స్వేచ్ఛాచిత్తాన్ని ఇచ్చి దేవుడు మనల్ని గౌరవించాడు. అంటే మనం ఏమి చేస్తామనేది ముందుగానే దేవుడు లేదా విధి నిర్ణయించే బదులు మనమే సొంతగా నిర్ణయాలు తీసుకునే స్వేచ్ఛ మనకు ఉంది. దీని గురించి బైబిలు ఏం చెప్తుందో చూడండి.

•   దేవుడు మనుషులను తన పోలికలో సృష్టించాడు. (ఆదికాండము 1:26) జంతువులు వాటి సహజమైన ప్రవృత్తికి తగ్గట్లుగా ప్రవర్తిస్తాయి. కానీ మనం మాత్రం మన సృష్టికర్తలా ప్రేమ, న్యాయం వంటి లక్షణాలను మనకు సాధ్యమైనంత వరకు చూపించగలుగుతాం. మన సృష్టికర్తలాగే మనకు కూడా స్వేచ్ఛాచిత్తం ఉంది.

•   చాలావరకు మన భవిష్యత్తును మనమే నిర్ణయించుకోగలం. “ఆయన [దేవుని] వాక్యము విని జీవాన్ని కోరుకోండి” అని బైబిలు మనల్ని ప్రోత్సహిస్తుంది అంటే దేవుడిచ్చిన ఆజ్ఞలకు మనం లోబడాలి. (ద్వితీయోపదేశకాండము 30:19, 20) ఒకవేళ మనకు స్వేచ్ఛ ఇవ్వకపోతే ఈ మాటలకు అర్థం లేదు. నిజానికి అది చాలా దారుణం కూడా. తాను చెప్పింది చేయమని మనల్ని బలవంతపెట్టే బదులు దేవుడు ప్రేమతో ఇలా చెప్తున్నాడు, “నీవు నా ఆజ్ఞలను ఆలకింపవలెనని నేనెంతో కోరుచున్నాను ఆలకించినయెడల నీ క్షేమము నదివలె” ఉంటుంది.—యెషయా 48:18.

•   మన గెలుపు, ఓటములు విధి మీద ఆధారపడి ఉండవు. మన ప్రయత్నాల్లో విజయం సాధించాలనుకుంటే దానికోసం కష్టపడాలి. “చేయుటకు నీ చేతికి వచ్చిన యే పనినైనను నీ శక్తిలోపము లేకుండ చేయుము” అని బైబిలు చెప్తోంది. (ప్రసంగి 9:10) అంతేకాదు “శ్రద్ధగలవారి యోచనలు లాభకరములు” అని కూడా బైబిలు చెప్తోంది.—సామెతలు 21:5.

 స్వేచ్ఛాచిత్తం దేవుడు ఇచ్చిన అమూల్యమైన బహుమానం. ఎందుకంటే ఆయన్ను “పూర్ణహృదయముతో” ప్రేమించడానికి అది మనకు సహాయం చేస్తుంది. మనం కూడా అదే కోరుకుంటాం కదా!—మత్తయి 22:37.

 దేవుడు సర్వశక్తుడు అని బైబిలు బోధిస్తోంది, ఆయన శక్తి పూర్తిగా ఆయన అధీనంలోనే ఉంటుంది. (యోబు 37:23; యెషయా 40:26) కానీ అన్నిటిని తన అదుపులో పెట్టుకోవడానికి ఆయన తన శక్తిని ఉపయోగించడు. ఉదాహరణకు, తన ప్రజల శత్రువైన ప్రాచీన బబులోను విషయంలో దేవుడు తన కోపాన్ని ‘అణచుకున్నాడని’ బైబిలు చెప్తుంది. (యెషయా 42:14) అదేవిధంగా ఇప్పుడు కూడా, తమ స్వేచ్ఛాచిత్తాన్ని ఇతరులకు హాని చేయడానికి ఉపయోగించే వాళ్ల విషయంలో దేవుడు తన కోపాన్ని అణచుకుంటున్నాడు. కానీ దేవుడు ఎప్పటికీ అలానే సహిస్తూ ఉండడు.—కీర్తన 37:10, 11.