.”
^ Shin “shebul u tan sam-uyia.”
^ Shin “ken ityumbe.”
